ازيكو يا ارق واجمل فتوكات
بجد وحشتونى جداً جداً جداً
النهاردة جيالكم بعد غيبة طويلة
جوزى كان بيحب ياكل حواوشى من عند محل مشهور جدا فى وسط البلد ولانى فتوكة شاطرة ومدبرة قلتلة متجبلنا منة معاك ولا ملناش نفس وجابة وانا اعد ادوق واستطعم لحد ما عرفت كل اسرار الحواوشى العجيب وبجد كان تحفة وصممت انى اعملة وطلعتة احسن من الجاهز ومن يومها جوزى بطل ياكلة برة نهائى وبقيت اعملة واعينة فى الفريزر لوقت الحاجة تعالو معايا شوفو واحكمو بنفسكم .
المكونات :
نص كيلو لحمة مفرومة
– 1 كيلو سجق اسكندرانى
– 1 كيلو بصل
– فلفل اخضر حامى ( لو انتى حباة يكون حامى )
– توابل ( ملح و فلفل و رشة حبهان بودرة )
– 20 رغيف عيش بلدى طازة ( متستغربوش الكمية دى بتعمل 20 رغيف مليانين اوى وحتشوفو بنفسكم )
– قليل من الزيت
الطريقة :
– نضع اللحمة المفرومة فى حلة
– حنجيب السجق الاسكندرانى وبيكون بالشكل دة صابح
– حنشيل الجلد الخارجى ودة بيبقى سهل جدا لو كنتى شرياة صابح زى دة مجرد تعملى فتحة فى الجلد بالطول حينفتح الجلدة زى قشرة الموز بالظبط ونضعة فوق اللحمة لحد منخلص الكمية وحيكون بالشكل دة
– بعدة كدة نبشر البصل بالكبة او بالمبشرة ونضعة فوق اللحمة المفرومة والسجق بالشكل دة
– بعد كدة نفرم الفلفل الاخضر الحامى ودة اخيارى دة لو بتحبوة حامى وحيكون بالشكل دة
– بعد كدة تحط التوابل بتاعتنا بالشكل دة على الخليط السابق
– ونخلط جيدا جدا كل المكونات ونبدا نفتح العيش ونحشية بالشكل دة
– ودة شكلهم بعد مخلصت حشو
– واخيراً تخدى الكمية اللى تكفيكى وتعينى الباقى فى الفريزر لوقت ماتحتاجيهم واللى حتشيلية اول ما تطلعيه من الفريزر على الفرن على طول ومتخفيش طعمة مش حيتغير ولا حيعجن ولا العيش حيفرول
– اما الكمية اللى حتسويها تدهنيها بقليل من الزيت وتحطيهم فى صنية وتدخليهم الفرن حتنزلى الشبكة او الرف العلوى على اول درجة فوف الرف بس اهم حاجة الفرن بتكونى مسخناه كويس جدا قبلها وتقلبية من وقت للتانى لحد تمام والسواء ورصيهم فى حلة او صنية وتكونى مجهزة فحمة مشتعلة وتحطيها على ورقة فويل فى نص الحلة او الصنية وتحطى عليها شوية زيت وتقفلى الحلة او الصنية كويس جدا وتسبيهم شوية يعنى دقيقتين او 3 وبعدين تقتحى عليها ودة حيدكى ريحة وطعم الشوى اكنك شوياة على الفحم وتقدميهم مع مخللات وسلطة طحينة و سلطة خضرا وشوية بطاطس مقلية لو حابة دة ودة شكل الحووشى بعد السواء.
استنو رايحين فين لسة مخلصناش
تكات مهمة
– ممكن بعد حشو رغيف الحواوشى تحطى صوابع سجق شرقى فوقة متقطعهوش يكون سليم يعنى كام واحد فى كل رغيف
– او شرائح فلفل رومى وبصل
– او جبنة موتزاريلا
– وممكن تفرمى قطعة لية مع اللحمة المفرومة وفى البداية ودة لو بتحبوها
وتسوى بنفس الطريقة السابقة ودة بيديكى طعم خرافة لان كل اضافة بتديكى طعم مختلف تماماً.
وبالف هنا وشفا
ومتنسوش التقيم مواضيع هذا القسم برعاية
ام حبيبة 2024 ام حبيبة 2024 images/avatars/peppers.jpg فتكات متميزة Fatakat 528829 القاهرة – lمصر
سبحان الله و بحمده