السلام عليكم ورحمة الله . إزيكم يامهات يا حلوين انا النهارده هكلمكم عن مشكله بتحصل كتير آوى والام بتلاقى نفسها محتاسة وغالبا مش بتعرف تتصرف صح وبتكون النتيجة مشاكل كبيرة لا قدر الله وممكن نحمى نفسنا منها بمعرفة معلومات بسيطة المهم مش هطول عليكم موضوعنا عن الحروق ،كتير مننا بتسيب المطبخ دقيقة تسمع صوت صرخ جاى من المطبخ تكتشف أن الطفل لمس الفرن أو سطح البوتاجاز وهو سخن أو وقع سواءل سخنه على جسمه أو حروق من الشاى أو القهوة أو الشربه أو حتى مسك المكوة وهى سخنه اول حاجة المفروض الأم تعملها فورا وبأسرع ما يمكن هى أنها تشيل الطفل هيله بيله وتحطه فى طبق ميه من الحنفية يعنى ميه عاديه لا سخنه ولا ساقعه من التلاجه أو تحطه تحت الدش بشرط أن قوة دفع الميه متكونش عاليه ومن المعلومات الشائعة والخاطءة وضع التلج لانه بيسبب التهاب زياده فى الجلد المصاب وسبب استخدامنا للميه كأسعاف أولى هو تبريد مكان الحرق وكل ما أسرعتى فى وضع الميه بتحمى طفلك من زيادة مساحة الحرق نتيجه لاستمرار وجود الماده التسببه فى الحرق وكمان سخنه على جسمه بتسيبى الجزء المصاب فى الميه نص ساعه على الأقل بعد كده بتنشفى بالراحة بمنديل قماش نضيف أو ملايه مثلا بشرط ميكونش فيها وبره علشان لو فيه جزء من الحرق عميق الوبرة متلزقش فيه لو مكان الحرق أتكون فيه فقاعات أوعى أوعى تحاولى تفقعيها أو تصفى الميه إللى جواها لان السائل إللى جواها ده بيحمى الحرق من التلوث وبيرطب الجلد المصاب لحد ما تتكون طبقه جديده بعد كده تقدرى تحددى إذا كان الحرق مساحته بسيطه وممكن تكملى علاجه فى البيت باستخدام كريم حروق والمحافظة على مكان الأصابه من التلوث أو لو مساحة الحرق كبيره (أكبر من نص كف الايد) فتلجأى للطبيب لعمل غيارات معقمه تانى حاجه بقى لو لا قدر الله الحرق كبير بسبب النار مسكت فى ملابس الطفل لو الميه جنبك بسرعه هتطفيه بيها ولو مش جانبك هتلفيه بسرعه باى فرش عندك بطانيه أو كبرتايه بشرط متكونش ألياف صناعيه علشان تفصلى النار عن الهواء فتنطفئ بعد كده بتحطى الطفل برده تحت الميه وتشيلي الهدوم من عليه بانك تقطعيها بالراحة ووجود الميه هيساعدك لو فيه أجزاء منها ملتصقة بجلد الطفل بعد كده هتلفيه بملايه مفيهاش وبرة وعليها بطانيه وتدفيه وتهديه وفى نفس الوقت يكون حد اتصل بالإسعاف نفس الخطوات بتاع حرق النار بنستخدمها فى حرق الزيت المغلى لحد لما توصل الإسعاف أو لو فيه مستشفى قريبه تعملى الإسعافات وبعدين توصليه لأقرب مستشفى كمان لو الحرق من ماده كيماوية كلور مركز أو فلاش أو بوتاس برده نحط عليه كمية ميه كبيرة وبسرعة قدر الامكان لان الميه هتخفف تركيز المادة الكاوية وبالتالي تتقلل تأثيرها اللهم انفعنا بما علمتنا وعلمنا ما ينفعنا امين
انوجه حومه انوجه حومه 996651_1.gif فتكات حبوبة Fatakat 996651 املج – السعوديه
سبحان الله و بحمده