سلام عليكم
انا جايه احكيلكم تجربتي مع ال 4D في مستشفي القاهره التخصصي بطالبيه فيصل
اولا انا من بدايه الحمل و الدكتور اللي بتابع معاه الله يباركله و يطول عمره محمد عيسي في مستشفي الانجلو امريكان
بيبعتني اعمل السونار في كايرو سكان بما انه خيرني بين كذا مكان ثقه و انا اختارت كاايرو سكان لانه تبع التأمين بتاعي
المهم كان الدكتور اللي بيعملي السونار ممتااااااااااااااااااز و بيشرحلي كل حاجه و يوريني العمود الفقري و القلب و الحبل السري و رجله و ايده و كله كله مع انه كان سونار عادي بس بحسه خماسي الابعاد من دقته صحيح سعره 250 جنيه لكن التأمين كان بيغطيه بس بيطلع شغل محترم خصوصا اني عندي انفصال جزئي في المشيمه و ده صعب تحديده و تحديد درجه الانفصال بالسونار العادي الا انه حددهولي بسم الله ما شاء الله عليه
المهم الدكتور طلب مني 4D في الشهر الخامس عشان نتطمن ع البيبي من التشوهات و نتطمن علي المشيمه و نشوف درجه انفصالها بدقه اكتر فانا التأمين بتاعي مش بيغطي ال 4D فاضطريت اعمله علي حسابي بس لقيته ب 550 في كايرو سكان و بصراحه عالي عليا اووووووووي فعملت بحث هنا في المنتدي عشان اشوف اماكن كويسه بأسعار معقوله و توصلت لمستشفي القاهره التخصصي بطالبيه فيصل سعره 200 جنيه و اللي بيعمله دكتور رجب عرفه اللي هو اشهر من نار علي علم في فيصل و سمعته سبقاه و عيادته علي طول زحمه مووووووووووووووت
المهم حجزت و روحت امبارح عملت عنده السونار …. للاسف غايه في السوء و انعدام الضمير
اولا اول ما دخلنا ع الدكتور كان بيكلم مريضه عنده بمنتهي قله الذوق و هي بتسألأه في حاجه زعقلها و قالها انا في العياده لو عاوزه تسألي عن حاجه تجيلي و قفل السكه في وشها و رمي الموبيل ف الدرج طبعا انا تنحت و توقعت اسلوبه معانا المهم سألني عاوزه اعمل ال 4D ليه قولتله اني عندي انفصال ف المشيمه و عاوزه اتطمن ع البيبي من التشوهات و كده
المهم طلعت ع السرير و قعد يمشي بالبكره ديه علي بطني و قالي تمام تمام مفيش حاجه الحمد لله و هو فعلا في انفصال في المشيمه
smiley-stoned: و السونار كله ابيض في اسود و لقطتين بس ملونين يقرفوا جابهم مش واضح منه اي حاجه نهائي عباره عن حاجه صفرا مكلكعه انا قولت يمكن لسه بيظبط الصوره لقيته بيقولي خلاص قومي قولتله ايه ؟؟؟؟ طب انا عاوزه اشوف البيبي و اشوف اعضائه و شكله قالي هو كويس الحمد لله و هطبعلك صور ابقي شوفيها قولتله طيب نوعه ايه قالي ولد ان شاء الله قولتله طب ممكن اشوف اعضائه التناسليه قالي لاءءءءءءءءءء طبعا انا تنحت و مصدقتش انه بيقولي كده فقومت من السرير و سالت الممرضه قالتلي ده بيديكي صور ملونه و تقرير فيه كله حاااااااااااااااااااجه متقلقيش
المهم استلمت التقرير و ببص ف الصور اتصدمت مش باين اي حاجه صور معفنه مش عارفه هي عباره عن ايه اصلا و التقرير كله ارقام مفهمتوش و من ساعتها و انا ضغطي عالي و متضايقه جدااااا و استعوضت ربنا في فلوسي و منه لله معندوش ضمير و بنصح اي واحده متروحش عنده تعمل 4D نهاااااااااااااااااااااائي
بس انا قلقانه طول الليل مش عارفه انام تفتكروا الارقام اللي كاتبها ف التقرير صحيحه و ان البيبي فعلا سليم و لا هو بيكروتني و يقولي كده و خلاص خصوصا ان طووول الوقت الشاشه ابيض ف اسود و الملون مجاش غير لقتتين بس ؟؟؟؟؟
يعني اثق في الريبورت بتاعه و لا لاء و لا التقرير ده من الجهاز مش لدكتور فأعتمد علي دقته ؟؟؟ و طب ينفع اعيد ال 4D بعد شهر مثلا او شهرين و اشوف الدنيا عامله ازاي و لا اصدق تقرير الدكتور و معملش ال 4D تاني ؟؟؟ و تفتكروا هو ولد فعلا و لا هو بيخمن بما اني مشوفتش حاجه فمعرفش ؟؟ارجووووووكووووووووووو حد يفيدني و يقولي اعمل ايه انا هتجنن و مش عارفه انام و قلقانه جدااااااااااااا و مش مبطله تفكير
بجد هزعل منكو اوووووووووووي لو سيبتوني كده و محدش رد عليا و اللي هترد هدعيلها دعوه حلوه بظاهر الغيب
اسال الله لي و لكم الذريه الطيبه المعافاه البدن و العقل تامه الخلقه بار بوالديها ياااااااااااااااااااا رب
smsm.mshmsh smsm.mshmsh فتكات متميزة Fatakat 1017661 القاهره – مصر
سبحان الله و بحمده