ازيكم يااحلى شيفات واحلى فتوكات فى الدنيا
النهاردة جيبالكم طريقة الحواوشى الاسنكدرانى وان شاء الله يعجبكم
انا شوفت طرق كتير للعجينه بتاعت العيش اللى بيتعمل فيه الحواوشى
بس بصراحة ملقتش افضل من طريقة عجينة الفطير العادية لان الطرق التانية بتخلى العجينة تخمر
وتكون تخينة شوية وكأنها بيتزا او قرص مش عيش حواوشى رقيق زى الاسنكدرانى
تعالوا نشوف مع بعض مقادير العجينة
4 كوب دقيق _ معلقة صغيرة ملح _ معلقة صغيرة سكر _مية دافية للعجن
شوفتوا بقى مفيش اسهل من كده
العجينة مفيهاش خميرة ياقمرات
عشان فيه بنات كتير سألونى عليها
تعالوا نعمل العجينة مع بعض بقى
اول حاجة هنحط الدقيق فى الطبق اللى هنعجن فيه ونحط عليه السكر والملح
ونقلبهم فى بعض كويس ونبدأ نحط المية الدافية بتاعتنا حبة حبه ونعجن لحد ما العجينة تلف معاكى كويس
وحاولى تعجنى بأقل كمية مية ممكنه عشان العجينة تتظبط معاكى صح
وده شكل العجينة بعد ما تعجنت تمام وكل العجين اتلم من اطراف الطبق وبقت متماسكة وطرية
هنلف الطبق بقى بكيس بلاستيك وحطيه جوا الفرن عشان العجينة تهدى وترتاح
طبعا الفرن مقفول بس بندور على مكان دافى عشان ترتاح كويس
وسيبيها من ساعة لساعتين وممكن اكتر لو تحبى
كل ما تسيبيها ترتاح اكتر كل ما تديكى نتيجة افضل فى الفرد
انا سيبتها حوالى ساعتين على ما خلصت شغل البيت
تعالوا بقى نجهز اللحمة المفرومة بتاعت الحواوشى
نص كيلو لحمة مفرومة وطبعاا يكون فيها دهن شوية مش حمرا كلها _ 5 بصلات متوسطين مبشورين لان الحواوشى بيحب البصل الكتيــــر _ فصين ثوم متقطعين صغير _فلفل اخضر رومى متقطع صغير _ ملح _فلفل اسود _كمون _ كسبرة ناشفة_بهارات لحمة
بس كده
ده اللى بحطه فى الحواوشى
انتى ممكن تحطى طبعا طماطم مقطعه وتحطىدون بقس او اى خضره تحبيها
كله حسب ما بتحبى او حسب مااتعودتى
بس انا مبحبش الحواوشى الا كده بس اى اضافة تانيه بحسه طعمه اتغير
هنا كده اللحمة جاهزة على الحشو
نشوف بقى عجينتنا بعد ما ارتاحت ساعتين وقطعتها كور صغيرة
بصوا العجينة بتشد معايا بسهولة ازاااااى
كده معناها انها ارتاحت كويس وجاهزة للفرد ولما هتفرديها بالنشابة هتكون سهلة و مش هتلم تانى معاكى
نفرد بقى كل كورة بالنشابة كويس لحد ما تبقى دايرة بحجم مناسب ونفرش على الرخامة بتاعتنا شوية دقيق الاول
عشان العجينة متلزقش ونحط الحشوة ونقفل العجينة عليها كويس
والصور هتشرح نفسها
رصى الكمية بتاعتك فى الصينيه وادهنى الوش بزيت ذرة
انا خططت مكان قفل العجينة بالشوكة عشان تدى شكل حلو
الفرن يكون والع وسخن اكيد
وتدخليها الفرن وبعد ربع ساعة كده بصى عليها ولو ارضيتها اتحمرت اقلبيها على الوش التانى
وهكذا تابعيها لحد ما تتحمر كويس وتستوى
هتاخد حوالى نص ساعه ل ساعة الا ربع حسب حرارة فرنك
وده شكل الحواوشى النهائى بعد ما استوى وطلعته من الفرن
بصى اللحمة مستوية كويس ازاى والعجينة رقيقة ومستوية
جربوه هيعجبكم اوى ان شاء الله
وادعولى بالذرية الصالحة واخاوى بنتى هنا
والف هنا وشفا على قلوبكم يابنات
المرة الجاية بقى ان شاء الله
هعملكم الفطير المشلتت بنفس العجينة دى
لو موضوعى عجبك متنسيش التقييم بقى لانى تعبت فيه جدااا
التقييم تحت ايدك اهوووو
مواضيع هذا القسم برعاية
وجه جميل وجه جميل 376841_11.gif مشرفة عامة لأقسام الفضفضة Fatakat 376841 الشارقة – الامارات