السلام عليكم ورحمة الله
حبايبى الفتوكات ربنا يرزق كل مشتاقه للحمل عاجلا وغير اجلا يارب
ويقوم كل حامل بالسلامه هيا والنونو يارب
زى ما اتعلمت منكم حاجات كتير اوى جيت افيدكم بتجربتى الشخصيه
عشان كل كلمه تبقى متجربه وعلى مسؤليتى
هدخل فى الموضوع على طول
طبعا بعد الجزء الاول الى من الموضوع وهوا عن النفاس بعد الولاده
ودا جزء مهم لازم تقريه برضو واللينك بتاعه اهو
https://forums.fatakat.com/showthread…#post123553975
قررت انهرده وابنى عبد الله هيتم شهرين بكرا بأمر الله
اقولكم خلاصة تجربتى فى الشهرين دول
خصوصا انى أم لاول مره ومعنديش حد يوجههنى ولا كان يعرفنى
اعمل ايه مامتى ربنا يخليهالى ويشفيها يارب كل ما كنت أسئلها تقولى نسييييت
********************
المهم هبدأ معاكم وهنتكلم عن خطوه خطوه بالمختصر الى تستفيدو منه بأمر الله
طبعا بالنسبالى انا ولدت قيصرى لانى عندى فتق سرى كان لازم اولد قيصرى
حضرت شنطة المستشفى وهقول عباره عن ايه فى اول رد
بعد الموضوع عشان متزهقوش بسرعه
دخلت غرفة العمليات برجلى واخدت بنج كلى والحمد لله
صحيت لائتنى ولدت خلاص وابنى مع ماماتى وفوقت وانا فى غرفتى فى المستشفى
كان لازم اطلع ريح او اعمل حمام عشان اخرج واروح البيت والحمد لله ربنا كرمنى
وطلعت ريح طبعا مش هحكيلكم عن الوجع بعد ما البنج بيروح
بس دى سنة الحياه وضريبة كلمة ماما
كل شئ جوه بطنى مش فى مكانه حسه بوجع جامد وباخد مسكنات
وبرضو فى وجع واخدت روشتة المستشفى وروحت انا وابنى الحمد لله
****************
كل الوجع الى انا فيه دا كله مش مهم قد ما الوجع الكبير انى مش عارفه
اتعامل مع ابنى دا وجع قلبى
عشان كدا قلت لازم لازم اقولكم عشان تعملو حساب كل حاجه
وتخلو بالكم
***************
طبعا المفروض ان احتياجت البيبى انه
يرضع ويغير
ويتنضف على السره
ولو فى حاجه تعباه ياخدلها دوا
وأساسى معاكى دوا الغازات يوميا والمغص برضو
وهما ماء نونو او اكوافيرا للغازات 2سم 3مرات فى اليوم
وسيمثيكون دا للمغص اساسى معاكى 2 سم مرتين فى اليوم
طبعا كان المفروض ارضع ابنى من وانا فى المستشفى
احساس غريب وانا بطلع صدرى بديهوله ومش عارفه امسكه من التعب
وهوا مش عارف ولا فاهم ولا شايف حاجه محتاج مساعده اكتر منى
للاسف اول مشكله قابلتنى هيا الرضاعه مش عشان كنت تعبانه
لاء عشان مكنتش بعمل تمارين الحلمه
معنديش حلمه نهائى كل ما اديله صدرى مش عارف يمسكه
اول يوم اخد جلوكوز بالسرنجه من غير سن طبعا
وفضلت تلت ايام بعانى معاه مش عارفه ارضعه وباعمل تمارين الحلمه
وتتشقق وتتعور وبرضو ميعرفش يمسكها وهوا مات من الجوع طبعا
ومعملش حمام عشان مفيش حاجه نزلت بطنه تزق الى فى بطنه
كان هيجيلى انهيار عصبى من كتر عياطه وانى مش عارفه اتعامل معاه
وهوا جعان ومش عنده صبر يمص الحلمه ويطلعها وحده وحده
كنت بديله اعشاب بيبى كالم فى ببرونه صغيره 40 سم
دى اعشاب عباره عن كراويه وينسون باكتات بيتحط عليها ميه مغليه
