كنت عملت موضوع قبل كدة طالبة حد يساعدنى فى تجميع معلومات عن العملية دى وطبعا انا مسكتش رحت لاكثر من دكتور لغاية ما رحت لدكتور عبد العظيم الجنش اكيد الى من المنصورة سمع عنة بصراحة انا ارتحت جدا لمجرد اخلاقة ودينة وهو شاطر جدا انا طبعا عملتها جراحة موش منظار لان المادة الى معايا كانت يدوب تكفى جراحة ما علينا بما انى رحت لاكتر من دكتور اغلبهم قال ان انسب حاجة لحالتى هى عملية التدبيس الطولى للمعدة موش التحويل لان اضرارها اقل من التحويل وبالزات انى انسة وموش متزوجة وانعملية التحويل تفقد الجسم الفيتامينات والحديد اما التدبيس الطولى على العكس منها لانها بتحافظ على اجزاء المعدة بالكامل طبعا اول ما كنت دخلة غرفة العمليات وقبلها مقدرش اقولكم كنت عاملة ازاى بالزات ان دى اول مرة اعمل عملية وبترعب من الحقن لكنى قبل ما انزل من البيت صليت الفجر ودعيت ربنا سبحانة وتعالى انة يعينى على تحمل الالم انا يا جماعة قبل ما اعملها كانت نفسيتى زى الزفت لانى عمرى 21 سنة وموش قادرة اعيش حياة طبيعية زى الناس وزى كل البنات الى فى سنى واكيد الى زىى حاسس بيا دة بالاضافة لصحتى الى بتروح كل يوم بسبب المرض اللعين دة لفيت على كل الدكاترة وصرفت فلوس اكتر مما تتخيلوة وعملت لوحدى بعد ما الياس امتلكنى انزل عشرة كيلو او عشرين وارجعهم تانى دة غير التوتر الى انا مسبباة فى البيت غير الكلام الى كنت بسمعة من الناس مقدرش اقلكم كان بيعمل فيا اية كنت بحس ان الى انا فية دة ذنب فظيع ارتكبتة كانة جريمة ومع ذلك استحملت وحاولت ومن سنة بدات موضوع العملية دة يظهر نتايجة على ناس كتير اعرفها وناس اوزانهم ازيد منى بكتير وبدات افكر فيها فعلا بس كنت اخاف واتراجع لحد ما خلااص فااض بيا وقررت اعملها واعتمد على ربنا لانة يسرلى طريق لاجراءها مكنتش اتخيل انى اعملها وبالسرعة دى المهم دخلت العملية وطبعا اخدت بنج ومحستش باى حاجة ولما صحيت طبعا مكنتش حاسة باى حاجة وانتهى اليوم الاول وتانى يوم بدات افوق من البنج اصعب فترة هى فترة ما بعد العملية مباشرة بعد الجراحة وبعد كدة خلااص بتاخدى علاجك وبتبقى زى الفل وترجعى لحياتك الطبيعية لكن طبعا موش زى الاول يعنى الى كنت باكلة الاول باكل ربعة او اقل اذا قدرت وطبعا فى تعليمات الدكتور بيمشيكى عليها فى اول شهر هو اهم شهر لانة بيقيس قدرتك على احتمال الوضع الجديد ممكن تحسى بشوية هبوط او دوخة بسيطة لان طبعا الجسم موش متعود على الكميات البسيطة دى بالنسبة ليا انا عملت العملية من شهر واحد والحمد لله تعالى نزلت 19كيلو فى اول شهر بس ومستنية نتائج الشهور القادمة وانا ملتزمة بتعليمات الدكتور بحزفيرها دة بالاضافة انة خلاص مبقتش زى الاول موش حابة اكل اكتر من المطلوب بمجرد احساسى بالشبع بقوم من على الاكل الاكل ببطىء شديد طبعا عشان اتابع احساسى بالشبع مبسوطة جدا لان كلة ملاحظ انى بدات انزل فعلا معنوياتى مرتفعة ومترقبة النتيجة الاخيرة وطبعا هو منبة عليا لازم الرياضة مهمة جدا انا حبيت اقدم تجربتى وهخليكوا تتابعوا معايا عشان تتاكدوا من سلامة هذة الجراحات بس نصيحة اخيرة الى فيكوا قادرة انها تعمل رجيم وتخس وقادرة تحافظ على وزنها يبقى تنسى موضوع العملية دة خالص وتكمل دايت عادى جدا لان طبعا مفيش عملية سهلة اما الى خلاص وزنها زايد جدا ومفيش فايدة فالصحة يا اختى العزيزة ليست محتاجة تردد ونسيت اقلكم وزنى كان كام قبل ما ادخل العملية كان130 وحاليا 111موش طالبة غير دعواتكم معايا ربنا سبحانة وتعالى يكمل شفايا على خير واعيش حياة صحيحة ودعواتى لاى بنت فى الدنيا بتعانى من المرض اللعين دة انها تصح ولا تستسلم ابدا وتحاول بشتى الطرق وربنا الموفق فى النهاية الصحة مفيش اغلى منها ويارب كلكم تبقوا بالف صحة الى عايزة فيكوا تسال اى سؤال انا تحت امرها وانا هتابع معاكوا على طول معدل النزول بتاعى بس ادعولى بالتوفيق
حبيت اتكلم حبيت اتكلم فتكات حبوبة Fatakat 583592 المنصورة – مصر
سبحان الله و بحمده