بسم الله الرحمن الرحيم
تعالو نعرف شوية معلومات كدا قبل ما نتكلم عن تجيبي ايه لجهازك
في أي عجانة او كيتشن لو هتعملي عجينة تقيلة ياريت تظبطيه على ابطأ سرعة علشان الموتور مش يتعب وكمان متلاقيش الجهاز بيتهز جامد على الرخامة
وفي اي عجانات بمفرمة بشكل عام ياريت تشغليها على اقل سرعة
أي كيتشن او هاند بليندر او حتى خلاط عادي عندك هاتيله نص متر مشمع بس من التقيل الحلو وقفليه بايدك بابرة وفتلة على مقاس جهازك علشان تحافظي عليه (لو مش بتعرفي خدى مقاس الخلاط طول وعرض وارتفاع ووديه لاي خياطة تعملهولك ب5 جنيه).
ياريت تخلى جهازك ثابت فى مكانه على الرخامة مش كل شوية تطلعيه وتعينيه فى درفة الدولاب منعا لاي حوادث او لقدر الله وقعه
ياريت تخلي قطعة قماش قطن كدا جنب الكيتشن علطول تنضفيه بيها اول باول
لو مش عارفة تستخدمي الكيتشن ولا فاهمة وظايفه اعرفي موديله بالظبط وافتحي اليوتيوب واكتبي الماركة ورقم الموديل وباذن الله تلاقي فيديوهات لطريقة استخدامه او اعملى موضوع فى فتكات وفيه اسم الموديل ورقمه والفتوكات مش هيقصرو
ابوووووووووووس ايدك اتاكدي الاول الخلاط ينفع لخلط المكونات السخنة او جرش التلج والفواكه المجمدة وللا لا لان كيتشن اختي كان هيسيح بسبب حاجة سخنة اتحطت فيه وحتة من بلاستك الكبة كرمشت فى بعضها وكمان التلج ممكن يبوظ السلاح او يكسر البلاستك او زجاج الخلاط
***
قبل ما تشتري اى جهاز الاول شوفي انتى محتاجة ايه بدل ما تجيبي حاجة مليانة وظايف بمبلغ قد كدا وانتى اصلا مش هتستخدمي الا وظيفة واحدة.. وبعد كدا حددي ميزانيتك وبعدين اختاري الماركة وشوفي ايه من موديلاتها يناسب احتياجك وميزانيتك
طيب تجيبي محضر طعام وللا كل حاجة لوحدها؟؟؟.. دي ترجع لراحتك واستخيري بردو قبل ما تجيبي علشان تبقى مرتاحة نفسيا.. وانا شخصيا بفضل الكيتشن لاني متعودة عليه في بيتنا ومرتاحة في انى اشتغل بحاجة واحدة
طيب لو هتجيبي كل حاجة لوحدها تجيبي ايه؟؟؟..
اساسي هتحتاجي كبة (في حدود 250 جنيه) للبصل والاستخدامات اليومية
kenwood mini chopper CH550 في حدود 250 جنيه 400 وات وليها سلاح باربع شفرات
Mini Chopper CH180 كينوود في حدود 500 جنيه وهي 450 وات
Mini Chopper CH580 ودي بتجرش التلج او الفواكه المتلجه 500 وات وتقريبا ب500 جنيه.. بردو ليها سلاح رباعي باربع شفرات
وخلاط بمطحنتين (بيبدأ من 150 جنيه وانتى طالعة) للطماطم والعصير وطحن التوابل
مضرب بيض (في حدود 200 جنيه) لو هتعملي كيكة او كريم شانتيه او الحاجات دي.