وتتساب لحد ما تبئى زى دمعة العين ويشربها
فضلت ادور على حل لحد ما لئيت الحل بتاع الحلمه الصناعى
ودا الموضوع بتاعه
https://fatakat.univanet.com/#4265021
طبعا كان قدامى حلول كتير وافتكاسات من جيرانى واصحابى
وكل الى عنده حاجه يتصل يقولى اعملى كدا ويجرب فيها
فكان قدامى يئما اوديه لدكتور يكتبله لبن صناعى
وانسى الرضاعه الطبيعيه بكل فوايدها واهميتها
او اصبر وارضعه بالحلمه دى لحد ما كتر ما بيشفط منها يطلعلى حلمه
واقدر ارضعه من غيرها
فقررت اصبر واخد الحل الصعب طبعا
لان لازم تكون الحلمه الصناعيه نضيفه كل مره ومغسوله بميه سخنه
فجبت 2 مع بعض والانواع فى الموضوع الى فوق
وبئيت احاول اخليه يمص منها طبعا هيا بتلزق على الحلمه لما هوا بيشفط
منها كبس هوا يعنى
والحلمه بتوجعنى جدا جدا عشان اول مره لازم طبعا هتوجع
لحد ما يشفط اسبوع متواصل خلاص هتخف وتطلع بأمر الله
لان كان المفروض اعمل تمريناتها قبل الولاده مكنش هيحصل كل دا
وكمان منزلش مية السرسوب الا بشفاط اللبن دا اساسى معاكى
هوا الى بأمر الله بيساعد على نزول اللبن فى الاول كدا وبيساعد فى تطليع الحلمه
**************
المهم اول ما ابتدى ينزل مية السرسوب دى كان هوا جاع جدا
ومش مكفياه وكمان كانت الصفرا نزلتله ولائيته وشه وعينه بتصفر واحده واحده
لحد ما على اليوم الرابع بقى زى اللمونه وكل دا وهوا لسه جعان
كان قلبى بيتقطع وبندم لما كنت بشوفه بيعيط جامد ويتلوى من الجوع
انى معملتش التمارين دى
المهم
مشكلة الصفرا طبعا بعد بحث عن الحل وكل الناس قالت الكلام المعتاد
حطيه تحت لمبه بيضا
مسمعتش كلام حد ورحت مستشفى تبارك قيستله الصفرا
وخليت الدكتور قاسله الصفرا بجهاز ضوئى كدا متخافيش مش بياخدو دم
ودى خطوه مهمه متستكفيش انك تحطى طفلك تحت لمبه
لازم توديه يقيس الصفرا فى تبارك لان الصفرا انواع ولازم تتلحق من الاول
لو هيا مش من النوع العادى
لان حتى النوع العادى خطر انه يفضل كتير بيها بيأثر على المخ ويجيب تخلف عقلى
اجارنا الله ومتزعليش منى فى الفاظى وتقولى يساتر يارب
والله يا حبيبتى انا بعرفك خطورتها عشان متستهونيش لانى
بحبك ومش عوزه قلب ام يتوجع على ابنها ربنا الى عالم
*********************
طبعا الدكتور قالى اهم شئ لعلاج الصفرا الرضاعه عشان يشبع و
ويتبرز وتنزل فى البراز
وطبعا انا لسه مبرضعش كويس ومنزليش لبن
فأضطر انه يكتبله لبن صناعى ومكنش قدامى حل تانى
قالى 4 مرات فى اليوم بعد الرضاعه بساعه عشان يشبع والصفرا تنزل
وكتبلى بيبى فيت فيتامين يساعد على نزول الصفرا
وراحت الصفرا الحمد لله
وابتدى يرضع واللبن ابتدى ينزل الحمد لله
************
قابلتنى تالت مشكله
وهيا السره كان لازم 3 مرات فى اليوم احطله سبرتو عليها
وانا كنت فى التوهان
فبئيت اهتم واحط ووقعت اليوم العاشر الحمد لله كان المفروض تقع على السبوع
******************
رابع مشكله الخنفره ومناخيره مسدوده
وديته لدكتور اليوم التامن
