الحمد لله ربنا كرمنى وقومت بالسلامة ودعيت ليكوا زي مدعيتوا ليا
انا ولدت من ستة ايام
وكنت قبلها باتباع مع الدكتور وعارفة انه هيتستخدم معايا محفز للولادة لان المايه اللي حولين الجنين كانت قليلة والرحم عندي مش بيوسع بسهولة وده نفس اللي حصل ليا في ولادتي الاولانية
المهم ان في ولادتي الاولانيه تعبت جدا جدا من كتر المغص والطلق اللي كان بيروح ويجي وقعدت اربع ايام باولد ده غير يوم الولادة نفسها وبشاعة الطلق الصناعي كنت باموت من شدة الام لغاية ماخدت بنج كلي وقت نزول الرأس
المهم قررت المرة دي اني آخد حقنة الابيدورال علشان انا استويت من كتر المحفز وفضلت خمس ايام بيجي طلق ويروح وجسمي كله بقه بيوجعني
ولسه مش هاتحمل الطلق الصناعي يوم الولادة
واتفقت مع الدكتور على كده
ورحت المستشفى وكان الرحم مفتوح خمسة سنتي والطلق كل اربع دقائق ودخلت المستشفى وحجزوا ليا غرفة وادوني لبس العمليات وغيرت هدومي ونزولني اوضة العمليات
لغاية كده الامور كانت ماشية كويس
وبمجرد دخولي اوضة العمليات الطلق راح خالص
وبقى يجي كل فترة و جه دكتور البنج قالي مالك هو انتى مش عندك طلق قلت له عندي معقول وقادرة اتحمله لغاية دلوقتي
وشوية وعلقوا ليا الطلق الصناعي وبدأ الألم يشتد قلت له انا عايزة البنج دلوقتي
وفعلا خدت حقنة الظهر وبدأت رجلي تنمل وشوية ومش حسيت بنصي التحتاني خالص
وشوية وعينك وماتشف إلا النور
هرش غريب
حسيت بنصي اللي فوق بيأكلني جامد
جلدي كله بياكلنى وهات يا هرش ولا الجربانة
حتى مناخيري من جوة وبقى من جوة وعيوني ووداني من جوه بقوا ياكلوني وانا اهرش وخليت الممرضه تقعد تهرش ليا كمان
الدكتور بتاع البنج قالت ده انتى كده عندك حساسية وحط ليا في المحاليل اربع مضادات للحساسية والهرش قل شوية
بس بعد ماتفضحت من كتر الهرش
وشوية والحمد لله النونو جه بالسلامة
ولغاية كده وكل حاجة معقولة
بس بمجرد ما ولدت جت ليا رعشة غريبة وبيقت اتنفض وسقعانة على الآخر
وغطوني ببطانيتين وطلعوني الاوضة بتاعتي
ورحت نمت شوية وقمت بعدها بساعتين عايزة الحمام
وادخل الحمام مش عارفة اعمل حاجة
خرجت وقلت يمكن بيتهيأ ليا
وعدت ساعتين ولقيت نفسي فعلا محتاجة الحمام
دخلت ومفيش فايدة وقعدت احط ماية دافئة عل جسمي يمكن اعرف اعمل حمام مفيش فايدة
وندهوا ليا الممرضة وعملت ليا كمادات ماية سخنه على بطني وقالت ليا حاولي تاني
ومفيش فايدة و دلكت ليا بطنى وبرضه مفيش فايدة وكل شوية اتعب اكتر
لدرجة اني بقيت حاسة بمغص شديد زي ما يكون الطلق رجع تاني
وحاسه يتقل شديد زي ماتكون الرأس هتنزل تاني وبقيت اعيط وقالهم هو في عيل تاني جوه ولا ايه واعيط من التعب
يعني العياط اللي مش عيطته قبل الولادة عيطته بعد الولادة
وجابوا لليا الكتور وكشف نسا وقالي كل حاجة تمام وجه يتك على بطني من بره صرخت فيه من كتر الالم
وقلهم ركبوا ليها قسطرة
طبعا مليت كيس القسطرة ده تلات مرات
لاني علقت اربع محاليل
تخيلوا كل كمية الماية دي مش كنت عارفة انزلها
وقالهم خلوا القسطرة لبكرة
تاني يوم شالوا القسطرة وعرفت اعمل حمام وروحت من المستشفى
لكن لغاية دلةقتي مش باعرف اعمل حمام مش باعرف اعمل حمام بشكل طبيعي وعلطول عندي ألم وكل لما ادخل الحمام افضل بالساعات علشان اقدر اعمل الحمام ومش باعرف غير لما افضل في ماية سخنة ورجلي ورمت وسخنت
ولما كلمت الدكتور قالي ده التهاب من القسطرة وكتب ليا على حقن مضاد حيوي
وطبعا الموضوع كله بقه تعب
يعني بادخل الحمام في اليوم مالا يقل عن عشرين او خمس وعشرين مرة
وبافضل في الحمام وقت اكبر من الوقت اللي بره الحمام وفي الآخر تعب ومغص مستمر وعلطول تعاينة ومش باعرف اعمل حمام
ادعوا ليا ان اخف بقه
بنت النهاردة بنت النهاردة سوبر فتكات Fatakat 144540 الزقازيق – مصر