السلام عليكم ورحمة الله وبركاته ازيكم يافتوكاتى ياقمرات وصفتى النهاردة هى فراخ بالتمر الهندى الصراحة جربتها وطلع طعمها تحفففففة والله مش هطول عليكوا نبتدى بسم الله
فراخ بالتمر الهندى
——————-
فراخ
2 بصلة
تمر هندى مغلى لمدة 10 دقائق
ملح
فلفل
بهارات فراخ
جوزة الطيب
ورق لورى مطحون
سماق
كراوية مطحونة
كمون
مكعب زبدة
جنزبيل
قرفة
كزبرة ناشفة
الطريقة: نغسل الفراخ وندعكها بالليمون كويس اوى بعد كدة ننغزها بالسكينة بالعرض ونجيب فرشة وندهنها بمغلى التمر الهندى.
– نبشر البصلة وناخد المية بتاعتها على جنب ونخلط البهارات فى طبق لوحده.
– نقسم البهارات نصين نصف هنضيفه على مية البصل والنص التانى على البصلة نفسها، ندعك الفراخ بمية البصل المضاف ليها البهارات ونديها صدمة على النار بمكعب الزبدة بعد كدة نحطها فى صينية ونحشيها بالبصل المضاف ليه باقى البهارات (نحشيها من تحت الجلد ) بعد كدة نضيف باقى التمر الهندى فى الصينية وممكن نزوده حبة مية وعلى النار لحد ماتتشرب وتستوى معانا بعد كدة فى الفرن وبالهنا والشفا.
على فكرة طعم التمر الهندى مش باين اوى كل اللى هتحسوه اللذعة بتاعته وبجد جميل جدا دة غير بيدى لون جميل للفرخة.
اتمنى تكون وصفتى عجبتكو .
مواضيع هذا القسم برعاية
رورو مرشدى رورو مرشدى فتكات جديدة Fatakat 1209683 الاسكندرية عروس البحر الابيض المتوسط – مصر