السلام عليكم ورحمة الله وبركاته
كل سنه وانتوا طيبين ومصر بخير يارب
النهارده حبيت انقل تجربتي في المطبخ الايطالي لانه انا اخدت تدريب شهرين في مطعم ايطالي مع شيف زميل لي من ايطاليا طبعا بحكم شغلي لاني كنت ريسبشنست في اوتيل فايف ستارز عموما لما اتخطبت وعرفت انه لا مفر من المطبخ فكرت اعمل تدريب وبجد استفدت جدااااااا
طيب من غير رغي كتير البيتزا دي غير اي بيتزا يعني ايطالي ايطالي مش امريكي
اولا العجينه انا بعمل اتنين واحده كبيره لجوزي وواحده لبني صغيره المقادير 2 كوب دقيق اللي هو مج شفاف بتاع الشاي ومعلقه صغيره ممسوحه ملح ومعلقه صغيره ممسوحه سكر ومعلقه كبيره خميره فوريه وربع كوباية ويت ويتون انا عن نفسي بشيله خاااالص لاني بتعب من اي زيت بس هو اساسي ف الوصفه الايطالي ونبدآ نعجن ونحط ميه بشويش واوعي تزوطي هتلزق منك وبعطين تعجني وتلمي العجينه كويس بالنسبه للي هيضيفوا الزيت يبقي ف الاخر وبعد ما نخلص نغطيها بنايلون ونسيبها ف مكان دافي ولعند ماتخمر نعمل الصوص ونجهز الحشوه
الصوص فيه كذا طريقه الطريقه الايطالي الاصلي هي الكونكسيه اللي هي هنجيب الطماطم اربعه وسط كده ونص كوب ماء ونسيبهم يغلوا ع النار عشر دقايق ونسيبهم يبردوا وبعد كده نشيل القشره هتتشال بمنتهي السهوله ونشيل البذر طبعا يعني تعصريها بايدك عصره كده هتلاقي البذر نول وتضربيها في الخلاط وتنزلي بيها علي طاسه ع النار وتسيبيها تتقل وتتسبك وتضيفي معلقه صغيره سكر ومعلقة اوريجانو اللي هو زعتر وده اساسي برضه ف الوصفه الايطالي وع فكره دا اللي بيطي الريحه المعروفه ف المطاعم الجاهزه بس كتير اوي مش بحطه وبتطلع تحفه
تقلت الصلصه خليها علي جنب فيه نوع صلصله تاني اللي هو اربع فصوص توم مفروم وممكن بصله صغيره ونعمل صلصله عاديه جدا نشوح التوم والبصل وننزل بالطماطم المفرومه بس طي مش ايطالي خالص بس بتنفع عاطي جدا
وممكن في الكونكسيه نفرم توم ونسويه مع الطماطم وهي بتتقل وبتطلع حلوه برضه جهزنا الصوص ندخل ع الحشوه انا بعمل جمبري وتونه الجمبري بحيبه وبقشره وبغسله كويس جدااااا بميه وملح وخل وليمون واسيبه لغاية ريحته تبقي خل وليمون خالص حوال نص ساعه هتلاقي الميه بقت بيضه وحلوه اوي وبعدين بشوحه بحتة زبده وممكن توم وبصل وبابريكا وفلفل اسود ومش بياخد سوا خالص يادوب يشم النار هتلاقي لونه بقي روز دا دليل ع انه استوي بس وتجيبي بصله تقطعيها ترنشات وكذلك فلفل اخضر وزيتون اسود وتجهزيهم في طبق عشان متجريش بعد ماتعجني يعني تكوني مجهزه كل حاجه طيب اقل حاجه تسيبي العجينه ساعتين وتبدأي الفرد تجيبي النشابه اللي بنفرد بيها وتمرريها ع الدقيق وبعدين تقسمي العجينه اتنين وتبدأي الفرد وتراعي متكونش تخينه ولا رفيعه
وبعطين بمعلقه تحطي الصوص وتوزعي وبعد كده طبقه رفيعه جبنه موتزاريلا وبعدين الحشوه اللي هي جمبري وبصل مبشور وفلفل مبشور وزيتون والتوبينج جبنه موتزاريلا ولازم تكون كتير وتغطي عشلن تبقي غنيه وتكوني مسخنه الفرن قبلها بعشر دقايق وتدخليها برضه نش بتاخد وقت بس اقل درجه حراره للبيتزا 200 انا بعملها 230 عشان جوزي بيبقي مستعجل بس بقف جنبها عشان متتحرقش وبالهنا والشفا
لو عجبك الموضوع قيمي عشان الكل يستفاد وادعولي ربنا يبارك في اولادي وجوزي امين يارب العالمين مواضيع هذا القسم برعاية
nevena hassann nevena hassann 169382_1.gif فتكات هايلة Fatakat 169382 hurghada – egypt
سبحان الله و بحمده