ازيكم ياقمرات………..
طبعا الواحده فينا من اول ماتعرف انها حامل وتبقى هتموت وتعرف النوع وبتعد الايام والليالى عشان يجى الوقت اللى الدكتور هيقولها ولد ولا بنت وتفضل بقى تدور عن اعراض حمل الولد واعراض حمل البنت وكل واحده تلاقيها كاتبه تجربه عن معرفة النوع تجرى اوام تجربها
اللى تقولك جدول صينى
واللى تقول مقاسات الايد
واللى تقول شكل البطن والحركة
ولا تجربة البيكربوناتو ولا السلسله ……………..الخ
انا كنت زيكم كده من اول ماعرفت انى حامل وانا متعشمه بالولد لانى كان نفسى اخاوى بنتى وافرح جوزى
عملت الجدول الصينى قبل مااعرف انه حرااااااااااام لانه طلع فعلا حرام تعمليه وربنا يسامحنى بقى …المهم عملته وطلع ولد
جيت لاعراض حملى مختلفه عن حملى الاول وحمى على الحوادق بطنى صغيره اوى وانا فى السادس اهو الحركة حساها من اخر التالت وكل اللى يشوفنى يقوللى شكلك حامل فى ولد
الاحلام كلها انى خلفت محمد
تجربة ضهر الايد قالتلى ولد
السلسله عملتها وطلع ولد
كل حاجة زادتنى عشم على الفاضى انى حامل فى ولد لما بقيت متعشمه بزياده ورغم انى مفيش مره سجدت الا مادعيت بالولد وناس كتير دعتلى الا انى النهارده روحت عملت سونار وكانت المفاجأه …………………………
الدكتور: هتجيبى اخت لبنتك ان شاء الله
انا:
مش اعتراض على قدر ربنا بس لانى عشمت نفسى زياده ولانى كان عندى تأكيد داخلى انه ولد روحت من عند الدكتور عماله ادور ع النت على ناس السونار غلط معاهم ولا قالهم بنت وطلع ولد بس رجعت وقلت لنفسى بطلى هبل وقولى الحمد لله ماانتى شوفتى بعينك السونار واضح انه بنت ارضى بقضاء ربنا بقى ويمكن ربنا شايلى الولد للمره الجايه الحمد لله غيرى مش طايل خالص ولو اعترضت على قدرى ربنا هينتقم منى وجايز يحرمنى من النعمه اللى بتبطر عليها دى واهو بنتين حلو برضه يونسوا بعض ويلعبوا مع بعض ولو جوزى زعلان ومش عاجبه مع انى كدبت عليه وقولتله النوع مش باين لسه يبقى يعترض هو على قضاء ربنا انا مليش دعوة
الخلاصه عاوزة اقولكم مفيش اى حاجة على وجه الارض الى هذه اللحظه تقولك النوع الا السونار وماتصدقيش اى حد يقولك غير كده عشان ماتعشميش نفسك وترجعى تزعلى ومش اى سونار كمان لازم يكون واضح وحديث ودكتور متمكن وتكونى فى السادس ولا السابع عشان الاعضاء كلها تكون اتكونت
واخيرا ادعولى ربنا يكملى حملى على خير ويرضينى باللى قسمهولى ويهدى جوزى ويفرح بالبنت التانيه دى ويرزقنى برضه بالولد الصالح
وربنا يرزق كل واحده باللى تتمناه يارب ومايحرم واحده من نعمة الصبيان والبنات
فى رعاية الله……….اختكم فى الله :جهاد
ضاضا ضاضا 111685_4.gif سوبر فتكات Fatakat 111685 قلب بدر حبيبى وزوج المستقبل بس ادعولى-الجيزة – مصر