اصابع الفراخ بالعجينه الهشه فكره جديده كتجديد فى طعم الفراخ وكمان بتنفع اووى فى الرحلات او الخروجات الاسريه ومش عايزه اقولكم ماشاء الله جمييله تابعوا معايا الطريقه
ناخد بس الصوره النهائيه لزوم التشويق
المكونات
صدور فراخ+وراك مخليه (فرخه كامله مخليه)
بصله مبشوره
ملح وفلفل+بهارات فراخ
رشه بقدونس+كزبره
بابريكا+معلقتين بقسماط عند الحاجه
هنفرم الفراخ مع كل المكونات فرم ناعم جداا
ده شكل الفراخ بعد الفرم هنحضر الاستيك اللى هنشكل الفراخ عليها
هنشكل الفراخ على الاستيك ونحطها على جنب ونحضر طاسه تيفال مدهونه زيت قليل ونشوح الفراخ كويس على نار عاليه عشان متفقدتش سوايلها ومتقلقوش ان شاء الله بتستوى
نيجى بقا للعجينه الهشه
مكوناتها
2كوب دقيق
صفار بيضه+زعتر +رشه توم بودر+بصل بودر+رشه ملح وسكر +ربع معلقه بيكنج بودر+معلقه خميره +لبن للعجن+3ملاعق زبده سايحه ونبتدى نعجن كويس لغايه ماتتكون معاكى عجينه لينه ملساء تسيبيها تخمر حوالى ساعه
بعد مالعجينه خمرت كويس بفردها واقطعها شرائح طوليا زى ماهو موجود فى الصوره
ببتدى اخد الكفته بتاعتى وزى ماهو فى الصوره بلف او طرف على الاستيك كويس عشان ميفكش وبعدين اكمل لف على بقيت الكفته وده هنشوفه فى الصوره الجايه
ده شكل الكفته واحنا بنلف عليها العجينه هنكمل لف للاخر وبعدين نقفل اخر طرف فيها زى ماقفلنا اول طرف ع الاستيك
ده شكلها فى الاخر نسيبها تخمر بقا كمان ساعه الا ربع وندخلها فى فرن ساخن على درجه حراره180 وندهن وشها بميه مخلوط عليها رشه بيكنج بودر وممكن تحطى سمسم او حبه البركه زى ماتحبى
وده شكلها النهائى ماشاء الله جميله اتمنى تعجبكم ع فكره ممكن تتعمل باصابع اللحم برضه بس انا حبيت انوع لانى عملتها قبل كده باصابع اللحمه
آه نسيت اقولكم متنسوش تسحبوا الاستيك منها بعد ماتستوى وهى سخنه علطوول تسحبيه لانه لو سيبتيها تبرد الاستيك مش هيطلع معاكى
زووم بقا ع الحشو من جوه شايفين ماشاء الله الحشو مالى مركزه
ولو عجبتكم مش عايزه منكم غير دعوه حلوه بظهر الغيب ان ربنا يقر عينى بما اتمنى ويريح قلبى ويسعدنى
فى رعايه الله يافتوكات مواضيع هذا القسم برعاية
angelsmile2311 angelsmile2311 963758_5.gif فتكات رائعة Fatakat 963758 my home – egypt