الســـــلام عليكــم و رحمــة الله و بركــــاته
فتوكاتي الحلوين الطعمين يارب تكونوا بخير وعال العال
النهاردة أنا حبيت أعلمكم طريقتي في عمل الأرز البخاري بالفراخ المشوية والعيش البوري الجميل اللي كل الأطفال والكبار بيحبوه وكمان بابا غنوج باضافة سرية.
فالبدايه أحب اقولكم توكلوا على الله في كل شئ حتى في اعداد الوصفات وتحضير الأكل وهتشوفوا البركة في الأكل اللي بتعملوه ولذاذة الطعم وجماله.
نبدأ بسم الله بالوصفة الأولى : الأرز البخاري
===============
المقادير
**********
كوبين رز بسمتي (وأفضل الأنواع أبوكاس – كوهينور –بنجابي المهيدب ) وصدقوني الرز السايب مبيبقاش حلو وبيتكسر ومش حلو وكمان بيسوس بسرعة
جزتين كبار مبشورين بالمبشرة
طمطماية واحدة مبشورة
بصله كبيرة مقطعة جوانح رفيعة
ملعقة معجون طماطم
ربع كوب زيت ذرة
ملح وبهارات صحيحة وهي( ملعقة كبيرة كمون ولازم يكون صحيح * حبهان *فلفل أسود *قرنفل *ورق لاورو *لومي ناشف * عود قرفة *)
فصين توم مفرومين
قرنين فلفل أخضر ماتقطعهوش عشان ميخليش الرز حراق
3 كبايات ماية سخنة
الطريقة
******
نحط الزيت يسخن عالنار ونضيف البصل ونقلبه ياخد من حرارة الزيت نحط كل البهارات الصحيحة تتشوح مع البصل تتحمص شويه وتطلع الطعم اللي فيها والنكهة .
نضيف التوم ونقلبة معاهم كويس يطله نكهته برضة
بعدكدة نضيف الجزر ونقلبه شوية معاهم لحد مايدبل شوية نضيف الطماطم المبشورة ومعجون الطماطم ونقلب المكونات كلها سوا تندمج مع بعض نحط الماية المغلية عليهم ونظبط الملح ونحط قرن الفلفل
نخلي الكلام دة كله ياخد غلوتين عالنار
بعدها نضيف الرز المغسول كويس جدا كذا مرة ونسبه على نار عاليه الاول بعد كده نوطي النار عليه خالص
وهتاكلوا احلى رز بخاري صراحة مايتوصفش طعمه
واللي تحب تحط مكعب مرقة تحط مايجراش حاجة بس صدقوني طعمه غني بدون أي اضافات
___ ** ___ ** ___
الوصفة الثانية: الفراخ المشوية الطريه
===============
مقادير التتبيله والطريقة
*********
(علبة زبادي * ملح * فلفل اسود *مايه بصلة كبيرة * خل * عصير ليمون * بابريكا * زنجبيل باودر * بصل باودر* توم باودر *قرفة *بهارات مشكله *معلقة كبيرة معجون طماطم *مسترده *روزماري *أوريجانو أو زعتر أخضر طازج مفروم * معلقة ثوم مفروم كبيره)
نخلط كل مكونات التتبيلة مع بعض كويس ونحطها على الفرخة ولو كانت بالجلد يبقى تحت الجلد نحط كمان
وطبعا مش هوصيكم يا فتوكات على غسيل الفراخ الله يكرمكم انتوا كلكم شطااااااااار وأساتذة
الفراخ لازم تبات في التتبيله يوم كامل أو ليله عشان تتطعم بالتتبيله بعد نحطها عالشواية وممكن ندهن الشوايه او الجريل بتاعتنا بزيت الذره ونسويها عالناحيتين وخدوا بالكم الفراخ لما بيزيد مدة شويها بتنشف وتشد عشان كدة ياريت نراقبها لما تستوي نشيلها خلاص وصدقوني ريحتها هتملا العمارة كلها وطعمها ولا المطاعم وطريه
