بسم الله الرحمن الرحيم
اليوم حابه شارككم بأكلة المكدوس يلي هيي من أشهر الأكلات السوريه وخاصه على وجبة الأفطار والعشاءوهيي كتير سهلة بس بتاخد وقت بالتحضير
المقادير حسب شو بدكم تعملو كميه المهم تعرفو ان لكل 20 كيلو بيتنجان بدو10 كيلو فليفله حمراء
ونص كيلو توم ونص كيلو جوز
منبدأ بالتحضير :
منسلق البيتنجان لحتى يطرى بس انتبهو لا تخلوه يستويي كتير مشان ما يهتري بالكبس بعد مايستويي منرفعه عن النار ومننطرو شوي ليبرد بعدين منعمل شق جانبي ومنحشي كل بيتنجانه معلقه ملح والافضل يكون الملح خشن بعدين منصف البيتنجان بعد ما نخلص من التمليح بمصفايه ومنحط عليها قطعه قماش ومنتقلها بأي شي تقيل مشان تنكبس وتروح المي وهي شكل البيتنجان بعد الكبس
بعدين منجي لتاني مرحله يلي هي الحشوه منغسل الفليفله الحمراء بعد ما نكون غسلناها بالمي ونضفناها من البذر
منحطها بالشمس لحتى تنشف وفيكون تضيفو للفليفله الحمراء العاديه فليفله حاره يلي بيحب الحار هي
بترجع لحسب الرغبه
وبعد يوم او أكتر لما بتشوفو الفليفله دبلت منحضر التوم ومنقطع الجوز بالسكين
ومنحضر التوم
وهيك بتكون الحشوة جاهزه مقاديرها بعدين منطحن الفليفله بماكينه فرم اللحمه مع التوم ومنحطهم بمصفايه مشان اذا في مي زايده تروح وبعدين منضيف للحشوه الجوز وشوية ملح وهيك بتكون حشوة المكدوس جاهزه
ومنحشي البيتنجان من نفس المكان يلي حشينا فيه الملح
وهيك المدوس بيكون جاهز لنصفه بالمطربان ومنغمره بالزيت الزيتون
بتمنى تعجبكم هالأكله وبشجعكم تعملوها لأن كتير سهله وطيبه
أطيب بكتير من الجهاهز تبع السوق واذا في اي استفسار ما كتبته
قلولي 
مواضيع هذا القسم برعاية
وردة نيسان وردة نيسان 16928_5.gif سوبر فتكات Fatakat 16928 الرياض – السعوديه