العدد اكتر من منابات الفراخ عندك ؟ طب تعملي اييييييييه؟

السلام عليكم
طبعا فيه افكار كتير بس دا اللي حاضر في ذهني دلوقتي
فيه مننا لما تلاقي جالها ضيوف كدا من غير ترتيب بتعمل بانيه وتخللص نفسها علشان يقضي , بس فرضا انا عندي فرخة على بعضها؟ اعمل ايه؟
يعني لو بقت منابات مش ممكن تقضي والاوراك مش هتسعف
يبقى قدامي حللين : فراخ نجرسكو ,او فتة شاورما
1- النجرسكو :اليوم دا بيبقى سعيد بالنسبة ليا لاني باقدر اوفر فيه مناب احنا اربع افراد ويوم ما اعمل النجرسكو باحوش نص الصدر للبانيه واهو مصلحة , يعني بدل الفرخة ما تبقى على يوم لا يبقى 3 ارباعها بس
باسلق الفرخة عادي واشيل الجلد وافصصها حتت شبه المكرونة الاقلام بتاعة البشاميل كدا , باسلق المكرونة الاقلام من غير زيت طبعا, باعمل بشاميل بس مش كتير , باقلب المكرونة على الفراخ الاول واوزعهم حلو وبتبقى ماشاء الله فيها كتير
وبعدين اصب البشاميل والخبطه معاهم , بارش مودزاريللا ع الوش ومعا جبنة رومي وعليهم بقى فلفل رومي مقطع وزيتون اسود مقطع وفي الفرن تاخد وش بس وجمبها بقى كاتشاب وهوت صوص , وطبعا ولادك هياكلوها علشان خاطر عيون الكاتشاب وطعمها ممتاز والله يا حبايب
2- الشاورما الفراخ تتقطع صغيرة بعد ما تتخلي من العظم وملح فلفل ليمون زبادي وتركنيها , اعملي الارز الابيض وصلصلة الفتة عادي , ارجعي للفراخ وشوحي البصل خفيف ونزلي الفراخ واطفيها بخل لما تشرب ميتها ومعلقة صلصة فتة وبالهنا والشفا
ملحوظة : علشان تسهلي على نفسم هاتي زيتون مخلي مقطع جاهز او تخبطي على الزيتونة بالسكينة وهيا نايمة علشان يتفدغ زى التوم كدا وهتلاقي البذرة طلعت سهل اوي
اتمنى اكون افدتكم , صلوا على النبي وآله وصحبه وسلم وقولوا لا اله الا الله
يقول الشيطان اتعب ابن آدم بالمعاصي ويتعبني بالاستغفار ولا اله الا الله
مواضيع هذا القسم برعاية

EGY20152015 EGY20152015 سوبر فتكات Fatakat 888849 الرياض – السعودية

سبحان الله و بحمده