بالتوكل على الله ثم الصحبة الصالحة هنخس باذن الله

فتوكاتى الاحباب مين منكم جربت رجيمات كثيرة وخست ورجعت تانى او كسلت تكمل المشوار او ملت من طول الانتظار او تعبت صحيا ونفسيا من وزنها ؟
طب ماتيجى نجدد النية ونبداء مع بعض من جديد بنية جديده وهى التوكل على الله ثم الصحبة الصالحة
متستغربيش من كلامى استنى افهمينى اقصد ايه
1-تجديد النيه والتوكل على الله بمعنى ان يكون العمل خالص لوجه الله يعنى بخس علشان ربنا سبحانه وتعالى اعطانى نعمة لازم احافظ عليها وعلشان اعرف اسجد لله فى صلاتى وعلشان اقوم بواجباتى تجاه اسرتى كما امرنى ربى عز وجل
2- الصحبة الصالحة اى التى تعيننى على هذا العمل وتشجعنى وتاخذ بيدى بمنافسه جميله وتعاون
علشان كده كتبت موضوعى بعد تفكير واخذ خبرات سوء من الدكاتره او من على النت
والحمد لله توصلت للاتى

[IMG]الرجيمالمثالي له تلات قواعد و ست نصائح مهمة جدا نفذتيهم يبقي ان شاء الله حتخسي و تفرحي و تستعيدي رشاقتك تاني

الثلاث قواعد:
1- لازم الرجيم يحتوي علي كل العناصر الغذائية بمعني 50% برتينات و 35 % نشويات و 15% دهون
ليه بقة؟ علشان الجسم بيحتاج العناصر مثلا نسبة الدهون دي علشان يمتص مجموعة من الفيتامينات المهمة جدا للجسم و هي فيتامين الف و دال و كاف و هاء فاذا عملت نفسك فالحة و منعت نسبة الدهون دي فان جسمك مش حيمتص الفيتامينات دي فيضعف و تبدأي تعيي و تتعبي و نفس الشئ بالنسبة للنشويات فلازم الالتزام بالمكتوب في الوجبة تمام.

2- التخفيف من الابيضين الاول السكر لانه طبعا سعرات حرارة التاني هو الملح لانه بيخزن الماء في الجسم فيزيد الوزن بدون داعي
3- شرب الماء ثم شرب الماء ثم شرب الماء حيث تشربين 2كوب ماء كبير قبل الاكل دائما ده غير الماء في الاوقات العادية بحيث اجمالي الماء المشروب في اليوم يكون من 2 الي 3 لتر ماء علي الاقل لان الماء يزيد من التمثيل الغذائي للجسم او بالبلدي يزيد نسبة حرق السعرات في الجسم.
الست نصائح:
1-الابتعاد عن كلمة التخسيس السريع لجسمك كوني رحيمة بنفسك علشان متزهقيش و تكتئبي من الحرمان و تسيبي الرجيم و ترجعي اكتر مما كنتي لانك لو فقدت 2 كيلو في الاسبوع و مرجعتهمش تاني احسن من لما تخسي 5 كيلو في الاسبوع و ترجعيهم بعد كده 10 كيلو.
2-متجربيش اي رجيم غير مدروس زي الرجيم الكيميائي و رجيم عديم الدهون و رجيم عديم النشويات لان الانواع دي من الرجيمات بتستخدم مع ناس ليها ظروف جسدية معينة مش موجودة فيكي اما رجيمنا ده مثالي واخد الامور باعتداااال شديد.3-لا تقلللي من شان الخلية الدهنية الموجودة في جسمك و تكرهيها لانها مهمة زيها زي الخلايا العصبية تمام كل اللي بنعملة اننا بنشيل الزيادة منها بس و نخاللي النسبة المفيدة علشان يكون عندك طاقة تقدري تحرقيها في حركتك اليومية و متحسيش بالخمدان او الخمول بل تكوني رشيقة و حيوية.4-يوم الراحة من الرجيم مهم جدا متقوليش انا مش حاخد راحة لان الجسم بطبيعتة ذكي و لما يعرف انه ماشي علي نظام غذائي قليل يعمل خط دفاعي لنفسه و يبدا يخزن كل الطعام اللي داخله علشان يعوض النقص فتزيدي بدل ما تخسي لكن يوم لراحة حيلخبطه و يخليه مرتبك و يبدأ يحرق اكتر علشان يهضم الطعام الجديد اللي داخله و بعدين لما نرجع لنظامنا يتلخبط تاني و يبدا يحرق بمعدلات مختلفة و هكذا دوالييك
5-مهم جدا جدا تثبيت الميزان لا ميزان عن ميزان يفرق وثبتي كمان الوقت اللي بتوزني فيه نفسك مش كل شوية توزني نفسك و تقوللي ايه ده انا مخستش؟ و يحصلك احباط و اكتئاب و ان الرجيم مش نافع ؟ لألألألألألألألألألألألأ
لازم تدي الجسم فرصة انه ينزل في الوزن في الوقت المحدد له
مثلا حددي كل يوم سبت الصبح قبل الافطار انك تقيسي نفسك و تأيدي الوزن في جدولك و تشيلي الميزان من قدام عنيكي خالص لباقي الاسبوع لحد السبت القادم و قيسي و افرحي بالنتيجة.
6- ممارسة اي نوع من الرياضة و يفضل المشي علي الاقل نصف ساعة يوميا لان الحركة بتنشط الدورة الدموية فبتزيد من حرق الدهون في الجسم و التمثيل الغذائى السليم
ملحوظه مهمه جدا
كل كيلو بتشليه من وزنك = 4 كيلو اتشالوا من الحمل علي العمود الفقري و المفاصل
فلو خسيتي 5 كيلو مثلا = 20 كيلو اتشالوا من علي عمودك الفقري و مفاصل