___ ** ___ ** ___
الوصفة الثالثة : بابا غنوج
===========
بس صدقوني مش اي بابا غنوج وخلاص من حلاوته هتاكليه ساندوتشات وهتحطيه مع كل حاجة وأي حاجة ههههههه
الطريقة
********
نشوي باذنجان كبير ومعاه راس توم ولما يبردوا نقشرهم ونهرسهم وبالنسبه للثوم المشوي كل اللي هتعمليه انك هتقطعيه بالسكينة من تحت وتدوسي علي هتلاقي معجون التوم طلع كله من القشر ومافيش أي غلبه
نحط عليهم طحينه وطبعا الكميه حسب عدد الباذنجان ونحط عصير ليمون وملح وفلفل وشوية خل وكمون مطحون وفص توم ني مش مشوي مفروم كويس وكل دة نقلبه ونهرسه يالشوكة وممكن تحطوه بالخلاط حسب راحتكم بس الصح انكم متخلطهوش جامد وان الباذنجان يكون باين شوية
التكة المهمة واللي بتغير الطعم جدا جدا جدا
دبس الرماااااااااااااااااااان
بعد مانقلبه نحط شوية دبس الرمان ونقلبهم مع المكونات ونقدمه في طبق شيك وعلى وشه زيت الزيتون لازم زيت زيتون ونزينه بورق البقدونس او النعناع ورشه بسيطه هاديه من البابريكا أو الشطة وفي الثلاجة لوقت التقديم
وألف هنا على قلوبكم
___ ** ___ ** ___
الوصفة الرابعة : العيش البوري
=============
المقادير
********
نصف كيلو دقيق
نصف كوب ماء دافئ
ملعقة ملح صغيرة
3ملاعق زيت كبيرة
الطريقة
***********
نخلط الدقيق مع الملح والماء ونعجن شوية شوية واضافة الزيت تكون اخر شئ هو اللي هيلم العجين ويديله الملمس الطري الناعم نقسم العجين الى كرات صغيرة حسب حجم الرغيف عاوزينة ازاي ونغطي العجين بالزيت بسيط جدا ونغطيه بالبلاستيك عشان ما يكونش قشرة وينشف لانة كدة مش هيرتفع فالزيت السخن
نسيبه ساعة يرتاح وبعد كدة ناخد كرة عجين نفردها على شوية دقيق مش كتير وعالزيت السخن فورا وبالمغرفة ناخد من الطاسة زيت ونصب فوق العجين اللي فالطاسة ونفضل نصب فوقه زيت لحد ما يرتفع ويتنفخ ونشيله من الزيت على ورق مطبخ او مصفاة ويقدم ساخن
ملاحظات هامة:
1– العجين واحنا بنفردة مايكونش رفيع قوي لأن كدة عمره ماهيقب أبدا وهيبقى ناشف
2– اثناء الفرد نحافظ عليه من التني او التطبيق او ان العجين يتلزق في بعض ونرجع نفرده تاني ونقول عادي ما أنا فردته خلاص لأ الكلام دة مش صح لأن الرغيف برضه هيتأثر ومش هيقب فالزيت ويتنفخ
3– الزيت لازم يكون سخن لأنة لو بارد او لسه مسخنش مش هيتنفخ ابدا وهينشف
..*..*..* ~~~~~~*..*..*..
انا كدة خلصت أكلتي اللي قدمتهالكم بمحبتي واخلاصي
استنوني في موضوع جديد ومفيد
شكرا لكل فتوكه ترد عليا حتى لو بحرف واحد وتقيًًًًًّم الموضوع
في امان الله يافتوكات.
و أسيبكم مع الصور …….
الرز البخاري
العيش البوري
بابا غنــــوج مواضيع هذا القسم برعاية
KNT2016 KNT2016 667142_6.gif فتكات ست الكل Fatakat 667142 مصر – مصر
سبحان الله و بحمده