لانى كنت ملاحظه صعوبه فى البلع وانسداد فى المناخير
كتبله قطرا للبلع مزيبه للبلغم اسمها امبرسكول
وقطره للانف اسمها اتروفين بيبى سالين
وقالى اوقفى بيبى فيت عشان غلط على الكبد
كانت الصفرا راحت على اليوم العاشر الحمد لله
وبرضو مشكلة الخنفره وانسداد المناخير ومش مقتنعه
بكلام اى دكتور عشان صوت مناخيره عالى ومش بيعرف ياخد نفسه
من مناخيره وهوا بيرضع وروحت لدكتورتانى وكتبلى بخاخ مية بحر
احطهوله 3 مرات فى اليوم واتحسن عليه الحمد لله
*********************
وقابلتنى مشكلة الحزق ابنى قعد يحزق كتير جدا كل
شويه ومش عارفه ليه
رحت لدكتور تانى قالى معملش حمام بقاله قد ايه كان بقاله تلت ايام
خلى بالك من الموضوع دا كويس جدا لانه خطير جدا جدا
ولاقدر الله ممكن يعمل تسمم لو اتحبس البول او البراز
مينفعش يعدى يومين من غير ما يعمل حمام براز او يوم من غير ما يعمل بول
كتير
وطبعا الدكتور كتبلى لبوس جلسرين قالى اديله نص لبوسه
كل ما يحتاج لو قعد يومين ميعملش ولاحسن طبعا الاعشاب والسوايل
ليه كتير مع الرضاعه
****************
بعدها مشكلة الطهاره وديته يطاهر وهوا عنده 45 يوم للاسف الدكتور
مسك العضو بتاعه بالمشبك جامد زياده عن اللزوم من تحت عشان يطلع الجلده
دى فقطع المشبك الجلده من تحت كلها
فبئت الجلده مقطوعه من فوق ومن تحت ومرهونه على شعره
وعماله تطلع حاجات صفرا ووجعاه طبعا ووديته لدكتور
تانى وعملى تركيبه تنشف الجرح لانى كنت هرياه مضاد حيوى
كريم ودا غلط لازم الجرح ينشف ودا الى لسه مخفش منه ادعوله بئا
**************
بأختصار
المشاكل الى قابلتنى وحلولها
اولا الرضاعه لازم تعملى تمارين الحلمه قبل ما تولدى بشهر وتصبرى جدا مع طفلك
لحد مايرضع طبيعى ولان الحلمه بتبقى صوغيره جدا ميعرفش يمسكها
لازم تدخلى حته من الهاله الى فوق الحلمه مع الحلمه عشان يقدر
يمسك صدرك واصبرى مره على مره هتطلع ان شاء الله
وطبعا الحلمه هتتعور وتتشقق مع الشفط منها دا لازم والحل
انك تحطى كريم مرطب عليها كرباميد اوبانسينول
حطى على ناحيه ورضعى من السليمه وبدلى بينهم
ولازم قبل الرضاعه تغسيلها بالميه والصابون وتشطفيها كويس
********************
تانى مشكله الصفرا لازم يروح يقيسها والدكتور يطمنك انها من النوع العادى
عشان لو نسبتها زات عن الطبيعى لازم علاج فورى عشان متضطريش
تدخليه حضانه وتبئى على اعصابك متسمعيش كلام حد وتسيبيه تحت لمبه وخلاص
********************
تالت مشكله السره لازم تلت مرات فى اليوم او زى ما الدكتور كاتبلك فى روشتة
المستشفى تبخى سبرتو عليها وقبل ما تبخى حطى منديل ورق حواليها
من تحت على الجلد
عشان ميجيش سبرتو على الجلد ويلسعه ويحرقه لاقدر الله
********************
رابع مشكله الامساك لازم ميعديش يومين الا لما يعمل حمام براز
ولازم يعمل بول كتير كل يوم
والى هيخليه كدا انك تشربيه سوايل كتير وتشربى أنتى سوايل كتير
لانك جسمك هينشف من الرضاعه فهيجيلك امساك فبالتالى هوا
