السلام عليكم يافتوكات
ده أول موضوع ليا هنا في المدونة الجميل ده
هقولكم على طريقة النجرسكو المعروفة بس فيها شوية اضافات بسيطة
لسة عاملاها أول امبارح وكانت تحفففففففة
الطريقة تكفي اتنين
أولا خلطة الفراخ
بجيب نص الفرخة الي فوق يعني الصدور بالعضم بتاعها والأجنحة وأغسلها كويس بالدقيق والليمون لغاية ما أشمها مالاقيش فيها ريحة زفارة خااااااااااالص
أتبلها ببهارات فراخ عادية من عند العطار وأسيبها شوية صغيرين في التتبيله … ( أحيانا بضيف على البهارات دي شوية كاري صغيرين أوي )
وبعد ما أسيبها شوية في التتبيلة أسويها مع بصل كتير متقطع صغير ( زي مابتحطي للحمة المفرومة ) و2 أو 3 فلفل أخضر متقطع صغير و قطعتين صغيرين زنجبيل واتنين حبهان وعودين قرفة ( كله يتحط في نفس الوقت)
ملحوظة ……. الزنجبيل مش مطحون ولا ناشف .. لا ده زنجبيل زي البطاطس بالظبط بيتباع في السوبرماركتات الكبيرة .. تقطعي منه قطعتين قد الجنيه المعدن كده
ملحوظة تانية ….. القرفة برضه مش مطحونة .. انما عيدان
ملحوظة تالتة ….. وأنا بسوي الفراخ بحافظ على المية بارتفاع تقريبا 2 سم … مابخليهاش تقل عشان البصل لونه وطعمه مايتغيروش يهمني انه يبقى زي المسلوق … ولا بزود المية على الفراخ علشان ماتبقاش زي المسلوقة
بعد مالفراخ تستوي باطلعها لوحدها وأسيب خلطتها في الحلة وأقطعها بايدي حتت صغيرة أد حتت الشاورما كده وأرجعها تاني للحلة وأضيف شوية بهارات فراخ تاني وشوية مية وأسيبها شوية على النار لغاية ما تنشف بس مش أوي .. بسيب شوية مية فيها
وبعدين بطلع حتت الزنجبيل والحبهان والقرفة من الحلة وبرميهم
وبكده حشوة النجرسكو جاهزة
نيجي للباقي بقى
بسلق المكرونة عادي .. أي نوع مش شرط اسباجيتي .. بس أنا بفضل أصغر حجم
وبعمل البشاميل برضه عادي .. شوية سمنة وكوباية دقيق وخمس كوبايات لبن …… وممكن 3 لبن واتنين شوربة براحتك .. وطبعا ملح وفلفل
وخلي البشاميل سااااااايح .. يعني ماتسيبيهوش على النار كتير .. أول مايبتدي يلف اطفي عليه على طول
نيجي لرص الصنية
برص الأول مكرونة مخلوطة بشوية بشاميل
وبعدين طبقة الفراخ
وبعدين مكرونة تاني مخلوطة بشوية بشاميل
وبعدين طبقة بشاميل
وآخر حاجة على الوش شوية كريمة طهي عشان تحمر الوش وتدي طعم حلو … سيبك من البيض خاااالص
ملحوظة …. كريمة الطهي بتتباع في السوبرماركتات الكبيرة باسمها كده .. وبتبقى في علب زي علب العصير كده في ركن الألبان
وبس
بالهنا والشفا
مواضيع هذا القسم برعاية
يقيـــ بالله ـــني يقيـــ بالله ـــني فتكات حبوبة Fatakat 41344 مصـر – مصر