بسم الله الرحمن الرحيم
أزيكم يا أخواتى انا النهاردة جيبالكم طريقة اسياخ اللحمة فى البيت ومن غير شوية والطعم جنان وكمان المكرونة بالسوسيس او النقانق
ودى صورتهم
ودى صورة غدانا النهاردة
الفاصوليا والرز كانوا بايتين من امبارح ﻻنى عاملة ريجيم وكان ده غدا جوزى وانا اللحمة والخس طبعا انا سيخين لحمة بس انا كلت اربعة وجوزى الباقى وراح جوزى ضحك على ابنى سنتين هو واداله الرز و الفاصوليا واكل المكرونة معلش انا رغاية هدخلكم على التفاصيل
هبتدى باللحمة هى حوالى نص كيلو لحمة
التتبيلة وطبعا بيتها فيها من امبارح
معلقة كبيرة مستردة
معلقة كبيرة صويا صوص
معلقة كبيرة عصير ليمون
معلقة صغيرة فلفل اسود
رشة قرفة منكترش علشان متمررش
رشة كمون
معلقة صغيرة شطة سايلة
وزى ما تحبى من البهارات يعنى كسبرة . البهارات العربى برحتك انا حطيت البهارات العربى معلقة وسط
وطبعا معلقة كبيرة زيت زيتون بس دى بحطها الصبح
ودى الصورة فى التتبيلة
هنجيب اللحمة ونغسله ونقطعها مكعبات فى حجم عقلتين صباع ونصفيها نسبها تتصفى نص ساعة تنزل مايتها وهوب على التتبيلة وفى التﻻجة ونقابلها بكرة
النهاردة بقى قطعت بصلاية مكعبات ونص جزراية وطماطماية ونص فلفلاية صفرا ونص حمرا وحطيتهم فى الجنب وقلبتهمفى التتبيلة بحب اعملهم طازة علشان ميدبلوش
ودى صورتهم
ونجيب طاسة او مقﻻية ونسخنها على النار وحطى اللحمة بعد طبعا ما تكونى رشيتى اللحمة بمعلقة زيت زتون انا قلت اه اللحمة مش الطاسة
سيبى اللحمة متخافيش دقيقة واقلبيها علشان تاخد صدمة من كل اﻻتجاهات وتفضل طرية بعد السوا
ومتخافيش هى هتنزل ميتها
ودى صورتها
ودى وهى بتنزل مايتها
وسبت الماية تنشف شوية ورحت حاطة الخضار وكمان التتبيلة اللى كانت فى الطبق والماية اللى نزلتها اللحمه هى حوالى ربع كوباية تتبيلة يعنى مش كتير
ودى صورتها
وتهدى النار يعنى تخليها على نار وسط وتغطيها بغطا مناسب او ورق فويل وبتقعد عشر دقايق وتكون استوت والخضار بقى روعة وهيبان طبعا الفرق فى الصورة ان الخضار استوى واللحمة
ودى صورتهم
ودى بعد الغرف
طبعا هى مناسبة للى بتعمل ريجيم زى ﻻن مفيهاش اى دهون
ندخل بقى على المكرونة
جبت اربع وحدات نقانق او سوسيس وشوية مكرونة اسباحتى
فص توم وطماطماية مقطعة ناعم
غرست المكرونة فى السوسيس بعد ما قطعته فى حجم عقلة الصباع
وغليت ماية بمعقة زيت ومعلقة ملح ولما غليت خالص حطيت المكرونة بالسوسيس وسبتها 10 دقايق او حسب رغبتك فى سوى المكرونة
صفيت المكرونة وفرمت فص التوم وشوحته فى معلقة زيت زتون ورشة فلفل لما بقى دهبى فاتح ونزلت بالطماطم ورشة ملح بسيطة
وسبتها تدبل شوية الطماطم وزودتها معلقة ماية وفوقها المكرونة وسبتها شوية لحد مالون السوسيس غير فى الحلة من الزيت والتدبيلة وغرفتها
ودى الصورة هتوضحلكم الخطوات
ياريت يكون عجبتكم وقدرت اوصلكم الطريقة ومعلش انى طولت عليكم
بس ياريت متنسوش التقييم انتوا شايفين تعبت اد ايه فى الموضوع ورفع الصور
دعواتكم ليا وللمسلمين اجمعين بصﻻح الحال
مواضيع هذا القسم برعاية
mono salama mono salama 1029472_1.gif فتكات متميزة Fatakat 1029472 dubi – uae