السلام عليكم ورحمه الله وبركاته
كل سنه وانتم طيبين ياحلى فتوكات قمرات .. بصوا بقى ده اول موضوع ليا في قسم الطبخ عايزة تشجيع بقى لان مش ليا في شغل المطبخ عموما
الاكله دي عباره عن اختراعات في بعضها حتى اسمها اختراع اللي عنده الاسم الحقيقي دلونا عليه الله يكرمكم
مش هطول عليكم اكتر من كده ومعلش اعذروني في المقادير مش هتبقى مظبوطه قوي
نص كيلو جمبري
جزرة متوسطه
بصله متوسطه
حبه طماطم كبيره
2 م ك دقيق
كبايه ونص لبن
توابل ( ملح وفلفل اسود وكسبره ناشفه ) ولو ليكي توابل مميزة بتستخدميها خليكي فري
حوالي معلقه ك زيت زيتون
الطريقه بقى ..
للي ليها في المطبخ الطريقه ببساطه شديده عامله زي الكبده الاسكندراني بس بدالها جمبري وعليها بشاميل
الي مش ليها بقى اقولها ..
– اولا بنحط الجمبري في خل ولمون وملح وفلفل اسود وكمون وكسبره ناشفه زي تتبيله السمك عادي بس انا حطيت اختراع وهو معلقه صغيره كاري
– بنجيب البصله والطماطم ونقطعها طرنشات والجزر نبشره ونحطهم مع الزيت في طاسه تيفال ونحط عليهم رشه فلفل اسود نقلب فيهم شويه لحد مايدبلوا كده على نار هاديه
– بعد كده نضيف الجمبري باللي عليه على نار هاديه برضه ونقلبه شويه ونغطيهم ولو حسينا ان الدنيا ناشفه نضيف شويه ميه ونتابعها كل ماتنشف نضيف شويه ميه
– في حله بقى نعمل البشاميل نحط معلقتين الدقيق نقلبه في الزيت حوالي معلقتين برضه حوالي دقيقتين ونرفعه من على النار ونسيب الدقيق لما يبرد
– نضيف اللبن عالدقيق ونقلبهم بسرعه عشان ميكلكعش ولو كلكع منك ممكن تضربيه في الخلاط او ممكن وانتي بتحطيه عالجمبري تنزليه في مصفاه زي ماانا عملت
– نحط البشاميل بقى عالجمبري ونقلبهم ونحط التوابل اللي احنا عايزنها ونسيبهم يستوا براحتهم على نار هاديه وكل ماتنشف نزود ميه لحد مايستوي
ملحوظه ..
الاكله من اولها لاخرها اختراع على الاقل بالنسبالي وكل خطوه كنت بقوم بيها كانت وليده اللحظه ههههههههههه ، كمان انا كترت الصوص لان انا وجوزي بنحبه
حاجه اخيرة اللون هيبقى عاطي على اورانج شويه عشان الجزر والطماطم .
اللي ليها سؤال انا تحت امرها وعلى فكره الاكله طلعت وهميه وممكن تعملي جنبها رز وسلطه او مكرونه اسباجيتي مثلا وبالهنا والشفا ياقمرات
وادي هديه من لاول رد
مواضيع هذا القسم برعاية
Om Adham&Hala Om Adham&Hala سوبر فتكات Fatakat 189603 جدة – السعودية