النهاردة يا فتوكاتى الاعزاء هقول لكم طريقه عمل الارز المعمر .انا مشهوره بيه و بعمله فى اى عزومه . و مبيفوتش اسبوع الا لما جوزى يطلبه و كمان الاولاد.بصوا:
لازم يكون عندك برام فخار لو عايزه الريحه و الطعم الاصيل.بتجيبى الرز المصرى , نقول مثلا لو برام متوسط يا خد 3 كوبايه رز؟المهم لازم كميه الرز بعد غسيله ما تعديش نص البرام علشان لسه فى حاجات تانيه هتتحط عليه. فى الوصفه بتاعتى مش بستعمل سمنه بستعمل قشطه بشيلها من على وش اللبن العادى . تستعملى حوالى ربع كيلو بدعك بيهم الرز بس مش قوى علشان ما ينهريش و املحه زى الرز العادى و يكون عندك لبن مغلى تحطيه على الرز فى البرام بعد ما تكونى دعكتيه بالقشطه و ملحتيه.
كميه اللبن ما تعديش نص عقله الصابع فوق اللبن انا اصلى بقيسه بعقلة صباعى.
السر بقى انك لازم تضيفى نص كوب ماء مغلى على اللبن و تقلبيهم علشان الرز يستوى.
دخليه الفرن لمدة نص ساعه لغايه ما الوش يتحمر و اللبن يبداء ينشف
وبعدين وطى عليه لمدة نص ساعه كمان. و كل ما تكون القشطه كميتها كويسه يطلع طرى و طعمه تحفه.
على فكره انا سا عات بحط قطع لحمه مسلوقه فى الرز و بتطلع خرافه و بالهنا و الشفا.
مواضيع هذا القسم برعاية
موحده بالله موحده بالله 23008_1.gif فتكات ست الكل Fatakat 23008 بلاد الله – أم الدنيا