سبب اهتمامى بنشر الموضوع هو كثرة المواضيع عن الشاى الاخضر و اللى معظمهم مكرر ومنقول بشكل غريب
و بعض التناقضات عن تجارب بعض الناس و اللى تقول انه ضارها و هتبطله و اللى تقول انه نفعها وملوش اضرار ..
و التفسير الوحيد للمواضيع دى .. بعد قراءة ارشادات طبية هو الاستخدام الخاطىء للشاى الاخضر .. والاوقات الخاطئة عند شربه
فى البداية احب اقول ان اكثر الدول انتاجا للشاى الاخضر هى الهند ودول شرق اسيا زى الصين ,, واليابانيين من عاداتهم شرب الشاى الاخضر و قليل لما نشوف حد بيشتكى من اثار جانبية منه .. فده تفسيره ايه ؟
و عشان هسيب رابط كتاب مهم فى اخر الموضوع ,, شامل لفوايده العلمية !!
الشاى الاخضر بيعتمد على حاجات منها :
1 : ان الشاى الاخضر (الخام) احسن من المُفتت (المطحون) ,, والخام بيكون ورقه سليم مش مفتت زى اللى منتشر .
و السبب فى ده .. لان الزيوت العطرية (اساسية طبعا) بتبقى زيوت متطايرة مش سايلة فممكن تروح بسهولة فى تقطيع الكيس مثلا
فما بالك بغليه مع الماية !!!
وعشان كده ظهرت كبسولات منزوعة الكافيين .. و على خلاصة العشبة فى بعض المنتجات
2 : طريقة استخدامه ,, واحسن طريقة للاعشاب عامة مش الشاى بس ,, بأن لايتم غليه مع الماية ,, اعتبريه شاى كشرى ,, يعنى يتم غلى الماية لوحدها بعدين تضيفى العشبة و تنقيعها لمدة 10 دقائق على الاقل و تغطيها كويس (البراد)
اما لو كانت بذور زى الحلبة فممكن تحطيها عند فوران الماية و توطى النار (تنقصى شعلة البوتوجاز)
3 : الشاى الاخضر متشابه مع الشاى الاسود العادى ,, فى انه ممكن يسد الشهية و يسبب الارق و لابد من شربه اذا كان بعد الاكل يكون بعد ساعة على الاقل
الاستخدام الداخلى :
ناس كتير بتفتكر ان الشاى الاخضر للى عايز يخس بس ,, و لكن اللى ميعرفوش كتير ان دول اسيا بتشربه عشان تأخر ظهور علامات الشيخوخة !!!
اكتر الاعداء للبشرة هم : اشعة الشمس (الفوق بنفسجية) , الشقوق الحرة (اساس التجاعيد) , ضعف او سوء التغذية , تأثير الجاذبية على الجلد (ممكن يسبب على شد الجلد لاسفل مما يسبب حدوث التجاعيد)
و دول اهم الحاجات الرئيسية للموضوع ,,
اللى عايز يستخدم الشاى للتخسيس :
يشرب الشاى بدون اضافة السكر /لبن …. فـ هيبقى فيه 4 سعرات حرارية , و يفضل خلطه بالنعناع / مغلى البردقوش
و يشرب تلات مرات يوميا
اللى عايز يستخدم الشاى بدون فقدان اى وزن :
يشربه بالسكر عادى ,, و يبقى اكثر حاجة 2 كوب فى اليوم .. و يفضل استخدامه موضعيا اكتر من شربه للاشخاص الذين لديهم نحافة مثلا
اهم الفوائد للشاى الاخضر عند شربه :
1 : يأخر ظهور علامات الشيخوخة : لانه يعتبر من افضل مضادات الاكسدة , ومفيد جدا للى بيعانوا من اضرار اشعة الشمس
2 : يزيد مناعة الجسم : و مش بس كده ,, احنا طبعا بنعانى من الاثار الجانبية للادوية كمثال زى ادوية الغدة الدرقية من نوعية (thionamides)
لعلاج النشاط الزائد للغدة و اللى بتسبب تدمير كرات الدم البيضاء .
