السلام عليكم ورحمة الله وبركاته
كنت فرحانة بحملى ده اوى لان الشهر اللى حلمت فيه كان عندى حسن ظن كبير اوى فى ربنا انى هحمل ووقتها غيرت توقيعى انى عندى حسن ظن فالله وفعلا حملت فى شهر 11 وكانت اخر دورة ليا فى 20 /11
وكنت بقى ادخل موقع ويب طيب اعرف انا بقى كام اسبوع مروا وكده وافرح اوى وكنت منتظرة الشهر الثالث ده يلخص بقى عشان ادخل مرحلة الحمل الوسطى اللى بيبقى فيها كل حاجة حلوة كان معادى ادخل يوم 28 من الشهر ده ابدا لسه الرابع
بس اللى حصل ان يوم الخميس كنت قاعدة عادى وصليت الصبح والظهر والعصر بوضوء واحد داخله اتوضى للمغرب واذا بصدمة رهيبة لقيت دم كتير جداااااااا فالاندر وبعدها وريته لجوزى فقالى عادى متخافيش وانا اتصلت بالدكتورة قالتى خدى مثبت وارتاحى واشوف السبت لان الخميس والجمعة اجازة
وسبحان الله انا بعد ما لقيت الدم اخذت شاور وصليت بقى المغرب والعشا وحاولت امسح بمنديل مالقتش اثار تانية للدم ومنزلش حاجة تانية فقلت الحمد لله
بس وروحت للدكتورة يوم السبت امبارح وكشفت وغابت اوووووووووووى فقلت ليها فى ايه قالتى اصبرى عليا فأنا فهمت انى حاجة وحشة حصلت وقالتى مفيش نبض خلينا نكشف من تحت بالسونار المهبل وبردوا مالقتش نبض
قالتى هو حجمه كان كبير اوى وباين فيه زى تشوهات
انا قولت الحمد لله
بس يعنى انا حزينة وزعلانة من جوه اوى وبقول خير وربنا هيعوضنى بس ضعيفة اووووى
ومش عارفة اعمل ايه حاسة الاجهاض ده حاجة متعبة اوى وخصوصا ده اول حملى وبعد سنة جواز يعنى محملتش على طول
انا حسيت بالايه اللى بتقول فأراد ربك ان يبدلهما خيرا من زكاة واقرب رحما
الحمد لله والشكر لله
بس مش عارفة حاسة الموضوع فيه حسد لان امى مكنتش معرفة حد ومن اسبوع بالتمام عرفت قريابنا وانا عرفت زمايلى فى الشغل وكده ومالحقتش افرح بفرحتهم ليا الحمد لله
جوجو جنى جوجو جنى فتكات متميزة Fatakat 734354 شربين – مصر