ازيكم يا فتوكات يا رب تكونوا بألف خير
انا انهارده قولت اما اطبق طريقة فطائر الجبنه المقلية الروووعه
بتاعه remosh و ده اللينك بتاعها
فطائر الجبنه المقليه سهله ولذيذه من مطبخى
ليه بقى ..؟
عشان انا اولادي زي معظم اولادكم بيغلبوني الصبح عشان يفطروا او ياكلوا اي
حاجه قبل ما يروحوا المدرسة و زي ما انتم عارفين ان الفطار مهم جدااا
خاصاً ان البريك الاول عندهم بيكون الساعه 10 و نص يعني تقريباً
هيقعدوا 3 حصص من غير اكل و لا تركيز طبعاً
ف اما شفت الفطائر التحفففه اللي عملها remosh
قلت بسسس هي دي حاجه جديدة و مش تقليديه زي السندويتشات العادية
و اكيد هتعجبهم و قد كان
عملتها النهارده الصبح بجد مش هتاخد منك وقت خالص
انا ابتديت فيها على الساعه 5 و نص الصبح على 6 كنت خلصتها
و كفايه رغي بقى كده الواضح انى رغايه فعلا
اولاً المقادير :-
عدد 1 كوب دقيق
عدد 1 كوب ماء
عدد 2 بيضة
عدد 2 ملعقة كبيرة سمن
1 ملعقه صغيرة ملح
نص معلة كبيرة سكر
250 جرام جبنه شيدر مبشوره
زيت للقلي
ثانياً الطــــريقة :-
هنجيب حلة و نحط فيها كوب الماء
و معاها معلقتين السمن و معلقة الملح
و نص معلقة السكر و نسبها تغلي
اول لما تغلي هنضيف ليها كوب الدقيق
و نقلب كويس لحد ما كل المكونات تمتزج مع بعض
و نطفى عليها النار و نضيف الجبنه الشيدر المبشوره
و نقلب كويس جداا لحد ما الجبنه تسيح و تختلط معاهم
ثم نضيف البيضتين و نقلب كويس لحد ما نلاقي البيض
اختفى و اختلط كويس مع كل المكونات
و ده شكل العجينه قبل ما اكورها
من قريب اكتر
دلوقتي هبتدي اخد منها قطع صغيرة
و اكورها زي كده
و على فكرة انا مش دهنه ايدي زيت او حاجه
ده من معلقتين السمن اللي حطناهم فى الاول
العجينه ما شاء الله طالعه ملساء و ناعمه جداااا
و دي كل الكميه بعد ما خلصنا تكورها كلها
نسخن بقى زيت غزير
و نبتدي نحمرها
و نطلعها بقى على ورق مناديل
فى مصفى زي ما remosh قالت عشان تفضل مقرمشه و لذيذه
و متبقاش طريه
و هنا بعد ما طلعت بالسلامه
و هنا بعد ما رصتها فى الطبق
بجد كلمه تحففففه قليله عليها
صورة كمان من قريب
جربوها بجد هتعجبكم و هتعجب الولاد اووووي
انا اولادي ما شاء الله اكلوها و اتجننوا عليها من حلوتها و طعامتها
تسلم ايدك يا ميرو بجد وصفة ممتااااااااااااااازة
متحرمونيش بقى من ردودكم و تقييمكم يا قمرات
بجد انا تعبت فى الموضوع فى التصوير و رفع الصور
و متنسوش تجربوها و تقولو رايكم
مواضيع هذا القسم برعاية
ميمي طه ميمي طه 52626_88.gif ملكة فتكات Fatakat 52626 — – —