ازيكم يااحلى فتوكات عايزاكم الاول تدعوا بالرحمة لشهداء الثورة وكمان ثوار التحرير ان ربنا يقويهم وينصرهم ::::
======================
من شوية كده لاقيت نفسي فاضية ومش لاقية حاجة اعملها وكمان كنت عايزة اعمل حاجة لبنتي تحبها وتاكلها فطقت في دماغي اعمل لانشون
روحت دخلت المعمل بتاعي ههههه واتكلت على الله
من غير رغي كتير يالا خدوا المقادير
==================================
المقادير
ـــــــــــــــــــــــــ
– حوالي 400 جرام صدور فراخ مخليه من العظم والجلد
– بيضة كاملة + بياض بيضة واحدة
– شريحة بصل كبيرة
– ربع فص ثوم من الكبير ده ( الصيني )
– 2 معلقة ونص كبيرة بقسماط مطحون
– معلقة كبيرة دقيق
– معلقة صغيرة مستردة
– معلقة صغيرة زيت زيتون او اي نوع
– شريحة طماطم صغيرة
– روز ماري 4 اعواد صغيرين
– رشة من كل نوع ( جنزبيل – بهارات لحمة – فلفل اسمر – كبابة صيني )
===========
مقادير ماء الغلي ( اللي هاتسوي فيها اللانشون)
ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ـــ
باقي البصلة قطعيها شرايح وشوية حبهان وورق لورا وروز ماري وبهارات
=======
الطريقة
ــــــــــــــــــــــــ
اولا تحطي كل مقادير اللانشون في الكبة او الكيتشين او الفود بروسيسور او اي حاجة عندك تكون بتنعم اوي
وافرميهم كويس اوي اوي اوي على قد ماتنعم الخلطة على قد ماتبقى حلوة
هاتي ورقة فويل وافرديها على الرخامة وافردي فوقيها بلاستيك بتاع الاكل زي مافي الصورة كده
وبعدين نفرد عليهم الخلطة وممكن نضيف عليها في الخطوة دي حبوب فلفل اسمر او زيتون مخلي ومتقطع
وبعدين نلف العجينة في البلاستيك الاول كويس على شكل اسطوانة وحاولي تطلعي منها الهوا
حضري حلة واسعة واملي ثلثينها مياه وحطي فيها مقادير مياه الغلي زي ماكتبت فوق
بعد ماتغلي المياه لمده 5 دقايق حطي بقى لفة اللانشون وغطي عليها وسيبيها على النار لمدة نص ساعة تغلي
بعد كده طلعيها وفكيها من الورق وسيبيها تبرد خااالص وبعدين قطعيها زي ماانتي عايزة وقدميها وده الشكل النهائي
ياريت تدعولي بقى دعوة حلوة وماتنسوش التقييم والا………
مواضيع هذا القسم برعاية
marmr_012 marmr_012 360010_21.gif فتكات ست الكل Fatakat 360010 cairo – cairo