فتوكاتى الغالين
ازيكم عاملين ايه
انا بقى النهارده جايه بناء على طلب الجماهيييييييير واولهم حماتى الغاليه وهى فعلا غاليه والله مش بتريق اصلى عرفاااكووو
جايه اوريكم المندى السعودى بس هو جنسيته مصريه مش سعوديه
انا بقى لا عملته بفرن المندى ولا بالفرن الكهربا ولا حتى بفرن البوتجااااااز
عارفه هتقولو عملتيه بحله الضغط
هقولكو غيظ فيكو بردوووو لالالالالالالالالالالالالا
عارفين عملته بأيه
عملتيه بأيه
عملتيه بأيه يابت يام ايااااد
يلا كفياكى رخااامه
عملتو بحله الكسكسى
اه والله مش مصدقينى طبعااااااااااااااااااا
منا فتوكه بقى
المهم ندخل بقى بسرعه على الجريمه بكل تفاصيلها
صلو على رسووووول الله
بصو انا طبعا وللأسف ماصورتش الخطوات لانى ماكنتش اعرف انى هنفع وهنجح لكن انا هحاول اجيب صور تقريبيه للى عملته
لكن النتيجه النهااايه الحمد لله بتاعتى انا صورتها وانا فرحااانه وهاين عليا ازغرط
بنجيب اولا الجثه اللى هى الفخده او الكتف الضانى
بصراحه حماتى كانت عندها فخده صغنونه حلوه كده وكام حته ريش على كام حته معرفش اسمهم
وكمان بنجيب الارز فى ناس بتعمل بالكوبايه لكن انا عيارى بالكيلو فعملت كيلو ونص ارز بسمتى لان احنا كنا كتير ماشاء الله
وبتجيبى توابلك
" توابل كبسه * ورق لورا * حبهان * قرفه * كركم * ملح * فلفل * كمون * ومرقه دجاج وانا هنا استخدمت مرقه دجاج ومرقه لحم "
وجزر وتقطعبه شرايح
وبصل وليمون وطماطم لزوم الديكور الفنش يعنى
ندخل بقى على طريقه تنفيذ الجريمه
بسم الله
اولا غسلت الجثه كويس جدا وحطيتها فى الحله على النار وحطيت رشه فلفل اسود وحبهان ورولا وغطيت عليها لحت ماتنزل ميتها وكمان تشربها وعلى متم ذلك كنت غليت حله ميه وروحت مزوداها بيها وغطيتها تانى وسبتها حوالى ربع ساعه خدتلها كام قالبه محترمين
كنت انا وقتها جهزت الارز وغسلته
وجهزت تتبيله الكبسه اللى هى بصله مقطعه ودبلتها مع التوابل والقرفه ومرقه الدجاج وكمان كركم
وكمان جهزت الحاجه اللى هزوق بيها وجهزت للسلطات اللى مش هنساكو فيها بردو وهفتش لكم سرها
المهم بعد ماللحمه دخلت فى السوا كده نشلتها وفى شوربتها حطيت الارز وفوقه التتبيله او الصوص بتاعه وقلبته كويس وظبط ملحه وحطيتله زيته وروحت جبت الجزر وحطينه على وشه كده وروحت جبت المصفاه العلويه بتاعه الحله وهوب وروحت حاطه فيها اللحمه من فوق بس قبل ماحوطها كنت متبلاها بالملح والفلفل ومكعب مرقه لحمه ورسيتها فى المصفاها وغطيتها كويس
وسيبتها لحد ماغلت وروحت وطيت عليها النار خالص وسبتها حوالى ساعه وربع بس كنت من حين لاخر ابص عليها وعلى الارز عشان لو محتاج ميه او محتاج ملح بس الحمد لله كان مظبوط
وبعد ماطمنت ان روحها طلعت قصدى ريحتها طلعت واستوت تمام روحت جرى جايبه الصينيه اللى هقدم فيهااااااااا
وهوب قلبت حله الارز ومن فوقها فردنا الجثه هههههه الفخده يعنى وكام حته كده جمبها وروحت مزيناها بالبصل والليمون والطماطم
وهنا انا نسيت خالص اعمل الفحمه واطشها بالزيت لان سلفى كان قلاب يفترس اللى قاعدين من الجوووووع
بس والله مافرقت ولا بان وطعمه كااااااااااان جنننااااااااااااااااان
وقدمتها هى والسلطه اللى عملتها وكمان جاتلنا فرخه صعيديه روحنا قايمين بالواجب معها وحلفنا عليها تقعد معانا على الصينيه
ودى كانت النتيجه
معلش موبايلى تصويرووو بعافيه شويه
اما بقى عن الحبشتكانات
السلطات يعنى
فانا عملت نوعين
اول نوع
اللى بيسموه الدقوس
وده عباره عن كسبره خضرا وبقدونس اخضر نص حزمه ونص حزمه
وطماطم انا حطيت اتنين
وبصل واحده صغنونه
وتوم اربع فصوص
وتوابل وملح ونص لمونه
وكله فى الخلاط
والف هنااااا
انا قولت فى الاول دى صور تقريبيه عشان محدش يقولى انى سارقه الموضوع انا ماصورتش غير الفاينل بس
التانيه
سلقت ثلاث حبات طماطم وقشرتهم وجبت بصله صغنونه واربع فصوص توم وملح وتوابل ونقطه خل وممكن فلفل وبرده فى الخلاط
وكانو والله تحفه
يلا ايه رأيكم بقى
مستنيه كده احلى تقيم من اديكم اللى تستاهل قطعها ده لو مقيمتش لكن لو قيمت تستاهل بوسه وحته لحمه كمااااااااااان
وبالله عليكم دعوه حلوه ليا انا وزوجى واولادى ان ربنا يهديهوملى
مواضيع هذا القسم برعاية
زوجى واولادى هما حياتى زوجى واولادى هما حياتى 604130_3.gif فتكات رائعة Fatakat 604130 الهرم – الجيزه