3 : ممكن تستعمله فى الطبخ (بشرط ماتزوديش منه عشان ميأثرش فى الطعم) :
الابحاث اكدت ان الشاى الاخضر بيقى من السرطان بأنواعه ,, و مع الحاجات اللى مبقتش مضمونة الايام دى زى اللحوم فمقدمناش غير اننا نستخدم اى حاجة تقلل من المواد المسرطنة ليها ..
ولضمان فاعلية عمل الشاى الاخضر بدون فقدان فوائده :
1 : اختيار الماء مهم : و يفضل مياه الينابيع (الحنفية) / ماية من فلتر نقى .
2 : درجة تسخين الماية : يعنى لاتكون دافية و لاتكون تم غليها وقت كبير
3 : كمية الشاى : زى ماقولت الشاى بيبقى منقوع ,, فعشان كده المقدار بيبقى معلقة ضغيرة للفنجان الواحد
4 : مدة التقع : نقع الشاى الاخضر لمدة دقيقة-3 دقائق .. اذا زادت عن 3 دقايق هيبقى طعمه مر
5 : صب الشاى بيفرق :
يفضل لو كان براد و يكون جواه مصفاه / ممكن مصفاة لوحدها … و الصب يكون على مرة واحدة ,, يعنى محدش يشتكى من انه بيطلع خفيف او تقيل ومر لو كانت بتسيب شوية للاخر .
الاستخدام الخارجى :
الشاى الاخضر احسن بديل للى مش عارف يجيب صن بلوك و اللى من وجهة نظرى بعتبر اسعارها مبالغ فيها ,, و اذا كانت منتجات طبية ليها نتائج فعالة ممكن يمشى الحال ..
للــــــــبشرة :
ممكن تستخدمه بديل لماء الورد كتونر … يعنى تحط شوية فى بخاخة و تستعمله كمطهر و قبل التعرض للشمس .
بشرط يكون المنقوع مركز .. يعنى كل فنجان 3-4 ملاعق بدل واحدة
كماسك للبشرة … و دى مشاركات لفتوكات عن ماسكات بالشاى الاخضر :
ماسك الزبادي والشاي الأخضر علاج لحروق الشمس
مجموعة وصفات من الشاى الاخضر
كريم الشاي الاخضر لبشرة نضرة
الشاى الأخضر لبشرة ناعمة و صافية
و ممكن كطارد للحشرات زى الذباب والناموش : عن طريق حرق كمية منه كالبخور ..
و الان مع الكتاب الرائع و الشامل عن الشاى الاخضر :
للتحميل
رابط اخر
وفى نهاية الموضوع ردودكم هى الاساس للموضوع ,, لاداعى لشكرى فكتابة رد يكفى بالنسبة ليا
اتمنى تفيدونى بتجاربكم ……..وبالذات فى موضوع الصن بلوك لانى شوفت موضوع لفتوكة قالت على طريقة عمل صن بلوك
و كانت الطريقة كالاتى : كريم زنك + زيت خروع /لوز مر + زيت جوز الهند .. بس ماشوفتش حد جربها و معظمهم قالوا ان الزيت بيسمر الوجه , فهل اذا اضفنا مغلى الشاى الاخضر لكريم الزنك هيبقى احسن ؟؟
سؤال اهو عشان التأكيد على ان الموضوع معتمد على التجارب و البدايل المتاحة .. يعنى لو فيه حاجة تخلينا نستغنى عن الشاى الاخضر مش هتردد على انى اقولها لفتوكاتى …
ملحوظة : الموضوع من مجهودى الشخصى , و الروابط الموجودة بالموضوع هى مجرد اضافات و ليست مراجع
اتمنى تكونوا استفدتم بمعلوماتى ,,
شوية ثقافة شوية ثقافة images/avatars/bigheadsm.gif فتكات نشيطة Fatakat 1148493 الجيزة – مصر