بسم الله الرحمن الرحيم
السلام عليكم ورحمة الله وبركاته
كيف حال الفتوكات الطيبات
جيبالكم النهارده اسهل طريقه لعمل الحمام المحشى
بس بالله عليكم اللى يعجبها الموضوع ما تبخلشى عليه بالتقييم
وتدعيلى دعوه حلوه علشان المَلَك يقول لها امين ولكى بمثل ما قلتى
ونستفاد احنا الاتنين
ندخل فى الموضوع
المقادير
3 جوز حمام
حوالى نصف كيلو ارز
معلقة سمنه ومعلقة زيت
كبد وقوانص الحمام مقطعه مكعبات
بهارات وملح
زيت للتحمير
الطريقه بالصور
اول حاجه نغسل الحمام كويس
وبعدين نغسل الكبد والقوانص والقلوب كويس ونقطعهم علشان هنحطهم مع الرز اللى هنحشى به الحمام
وبعدين نجهز الارز وانا من تجربتى مع الحمام بعمل حسابى ان الحمامه الواحده تاخد ملو ايدى ارز كده
ولو انتى عايزه تكترى , عادى اللى هيتبقى هتسويه ويتاكل جمب الحمام
المهم انا هحشى 6 حمامات ولكن مليت ايدى ارز 8 مرات
لانى بعمل حساب لو ارز لزق وانا بسويه مثلا
ودى كمية الارز اللى عملتها بالظبط تقريبا ييجى نصف كيلو
وبعدين نجيب صينيه ونحط فيها معلقة السمنه ومعلقة الزيت ونحطها على النار
واول ما يسيحوا نغسل الارز ونحطه كده
ونقلب الارز مرتين مثلا ونحط عليهم الكبد والقوانص اللى انا جهزتهم
وبعدين نقلبهم شويه وبعدها تحطى البهارات اللى انتى نفسك فيها كلها
انا حطيت كمون وفلفل وقرفه ونعناع
والملح طبعا نحطه معاهم
وبعدين تشوحيهم كويس لحد ما الارز ياخد لون بنى ويكون شكله كده
وبعدين انا غليت شوية ميه على العين الصغيره فى البراد
وزودت الارز بكمية ميه صغيره
لان احنا عايزين الارز نصف سوا
يعنى هتحطى ميه تقريبا نصف الكميه اللى لو حطتيها الارز هيستوى
وده شكل الارز بعد ما حطيتله شوية ميه مش كتير
وحطيت الصينيه دى على العين الصغيره ووطيت النار لحد ما الميه اتشربت واصبح الارز دلوقتى نصف سوا وجاهز لحشو الحمام
ودى صوره قريبه اوى من الخلطه علشان تاخدى بالك الارز لونه بنى وشكله جميل
وطبعا انا مش بحب احط لخلطة الحمام طماطم او صلصه او بصل مثلا
لان لما تحطى الارز مع السمن والبهارات وكبد وقوانص الحمام فقط
الارز بياخد طعم ولون الحمام خالص
وتاكلى الارز اللى فى الحمامه وكأنك بتاكلى لحم الحمام نفسه
لان مفيش اضافات للخلطه كتيره تخليه ياخد طعم تانى
علشان كده الطريقه دى بحب اعملها اوى
وانا اتعلمت الطريقه دى من اخت زوجى وهى شطوره اوى فى المطبخ
المهم نرجع للحمام
دلوقتى انا بحشى الحمامه من فوق ومن تحت يعنى بحشى بطنها من تحت وبحشى ظورها من فوق وطبعا حاولى ما تمليهاش اوى لان الارز هيزيد جواها
وبعد ما تحشى الحمام كله لو عندك خله اقفلى بيها الحمام وخلاص
ولكن انا ما عنديش خله وبصراحه بخيط الحمام من فوق ومن تحت كويس
بخيط ابيض علشان الارز ما يطلعش وهو بيتسلق
وده شكل الحمام بعد ما اتحشى واتخيط
وطبعا قبل ما ابدأ احشى الحمام بكون ولعت البوتاجاز على ماء للسلق
وحطيت فيه بصله وملح وفلفل وحبهان وقرفه
هو مش بياخد سوى كتير
واول ما الماء غلى حطيت الحمام علشان يتسلق كده
وبعد كده حمرته فى الزيت وبعد ما اتحمر فكيت الخيوط اللى فيه
وده شكله النهائى
وعملت جمبه ارز بشعريه عادى وسقيته من شوربة الحمام
ودى صورته بعد ما حطيته على الارز ابو شعريه
ودى الصوره النهائيه قبل الاكل مباشرة بعد ما غرفت الارز فى السيرفيس الكبير وحطيت فوقه الحمام
ومش عملت جمبه حاجه تانيه لاننا بصراحه بنحبه لوحده
انا لونت جوانب الصوره القادمه دى بصراحه علشان العيال وابوهم كانوا قعدوا واستعدوا للاكل ولا مؤاخذه كانت رجليهم باينه فى الصوره ههههههههه
فى رعاية الله يا قمرات
واوعوا تنسواااااااااااا التقييييييييييييييييييييييييييم
*********************
***********
****
مواضيع هذا القسم برعاية
نفسى فى بنوته نفسى فى بنوته 392243_45.gif فتكات غالية قوي Fatakat 392243 القصيم ( بريده ) – السعوديه