بسم الله الرحمن الرحيم
ازيكم يااغلي ناس في الدنيا
والله بتوحشوني وبتبسط جدا معاكو
ربنا مايحرمني منكم ابدا
هاقولكم بقي علي طريقة جميلة جدا تقدروا تعملو بيها الجمبري الصغير
انا كنت بستعمل الصغير ده في الرز والمكرونة بس
بس الحمدلله قدرت اعمله وبطريقة سهلة وبسيطة اوي اوي
وقلت لازم اقول لفتوكاتي صحابي عليها
نخش بقي في الموضوع علي طول من غير رغي
ادي الجمبري الصغير بتاعنا بعد مانضفته وشيلت كيس الرمل من ضهره
وطبعا يتغسل كويس ويتنقع شوية في خل وبعد كده يتصفي
وبعد كده جهزتله التتبيلة عبارة عن راس توم وقرن فلفل حامي وتوم بودر وجنزبيل وبهارات سمك وفلفل اسمر وبابريكا ومعلقة صغيرة مسترد وخل وليمون وطبعا نظط الملح ونتبل الجمبري فيه
ودخلته التلاجة قعدته حوالي 5 ساعات
وقبل ماعمله بساعة طلعته وحطيتله معلقتين كاتشب بتخليه مسكر سنة كده
وبعدها بساعة طلعته
وجبت دقيق وتبلته بفلفل اسمر وبابريكا وسنة كاري وملح بسيط اوي وجنزبيل وتوم بودر
وقلبته كويس
وجبت الجمبري وحطيته في الدقيق وقلبته فيه كويس زي كده
وقلبته كويس ونفضته من الدقيق
وحطيته في طبق لوحده
وادي كمية تاني
وادي الكمية بتاعتي لما خلصتها
وجهزت بطاطس قطعتها ونقعتها في مية وخل
وبعدين قليت الجمبري
لازم يكون الزيت سخن جدا
وادي حبة طلعتهم شايفين جميل ومش فاكك زي البقسماط ومش كاشش لان السبب اللي بيخلي الجمبري الصغير يفك انه بيكش فيقوم البقسماط يقع من عليه
وبعدين غطيته ليه بقي لانه بيطلع كرسبي ودي حاجة اختيارية لو عايزاه ناشف ماتغطيهوش انا بعمل كده في الجمبري الكبير
بس الصغير بحب اغطيه عشان مايبقاش ناشف اوي بحبه طري كل مابطلع شوية من الزيت احطهم في الطبق واغطيه تاني
وادي الجمبري بعد ماقليته وخلصته
حضرت تومية
وعيش فينو
وفتحته وحطيت التومية
وبعدين الجمبري
وادي صورة من قريب
ودي كمان
شايفين والله تحفة بجد ومايفرقش حاجة عن الكبير غير في الحجم لكن نفس الطعم وكل حاجة
وبيتعمل ساندويتشات كمان اهو وزي الفل
وحطيتله كاتشب كمان
اتمني تجربوه وان شاء الله هايعجبكم جدا جدا
واتمني لو عجبكم ياريت تقيموه
وبالف هنا يا قمراتي
في امان الله يا حبايبي
مواضيع هذا القسم برعاية
dr nemo dr nemo 884797_1.gif سوبر فتكات Fatakat 884797 قلب زوجي – مملكتي الصغيرة