kenwood-hm330-hand-mixer في حدود 200 جنيه
kenwood-hand-mixer-bowl-hm430 في حدود 300 جنيه
***
لو ميالة للهاند بليندر ومش عارفة تجيبي ايه معاه؟؟؟.. هو بالفعل فيه كبة (بعض الموديلات ارخص ومش فيها كبة) وليه دراع بتعملى بيه العصائر والشوربة والبيوريه.. معاه كمان مضرب بيض (بس متتقليش عليه لانه ضعيف مش جامد).. لو مش فيه كبة هتجيبي كبه ومطحنة توابل لوحدها ساعات بيبقى اسمها مطحنة قهوة.. ولو دايسة فى المطبخ والمخبوزات والكلام ده والامكانيات تسمح يبقى الغى مضرب البيض وهاتي عجانة كبيرة بتبقى فى حدود 1500 وانتى طالعة
Kenwood Tri-Blade Hand Blender HB724 ده اللى بالكبة
Kenwood Hand Blender HB714 وده اللى من غير كبه
عجان كينوود من عائلة ميجور تيتانيوم 1500 وات
***
طيب لو عايزة تجيبي كيتشن ماشين بس محتارة في الماركات والموديلات والاسعار؟؟؟.. بردو حددي انتى محتاجة امكانيات ايه فى محضر الطعام والماديات تسمح بايه ووازني بينهم.. وهقول رأيي الشخصي بناء عن تجربة
braun-combimax k-700 td في حدود 1100
مولينكس.. جربت منه شفشق بمطحنة فرنساوي اصلي ب600 لحلوح وخسارة فيه بلاستك ضعيف جدااااااا ولازم احط مية كتير علشان الطماطم او العصير يرضى يتخلط.. وقريت تجارب لفتوكات كتير اشتكو ان لما صيانته بقت مع شركة زهران بقت زفففففففففففت وبيطلعو عنيهم فى قطع الغيار.. اسعارها نوعا ما غالية الفرنساوي ومع ذلك جودتها مش قد كدا
براون.. زمان كانت رااااااااااائعة لما كانت الماني الحاجة كان ممكن تعيش معاكي فوق ال40 سنة والله بدون مبالغة.. دلوقتي بقى الكيتشن تقفيل المجر.. جربته مؤخرا فى كيتشن كومبي ماكس ابو كبتين وهو ماشاء الله جميل بس لما اتطحن فلفل اسمر فى الكبة الصغننة وقرفة الكبة اتدمرت شروخ من الجوانب ومن تحت غير كدا ماشاء الله حلو.. كانت شكوى بعض الفتوكات ان قطع غياره غالية بس الصيانة محترمين فلو هتجيبيه تاكدي ان فيه مركز صيانة قريب منك فى محافظتك.. معظم المنتجات اسعارها وسط وجودتها معقولة
بلاك اند ديكر.. معنديش معلومات عنها قوي بس شفت كذا فتوكة بتشكر في حاجات وفتوكات تانية تذم فيها وتقييماتها على موقع امازون متفاوتة بردو.. وللعلم هي تقفيل صيني.. وبصراحة مجربتهاش بس اسعارها مش غالية
كينوود.. ودي اشهر ماركة لمحضرات الطعام والعجانات ومعظم الشيفات بتستخدمها في البرامج.. وعلشان متتخضيش ولا حد يضحك عليكي هي ماركة انجليزي بس بقى تقفيلها صيني.. وبامانة نادر اللى اشتكو منها واغلب الفتوكات شكرو فيها.. ميزتها ان ليها موديلات كتيييييييييييييييييييييييييييير جدا وامكانيات متفاوتة باسعار تناسب الميزانية القليلة او الكبيرة وجودتها حلوة
وفيه كمان فيليبس وميانتا وجاك وماركات كتير بس لا افقه عنها شيء
وبكره باذن الله هتكلم عن الجهاز الجبار (
كينوود ميجور تيتانيوم km23 ميجا باك) من كينوود بالتفاصيل المملة والفيديو ادعولي ربنا يرزقني انا وكل اللى نفسها فيه
وربنا يارب يبارك لكل البنات فى اللي جابته واللى لسة مش جابت تجيب كل اللى نفسها فيه
مشاركة هامة
الخلاط الجبار كينوود ميجور تيتانيوم km23 ميجا باكرايحين فين
متنسوش التقيييييييييم
ودعوة من قلبك ربنا يجمعني بمن اتمنى عاجلا غير اجلا يااااااااااااااااااااااااارب
fairouzelhendy fairouzelhendy 214025_2.gif فتكات رائعة Fatakat 214025 cairo – egypt