السلام عليكم ورحمة الله وبركاته..
ازيكوا يا فتوكات انا اول مره اكتب في القسم ده ويارب مشاركتي تعجبكم::
بصوا بقى يابنات انا طول عمري مش بحب الرز الصياديه كنت حاساه حاجه كده كلها زيت في زيت وانا كنت سمبتيك يا اخوتشي وما ليش في الاكل الهاي كوليسترول ده ..المهم اتجوزت: الاول كنت بمشيها سلطات وطحينه مع السمك سواء مقلي ولا مشوي لكن أكتشفت اني زوجي العزيز بيحب النوع ده من الرز بالذات وطلب مني اعملهوله غتاته بقى ..
فقلت هعمله بس لازم اعمل فيه شوية تغيرات فافتكرت ان اختي كانت مره قالتلي ممكن نحط كام فص توم في نص الرز هيديله طعم وريحه حلوه فقلت اما اجربها فطلع حلو فقولت اما ازود شويه ورحت عملته بالطريقه الجايه دي.. كفايه رغي بقى ونيجي للطريقة
المكونات كانت عباره عن:
1-ارز مصري انا عملت كيلوا ونص ( مش بقولكم جوزي بيحبه)
2- اربع بصلات حجم كبير
3- راس توم كامله مطحونه مع شوية ملح
4- كمون وكسبره ناشفه ومطحونه
5- زيت وملح
6- شوية بابريكا ( فلفل احمر حلو) مطحون بيدي لون جميل للرز بس كانت خلصانه من عندي وعملت الرز من غيره المره دي
نيجي للطريقه الاول حمرت البصل كده
وطبعا لازم لونه يكون دهبي جدا بس بلاش تخلوه يتحرق الله يكرمكم لاني الاكل المحروق ضار جدا بالصحة لانه بيبقى عبارة عن مواد مؤكسده ودي الي بتجيب الامراض الخبيثة ربنا يحفظنا ويحفظكم ويحفظ جميع المسلمين منها يا رب
بعد ما البصل يتحمر نكون غسلنا الرز وصفيناه كويس من الميه ونضيفه على البصل
ونضيف عليه الثوم المطحون والكمون والكسبره دي الصور تباعا
ونقلبهم تقلبتين على النار ونكون مجهزين ميه سخنه ونضيفها على الارز بس نخلي بالنا عشان الميه ماتزدش مننا والرز يعجن يعني تكون الميه اعلى من مستوى الرز بسنتم واحد تقريبا والمعلومه دي للمبتدئات طبعا انا عارفه اني كلكم شطورات بس معانا هنا في القسم بنوتات لسه ما يعرفوش يطبخو الاول نسيب الرز بتاع تلات دقايق على نار عاليه بعد كده نوطي خاااااااااااااالص عشان يستوي براحته وهقولك ليه نسيبه الاول على نار عاليه وده عشان لو احنا واطينا النار من الاول الرز اولا هيطول جدا في السوا ثانيا ممكن جدا يعجن ونصيحه اخيره بلااااااااااااااااااش تفتحي الغطا خالص الا لما الرز يكون استوي لانه بيستوي على البخار الي طالع من الرز يعني استني عشر دقايق وافتحي الحله ..
وده الشكل النهائي ..
يلا بقى تعالوا اتفضلو معانا
والطعم يا بنات ماقولكمش امممممممممممممم تحفه
وبقيت بحب الرز الصياديه جدا وطبعا الوزن ضرب على الاخر هههههههه
السمك المره دي كنت جايباه مشوي جاهز والا مكنتش عزيته عليكم..
اوعوا ما تقيموش ازعل منكم..
مواضيع هذا القسم برعاية
أم عمر وفافاا أم عمر وفافاا فتكات متميزة Fatakat 1219810 مدينة الاحلام – بلاد الله