طبعا معظمنا موهوم بالمودرن فى الفرش والجهاز والمسلسلات التركي كانت عاملة معانا شغل جامد قوي بصراحة
المودرن اصلا يا بنات خطوطة بسيطة وهندسية سواء انسيابية او حادة وألوان اما متناغمة او متضادة (هشرحهم اكتر بالصور قدام شوية).. واساسة البساطة
واتعمل علشان نستغل المساحات الصغيرة ونفرشها بشكل بسيط يدي وسع للمكان الضيق (يعني كركبة لااااا.. اكسسوارات اووووفر لاااا.. استعراض في النيش والمفروشات بردو لااااا.. عارفة ان كلنا نفسنا نجيب احسن حاجة بس والله مش بالكمية ولا بغلو الاسعار.. بالذووووووق وتنسيق المكان)
طبعا مختاره تبدأي ازاي
هتختاري الوان الدهان الاول.. وبناء عليها بتنزلي تنقي العفش وتعرفي هترصي كل حاجة فين وازاي وبعدين تحددي مقاس السجاجيد والستاير وتختاري الوانهمبناء على الوان الدهان والعفش وفي الاخر بتحددي المسات النهائية انتى محتاجة لون ايه تزوديه فى الغرفة بالاكسسوار سواء مزهرية او تابلوه او حتى تعملى خدديات زيادة للانتريه باللون ده
وطبعا المودرن زي ما ليه مميزات كتير ليه عيوب بردو كتير.. اولها ان مش كل النجارين بيعملوه حلو والشركات احيان كتير بتستهبل في اسعاره مع انه مش بيكلف زي الكلاسيك
وكمان السرير اللى مرتبته بتتعشق فيه ده رغم ان بيعجبني شكله قوي بس استحالة هتفرشيله ملايه بأجناب وهتكون تقريبا كل ملاياتك بأستك وهيبقى مرهق قوي في تغيير ملاياته
حابة اكلمكم الاول عن فكرتين فى الالوان اللي بتليق مع بعضها وهحطلكم درجات الوان لكل قاعدة فيهم
الالوان المتماثلة (متناغمة-هاديه- رقيقة) من نفس المية
ودرجات الالوان دي بتريح العين وبتهدي الاعصاب بس في نفس الوقت ممكن تسبب زهق.. وبتعتمد على درجات اللون الواحد.. او درجات لونين بس متقاربين
***************
الالوان المتغايرة (متضادة-صاخبة-مطرقعة)
ودرجات الالوان دي ممكن الوان ملهاش أي علاقة ببعض بس بتليق على بعضها ومش بتبقى نشاز وبتخلى جو المكان حيوي ونشيط ومش بنختار اكتر من لونين مختلفين ومعاهم لون واحد بدرجاته مثلا
وطبعا انتى اخترتي تفرشي بيتك بالاسلوب المتناغم يبقى كل البيت كدا.. مش النوم تبقى برتقالي مثلا فى موف في اسود.. وتقومي عاملة الانتريه روز في ابيض.. وكمان ملاياتك وفرشك بالتأكيد لازم يبقى لايق مع الاسلوب اللى اخترتيه لدهان شقتك ولون قماشات الانتريه والستاير
شوفي هنا نفس اللوحة هي في كلتا الحالتين لايقة.. بس على حيطة بلون مغاير عملت تضاد فى الالوان وبقت مبهجة.. وعلى لون من نفس مية الوانها بقت هادية.. المهم يكون فرش الغرفة بنفس الطريقة علشان يبقى فيه تناسق عام
وعينات الالوان اللى انا حاطاها دي لو تلاحظو من درجتين لخمس درجات (دى الوان المكان كله يعني الحيطة والفرش والاكسسوار والسجاجيد والستاير)
هنوضح اكتر بالصور وتحتها عينات الالوان اللى المصمم اختارها
هكمل في المشاركات الجاية معلومات بسيطة عن كل غرفة وصور كتييييييييييييييييير
وده موضوعي التاني عن جهاز العروسة بالاعداد والصور
متنسوش التقييم بقى يا فتاتيك
ودعواتكم ربنا يجمعني بمن اتمنى فى الحلال عاااااااااااجلا غير آجلا يااااااااااااااااااااااااااااااااارب
fairouzelhendy fairouzelhendy 214025_2.gif فتكات رائعة Fatakat 214025 cairo – egypt