ازيكو يا احلى فتوكات وسنه جديده سعيده عليكو ياااارب
النهارده جيبالكو وصفه الفراخ بالبطاطس البيضا اللى كانت مامتى حبيبتى رحمه الله عليها مشهوره بيها
وبجد يابنات مش بتاخد وقت فى التحضير وسريعه وطعمها روووووووووووعه والبطاطس بتبقى شاربه صوص الفراخ وبتبقى ايييييييه تصدقو جعت
ومعاها الرز المعمر الجااامد وخشى على احلى غدا
بسم الله
اول حاجه هنغسل الفرخه كويس ونقطعها اربعه
ونقطع البطاطس مكعبات تخينه
ونضرب بصله متوسطه فى الخلاط بشويه ميه صغيرين يااادوب الخلاط يلف (ودى او تكه لان الفراخ بتنزل الصوص بتاعها فاحنا مش عايزين ميه غير بسيط خالص)
وبعدين نتبل البصله بملح وفلفل اسود
ونجيب الصينيه ونحط الفراخ اول حاجه ويبقى وشها لتحت الجلد تحت يعنى وفوقيها البطاطس(ودى تاني تكه)
وفوقيها البطاطس
ونحط البصله المتبله على البطاطس وندعكها فيها
وندعكها فى البطاطس
ونكون مسخنين الفرن من تحت ونحطها فيها ونشيك على الفراخ كل شويه لحد ما نلاقيها استوت(بتاخد تقريبا ساعه الا ربع لفرخه متوسطه)نقوم رافعين الفراخ فوق البطاطس ووشها لفوق
ونسيبها ربع ساعه كمان لحد ما البطاطس تشرب صوص الفراخ والفراخ تاخد وش
وممكن تولعى الشوايه دقيقه لو عايزه الفراخ محمره قوى(كنت مستعجله الصراحه فامولعتش الشوايه)
وبجد بيقى طعمها تحفه والبطاطس بتبقى روعه
ومعاها طبعا المعمر الجامد
مقاديره
3 كوب رز منقوع فى ميه من بالليل
لتر لبن كامل الدسم(كل كوب رز ليه كوبايتين الا ربع لبن وتعايرى الرز واللبن بكوبايه واحده)
2 علبه قشطه 170 جم
2 م ك سمنه بلدى (او زبده لو مفيش سمنه بلدى)
ملح
تجيبى صينيه غويطه(عشان اللبن مايقعش فى الفرن وهو بيغلى)
وتصفى الرز من الميه وتحطيه فى الصينيه وعليه لتر اللبن والسمنه والقشطه والملح
تكونى مسخنه الفرن من تحت وتحطيه وتتابعيه كويس لحد ما ياخد وش تطلعيه على طول عشان ماينشفش(مش بولع عليه من فوق)
وبالهنا والشفا يارب
مواضيع هذا القسم برعاية
روهاا روهاا 93648_1.gif شيف فتكات Fatakat 93648 المدينه المنوره – السعوديه