كمان هيجيله لان اى حاجه عند الام بتتنقل للطفل وداكلام كل الدكاتره
اشربى سوايل وميه كتييييييير جدا جدا
وهوا شربيه كروايه عاديه مش محمصه
المحمصه لو عنده اسهال تمسك بطنه وينسون او بيبى كالم او بيبى درينك
ولو معملش لمدة يومين يبئا برضو لازم لبوسة جلسرين
****************
مشكلة الخنفره وصعوبة البلع
بالنسبه لانسداد الانف والخنفره قطرة الاتروفين بيبى سالين
تلت مرات فى اليوم بتنيمى الطفل على جمبه
وتحطى فى الناحيه الى فوق وتنيميه على جمبه التانى وتحطى فى الناحيه التانيه
ولما يعطس تشفطى بشفط الانف عشان لو فى اعزكم الله
اى وساخه تخرج فى الشفاط اوطلعيها بسلاك الودان بس خليكى حزره
جدا عشان حركات البيبى المفاجئه
*******************
وبالنسبه لصعوبة البلع مقدرش اقولك تديله
الى استعملته لابنى لان لازم دكتور يشوفه ويعرف ايه السبب
فى صعوبة البلع وهوا يفيدك اكتر عشان ممكن يكون فى بلغم على الصدر
ولازم يكتبله شفط عدد مرات معين قبل ما يعمل حساسيه على الصدر
لاقدر الله لازم تخلى بالك ومتستهونيش وتتابعى طفلك بعينك وبودنك
ولو حسيتى ان فى حاجه غريبه متسكتيش وتسمعى كلام الناس وخلاص
*******************
لازم تحطى قطرة العين بأنتظام تلت مرات فى اليوم من بعد الولاده
ولمدة اسبوع بس القطره مدتها اسبوع فقط
************
لازم يبئا عندك كريم تسلخات وتحطى كل يوم مره قبل النوم
وتلبسى بامبرز نضيف انا بستعمل كريم زنك اوليفيا ممتااااااااااز
******************
لازم تبعتى حد يسأل فى الصحه الى قريبه منك تانى يوم ماتولدى عن مواعيد
تحاليل الغده الدرقيه لانها بتتعمل فى اول اسبوع للبيبى
من اليوم التالت للسابع من الولاده
مينفعش بعد كدا وبتبئا يومين فى الاسبوع فى الصحه
فلازم تسالى عشان تلحقى يوم منهم قبل ما يعدى اسبوع
ابعتى حد يسأل من غير البيبى الاول عشان مينزلش ويطلع كتير
*****************
مطعميهوش برا الصحه ابدا ابدا حتى لو نفس الناس لابسين نفس الملابس
خليكى فى المضمون
ووانتى فى الصحه اسألى فى تطعيمات تانيه بالمره اوفى يوم تانى اعرفى المواعيد
وكدا كدا وانتى بتسجليه هتاخدى كراسه وفيها متابة التطعيم
*****************
لازم ادوية الغازات والمغص والبيبى كالم معاكى تشتريهم مع
شنطة المستشفى
دوا الغازات ماء نونو او اكوافيرا 2 سم تلت مرات فى اليوم
وسيموثكون للمغص 2سم مرتين فى اليوم وبتدى بقطاره او بسرنجه
من غير سن وتكونى حزره من حركاته المفاجئه ويكون على جمبه
اوواقف فى حضنك وانتى بتديله الدوا اوعى تديه وهوا نايم على ضهره
يشرق لاقدر الله تخيلى انتى ياكبيره لو شربتى وانتى نايمه
هيحصلك ايه مبالك هوا لسه معندوش تحكم يعرف فى نفسه
واعشاب بيبى كالم وانا بفضله عن بيبى درينك عشان مفهوش سكر
لان السكر بيوجع بطن النونو وتديله مرتين فى اليوم
ولازم تكون دافيه زى دمعة العين لوبردت دفيها
عشان يعمل حمام وهوا مرتاج وبطنه تبئا هاديه
واوعى تديهاله سخنه تعمله التهاب فى زوره وفى حلق بؤه
ولسانه
