السلام عليكم
وعدتكم أني أقدم لكم طريقة عمل بديل مرق الدجاج اللي بيستخدمه الشيف نبيل وبيخلي أكله مش صحي خالص
معلش هي طريقة ممكن يكون فيها تعب شوية لكن في الآخر أنتي بتحافظي على صحتك وصحة أسرتك
الطريقة دي أنا جربتها وكانت ممتازة جدا وبتعملك كمية كبيرة بتقعد معاكي فترة طويلة
وزي ما ذكرت قبل كده أنها طريقة الشيف أسامة السيد
ندخل بقى في التفاصيل:
مرق اللحم البهريز:
المقادير:
2 كيلو عظم بقري (بتجبيه من عند الجزار عادي)
10 كوب ماء بارد
5 حبة حبهان
2 حبة مستكة
بصلة متوسطة
1 كوب كرفس (وياريت يكون بالعيدان)
1 جزرة متوسطة
2ورق لورا
قرنفل حسب الرغبة
ملح وفلفل وياريت لو يكون الفلفل مش مطحون يعني صحيح
الطريقة:
ياريت العظم يكون فيه نخاع ومتقطع صغير ويكون عظم بقري أفضل من الضاني ومش البتلو يعني عظم كندوز
*بنغسل العظم بمياة ساخنة علشان أتخلص من الدم
*احط العظم بعد كده فيه ماية باردة علشان اخرج منه الريم
*بحط معاها باقي المكونات ماعدا الملح مع ملاحظة أني بفتح الحبهان بإيدي وبفضيه على العظم
*واسيبه على النار ومخليهوش يغلي خالص لازم اشيل الريما الأول
وافضل اشيل في الريمة لغاية ما تبقى نضيفة جدا وبعدين أوطي عليها على النار لمدة ساعة أو لغاية ما تتركز حسب التركيز اللي انتي عايزاه يعني ممكن تقل للربع أو حتى للتمن
*وبعدين احط الملح في الآخر واسيبها تبرد خالص واصفيها وبعدين اعبيها في كبايات فلين واحطها في الفريزر
ووقت ما احتاجها ممكا أخرج الكوباية وافتحا بالسكينة فيكون عندي أحلى وأنظف مرق
أو ممكن اعبيها في مكعبات الثلج واسيبها لغاية ما تجمد وفي طبق فل احط المكعبات المجمدة واستخدمها في الأكل وقت ما أحب
مرقة الدجاج
نفس الطريقة لكن بتستخدمي عظم دجاج وعلى فكرة أنا رحت لبتاع الفراخ وقلت له عايزة كيلو هياكل ادهوني بسعر رخيص جدا جدا
أو ممكن تشتري فرخة وتطلبي من الراجل يخليهالك وتسخدمي اللحم المخلي بانية او شيش طاووق وتعملي بالعظم المرقة
مرقة السمك:
بنفس الطريقة لكن بتبدلي العظم بعظام أسماك تكون العظم من جوه مدور أو مربع وممكن قشر جمبري
وعظم السمك ده بيكون عند السماك اللي بيعمل سمك فيليه
أو ممكن تشتري سمكة كبيرة وتخليه يخليهالك وتستفيدي من الفيلية في الأكل ومن العظم في عمل المرقة
أتمنى أكون افادتكم
واي سؤال أنا في الخدمة
وما تنسوش التقييم والدعاء
مواضيع هذا القسم برعاية
هبة الو هبة الو 393042_1.gif فتكات رائعة Fatakat 393042 أم الدنيا – مصر أم الدنيا