السلام عليكم
بصو يا جماعه انا عندى ارداف وكنت عاوزه اخسسهم شويه وروحت كشفت عند الدكتور بهاء ناجي طبعا عارفينه المهم مادنيش ولا رجيم ولا حاجه قالى اعمل ربط تنحيفي فانا اتخضيت قلت بس العوض على الله دى عمليه وكده وقعدت افكر وافكر وافكر وقالى الدكتوره اللى بتساعده فالعياده هاتعرفنى الطريقه والتمن وكده بقى
قلت خير يارب وفاجاه لقيت الربط التنحيفي اللى هوا كمان بيقول عليه فالتلفزيون حاجه سخيفه جدا وهاقولكم طريقته
اولا كانت الدكتوره بتدهنلى كريم للتخسيس بالطحالب البحريه انا مسكته ولا ليه اسم ولا حاجه هوا مكتوب عليه كده كريم للتخسيس بالطحالب البحريه مالوش صناعه ولا ماركه كانت بتدهنلى على اردافي لحد ركبتى من الجناب وقدام وورا طبعا ده كله وانا واقفه بالاندر وير المهم وبعد كده تلفلي المكان كله بالبلاستيك اللى بيغلفوا بيه الطباق ده قبل مايتحط فالتلاجه طبعا عارفينه اللى بيلزق ده الشفاف الرول يارب تكونوا عرفتوه هما بيستخدموه فالسوبر ماركت للتغليف المهم وبعد كده تجيب رباط ضغط وتلفه فوق البلاستيك ده طبعا كانت بتستخدم رباطين واحد لرجلى اليمين وواحد للشمال وتلفهم بس مش بتشد نص نص يعنى وتثبتهم كويس ده الربط التنحيفي بقى ياجماعه وبعد كده كانت بتطلب منى امشي على السير الكهربائي بسرعه مش بطيئه ولا سريعه لمدة نص ساعه وبعد كده العب على العجله لنص ساعه كمان وبعد كده ادخل اخد شاور وادفع وامشي
صحيح نسيت هى كانت بعد لما تخلص لفي بكل الحاجات دى بتطلع بره وتقولى البسي وتعالليلي على الجيم طبعا انا كنت بلبس شورت عادى كده واروح علشان العب عالعجله وامشي على السير يارب اكون قدرت افهمكم انا روحت مرتين بس وفعلا فرق معايا وكنت بدفع 50 جنيه فالمره بس صراحه لما شفت المبلغ واللى بتعملهولى الدكتوره كل مره استغليت الحكايه وخصوصا ان العياده فالقاهره وانا بسافر كل مره القاهره لانى ساكنه فمحافظه تانيه بس انا ناويه اجيب خلطة الزيوت اللى انتم قلتم عليها فوق واستبدلها بكريم التنحيف ده
صحيح يا جماعه انا شفت اجسام ماشاء الله وكانت بتدهنلهم الكريم ده على بطنهم والمؤخره ورجلهم واردافهم وتلفهم بنفس الطريقه اللى قلتلكم عليها وكان الحساب تقريبا 50 جنيه على كل منطقه وطبعا كانوا برضو بيلعبو رياضه
يارب اكون افدتكم ولو في حاجه انا فالخدمه
CoCo Chanel CoCo Chanel فتكات متميزة Fatakat 183944 egypt – egypt