لازم لازم البيبى يتشجأ او يتكرع بعد اى رضعه منك او اعشاب
عشان الغازات دى لومخرجتش بتخليه مش عارف ينام
وممكن كمان يعد يعيط وانتى مش عارفه ليه
*************
ولازم تنيميه على جمبه لوهتنامى ويبئا وشه فى وشك
عشان تشوفى لو شرق لاقدر الله اوعى اوعى ترضعيه وتنيميه على ضهره
وتسيبيه مش قدامك حتى لو اتكرع متضمنيش
وحتى لو هتطبخى هاتى ترابيزه صوغيره وحطيه قدامك فى مكان بعيد عن البوتجاز
والروايح اوعى تسيبيه فى اوضة النوم لوحده مش قدام عينك
وتعتمدى على انه لو صحى هتسمعى صوته
انا ابنى دخلت اخد دوش وخرجت لقيته فى اخر نفس رجع وفضل يشفط
تانى لانه مش عارف ياخد نفسه ونايم على ضهره كمان ولحقته على اخر
نفس الحمد لله قلبته وفضلت اخبط على ضهره لحد ما خد نفسه
وروحى رجعتلى تانى
عشان كدا بقولك متسمعيش كلام اااااااااااى حد دا ضناكى
واغلى حاجه عندك متستهونيش وكدا كدا الشهور الى فيها شدة الاعصاب
بسيطه وبعد كدا مجرد مايبئا قادر يقوم يعد لوحده مش هتخافى يشرق
وميعرفش يتحرك يمين ولا شمال ولا يقوم على الاقل هيعرف يتقلب على جمبه
وينزل الى فبوقه لو شرقك وأسفه لو كلامى صعب
*******************
لو هتجيبله سكاته الى هاتى الى فيها مشبك بيقفل على
البزازه لما تقع من بؤه هيا حوالى ب 14 ج
وخلى بالك تغسليها كويس اوى اول مره
ولما تيجى تشيليها من بؤه متشيدهاش احسن البلستكه تطلع فى بؤه
ويبلعها ويشرق لاقدر الله وعينك عليه طول ما هيا فى بؤه
*****************
متسيبيش ابطفلك لاى حد خالص مهما ان كان
مش هيخلى باله زيك وربنا مع الامهات الى بتشتغل وتسيب
اطفالهم فى الحضانه ربنا يحفظهم يارب
وخلى بالك لو رحتى بطفلك عند حد عنده اطفال من حركاتهم
المفجأه مع طفلك عشان راسه لسه طريه
**************
اتأكدى ان البطانيه بعيده عن وشه لو سبتيه فى اى حته
مع اننا اتفقنا انك مش هتسيبيه بعيد عن عينك
برضو قدامك او مش قدامك تبقى البطانه بعيده عن وشه تماما
عشان متجيش على وشه وهوا بيحرك ايده وميعرفش يتنفس
**************
فى الحر او الصيف شربيه ميه بالببرونه او السرنجه كتير عشان
يقدر يعمل حمام وأكيد هيبئا عطشان زيك
*************
دى كدا الحاجات الى عدت عليا فى الشهرين دول
وهبئا معاكم اول بأول كل ما اجمع شوية معلومات
وطبعا لو عندك اى معلومه زياده حطيها فى الموضوع
وادينا بنتعلم من بعض
استنونى الموضوع الجاى على طول هقول تجربتى
فى ازى خليت الاماكن الغامقه تروح من جسمى وخصوصا
بعد كلف الحمل
هحط اللينك بتاعه فى تانى رد بعد ما اعمله ان شاء الله
وفى النهايه متخرجيش قبل ما تقيمى وتدعى لابنى عبدالله
ربنا يشفيه ويحفظه
وأمانه تدعو لفتوكتين معانا هنا وحده اسمها اميره والتانيه اسمها منى
ربنا يثبت حملهم ويرزقهم الى يتمنوه ويكملهم على خير
وادعو لكل مشتاقه ربنا يرزقها عاجلا وغير اجلا
واى استفسار انا تحت امركم على العام او الخاص
لؤلؤه المصريا لؤلؤه المصريا 26290_7.gif فتكات ست الكل Fatakat 26290 فيصل – مصر