ازيكم يافتوكات , من 10 -15 سنه زاد عدد الناس اللى بيلبسوا نظارات طبيه وعدسات بشكل كبير وده نتيجه الجلوس لساعات طويله امام الكمبيوتر والتليفزيون وده خبر مفرح لاطباء العيون لكنه خبر محزن لينا.
العين محتاجه تمارين علشان نحافظ عى صحتهم وجمالهم , زى اى عضله فى جسمك لأن للاسف النظاره والعدسات بيضعفوا النظر اكتر , ايوه ده صحيح بيضعفوا النظر وبيخليكى مش قادره تستغنى عنهم.
فى خمس تمرينات مهمه علشان نقوى عضله العين ونحسن نظارنا اللى ضيعته النظاره .
البربشه
ايوه اللى قرأتيه صح متستغربيش البربشه طريقه سهله للمحافظه على عينينا فريش ومركزه اكتر علشان احنا لما بنبقى ادام الكمبيوتر او التليفزيون بنبربش اقل, دلوقتى بربشى كل 3-4 ثوانى لمده دقيقتين ولاحظى حاسه بأيه هتلاقى انك حاسه ان عينيكى مرتاحه اكتر .
لما بنغمض عينينا ونفتحها بتاخد راحه قصيره بتساعدها ترجع فريش وبتقلل الاجهاد اللى بيحصلها .
كف الايدين
افركى كف ايديكى مع بعضهم علشان تحصلى على حراره وطاقه وغطى عينيكى بكف ايديكى الاثنين واسترخى واتنفسى بعمق ماتضغطيش على عينيكى بكف ايديكى وخليهم عشر دقايق او اكتر هتحسى بفرق كبير حتى هتحسى انك شايفه الالوان بقت اوضح ربنا حاطط فى كف ايدينا طاقه شفاء علشان كده لما بنحس بوجع فى اى حته فى جسمنا بنحط ايدينا لا اراديا على مكان الوجع .
شكل ثمانيه بالانجليزى 8
ده تمرين علشان يزيد مرونه عضله العين وهو سهل وبسيط لكن تأثيره ممتاز
تخيلى شكل ثمانيه بالانجليزى موجود ادامك على حائط على بعد 10 قدم منك ولكن بالعرض يعنى شكل ثمانيه بيكون بالعرض زى علامه مالانهايه الى فى الرياضيات , وبعدين تتبعى شكل ثمانيه بعنيكى ببطء لمده خمس دقايق وبعدين تتبعيه فى الاتجاه المعاكس لمده خمس دقائق تانين يمكن يكون تمرين غريب بس فوايده عظيمه .
قريب وبعيد
اجلسى فى مكان مريح حطى ابهامك على بعض 15 سم ادامك و ركزى عليه خدى نفس , دلوقتى حولى تركيزك على شئ يكون بعيد عنك على بعد 10 قدم خدى نفس وركزى تانى على ابهامك كررى ده لمده 3-4 دقايق
زوووووووم
ده تمرين سهل وسريع اجلسى فى مكان مريح خلى دراعك مفروض على الاخر ادامك وركزى على ابهامك وبعدين قربى ابهامك وخليه على بعد 5 سم من عينيكى ركزى عليه وبعدين افرضى دراعك تانى على الاخر وركزى على ابهامك تانى اعملى ده لمده 5 دقايق
التمارين دى هتقوى عضله العين وهتحسن نظركم مع المداومه وحاولوا تقللوا من لبس النظاره بالتدريج .
تحياتى لاحلى فتوكات
روبى ريهام روبى ريهام فتكات حبوبة Fatakat 918410 القاهره – مصر