المشروب السحري الحارق:
الوصفة دي مكونة من اعشاب مشهورة جدا كل اللي بتعملة انها بتزود نسبة الحرق للمواد الغذائية سواء اللي داخلة او موجودة فعلا في الجسم بنسبة كبيرة جدا فتخسي بيها مع الرجيم كويس جدا جدا ده غير انا بتسد النفس جدا جدا.
الوصفة تشرب قبل الوجبات الثلاثة ب نصف ساعة و حتي قبل الاكل علي طول وهى تساعد جامد وانا مجرباها

ملعقة قرفة + 2 ملعقة زنجبيل + 2 ملعقة شاي الاخضر + 2 ملعقة نعناع + 2 ملعقة كمون

و تضعي المكونات دي في 3مجات مياه كبيرة و تغليهم علي النار يادوب دقيقتين و تطفي و تغطيها علشان الزيوت الطيارة متروحش منها و بعد ساعة صفيها في برطمان زجاجي و بكده يكون عندك 3 كوبيات بتوع النهاردة جاهزين للشرب قبل كل واجبة.]

نتكلم بقه على الرجيم متنسوش الى اتفقنا عليه تجديد النيه والتوكل على الله والصحبه الصالحة
بسم الله توكلت على الله اللهم اعنا على انفسنا

ليكي 2 ملعقة سكر في اليوم وزعيهم زي ما انت عايزة علي اليوم

الافطار :
1-شرب المشروب السحري الحارق قبل الافطار ب نصف ساعة
2-شرب 1 او 2 كوب ماء كبير قبل الاكل مباشرة (و ليس بعده او اثناءه ابدا)
3-اختاري حاجة واحدة من(1 بيضة مسلوقة او 3 ملاعق فول بدون زيت او قطعة جبنة قريش او قطعة جبنه نستو او قطعة طعمية واحدة)
4-نصف رغيف عيش بلدي (ثابت معايا في الفطار)5-كوب شاي اخضر

(لازم تختاري حاجة من كل خطوة من الاربع يعني مثلا فطارك النهردة حيكون:
شرب المشروب الحارق+الماء+بيضة مسلوقة+نصف رغيف العيش+كوب شاي بدون سكر)

الغداء:
1-شرب المشروب السحري الحارق قبل الغداء ب نصف ساعة.
2-شرب 1 او 2 كوب ماء كبير قبل الاكل مباشرة (و ليس بعده او اثناءه ابدا)
3-اختاري واحد مما يلي:
2 قطعة لحم مشوية او مسلوقة او ربع فرخة مشوية او مسلوقة او 2 سمكة مشوية او علبة تونة مصفاة من الزيت تماما او التونة اللي في محلول ملحي مصفاة بردو او 2 بيضة مسلوقة)
4-اختاري واحد مما يلي:
نصف رغيف عيش بلدي او 5 ملاعق ارز مسلوق او 5 ملاعق مكرونة مسلوقة مغسولة كويس
5-طبق سلطة كبييير علشان تشبعي و اختاري من الاتي زي ما انت عايزة مش شرط كل المكونات دي(طماطم- بقدونس- شبت – كرفس -فلفل رومي- بنجر – جزر – خيار- خس).
6-طبق خضار (مش لازم ني في ني علشان متزهقيش ممكن خضار عادي من المطبوخ في البيت) لكن ابعدي عن الخضار اللي فية بطاطس او فاصوليا بيضاء لانهم مشبعين نشويات.
بعد الغذاء ب4ساعات ممكن اخد
ثمرة فاكهة و الفاكهة المسموح بها هي:
برتقال – تفاح – يوسفي – بطيخ – جوافة – خوخ – 5 فرولات – 3 مشمش

(لازم تختاري حاجة من كل خطوة من الست يعني مثلا غداك النهاردة حيكون:
شرب المشروب الحارق+الماء+ربع فرخة مشوية+5 ملاعق ارز مسلوق+طبق السلطة الكبير+ طبق خضار صغير كوسة)

العشاء:
هام جدا جدا انه يكون قبل النوم بساعتين علي الاقل علشان يلحق يتهضم مايتخزنش في الجسم

1-شرب المشروب السحري الحارق قبل العشاء ب نصف ساعة.
2-شرب 1 او 2 كوب ماء كبير قبل الاكل مباشرة (و ليس بعده او اثناءه ابدا)
3-اختاري واحد مما يلي:
* كوب زبادي + (خيار + طماطم او فاكهه من المسموح بها
* قطعة جبن قريش + (خيار + خس +طماطم بالمعلقه
*طبق فاكهه كبير او طبق خضار كبير او شوربة خضار او بطاطس مسلوقه

(لازم تختاري حاجة من كل خطوة من الثلاثة يعني مثلا عشاك النهاردة حيكون:
شرب المشروب الحارق+الماء+ قطعة جبن قريش+خيار وطماطم وخس

ده كده الرجيم لو عجبكم الموضوع شجعونى وياله مع بعض نتوكل على الله ثم نكون الصحبة الصالحة منتظره مشاركتكم علشان اكمل واقولكم هنبدا امته وازى هنفذ الرجيم ده بكل قوة
ياريت متحرمونيش من التقيم احبكم فى الله

ريحانة3 ريحانة3 209789_16.gif سوبر فتكات Fatakat 209789 المنصورة – مصر

سبحان الله و بحمده