اولا طبعا لازم نبدا بالسلام : السلام عليكم و رحمة الله و بركاته
انا كنت كنتبت موضوع هنا امبارح عشان كنت محتاره اعمل ايه و الحمد لله وصلت لنتيجة جامده جدي
و قمت انهارده مشمره و داخله المطبخ و هاتك يا طبيخ
ندخل بقا في الموضوع انهرده ليلة راس السنة كل سنه و انتو طيبين و يا رب تتحقق كل امانينا في السنة الجديدة دي يا رب
زي العنوان ما قال انا عملت لحبيبي انهارده كام صنف كده بس عجبوه الحمد لله
اول حاجة طبعا هبدا بسيد الطعام الفراخ المشوية .. هيا مش فراخ بالزبط هيا دبابيس مشوية
تبلتهم امبارح بزبادي و لمون و ملح و فلفل اسود و كـزبرة ناشفة و كمون و كركم و شوية خل و سبتهم في التلاجة بتتبلتهم للنهارده
و داي صورتهم و هما في الطبق و لسه مطلعاهم من التلاجة
و بعد كده حتطهم في صنية الفرن الخاصة بالفرن نفسة كده عرفتوها ؟ انا اول مرة استخدمها بس طلعت جامده جدددي
و سبتها حوالي تلت ساعه عبال ما ريحتها بدات تبان و فتحت الفرن و هزيتها شوية لقيتها مش لازقة الحمد لله
و خليتها حوالي ساعة و نص كل شوية اقلبها على الناحية التانية و لما حسيت ان التتبيله بدات تنشف رحت هوبا جايبة شوية ماية و لبن و زيت زتون خلطهم و رحت زريبووووو فوق الفراخ بس شوية صغيرين مش هنسلقها يعني بلاش نصاحة و ده بقا شكلها بعد ما طلعتها من الفرن و كانت ريحتها قالبا الدنيا
و هنا بقا لما غرفتها و رصيتها في السرفيز و حتطيت عليها شوية حبشتكنات عشان الشكل .. انا قلت لنفسي الواد جوزك غلبان يا بت دلعيه حبه كده في راس السنة و بعد كده ارجعي نكدي عليه من جديد ههههههه ايه رايكو شامين الريحة وااااو
ندخل بقا على الصنف التاني : صنية جلاش باللحمة كان نفسي في رقاق بس للاسف مش بلاقيه خالص هنا لاننا قاعدين في الامارات
طبعا اول حاجة هنعصج اللحمة .. ندبل بصلتين متقطعين على النار لما يدبلو نحط عليها البهارات فلفل اسود و كمون و كـزبرة ناشفة و قلبي لما تطلع ريحتهم الحلوة حطي اللحمة المفرومة و قلبي و لما تقرب تستوي ضيفي معاقة قرفة مطحونة و ملح بس اوعو تضيفو الملح في الاول عشان اللحمة مش تعمل كتل و ده شكلها و انا بعصجها
و طبعا تجيبي صنية و تدهنيها شوية زبده او زيت بس انا بصراحة دهنتها بزيت زتون عشان مش تكون تقيله لان معدة جوزي انا قضيت عليها بطبخي و شطارتي ههههههه .. المهم بعد ما تدهني الصنية رصي نص كمية الجلاش و بين كل طبقتين ادهني شوية سمنة صغيرين و بعدين ضيفي اللحمة اللي
عصجتيها كده و بعد كده هتحطي بقيت الجلاش و برده بين كل طبقتين شوية سمنة لحد ما تخلص
معاكي لفة الجلاش و بعد كده قطعيها بسكينه حامية و في طبق افقسي بيضة و نص كباية لبن و شوية ملح و فلفل اسود و روحي هووووووووب فوق صنية الجلاش و هزيها شوية بحيث السوائل تدخل بين قطع الجلاش كدهوووو و ارمي جوا الفرن
وتطلع كده
و ده بعد ما غرفتها و اتفلسفت حبه في تقديم شكل الطبق كدهوووو
———————–
بصو بقا يا فتوكات يا حبايب قلبي الوصفات اللي بعد كده افتكاسات مني بس طلعه تحفة
اولا هبدا باللازنيا سلقت ست قطع لزانيا بس و عملت بيها صنفين الاول اللي هوا …….
#( لفائف اللازانيا ).. جبت لحمة مفرومة نية و قطعت بصل صغير خالص و شوية توابل و خلتطهم ببعض كويس و صبعت الكفته 4 صوابع كبيرة و حطيتها في حلة و عليها كوبيتين ماية و حطيتها على النار مش تخافي مش هتفك منك ابدا بس كشت و صغرت اوي و ده كان شكلها بعد ما اتسلقت
يا لهووي موبايلي هنج مني مش عارفة انزل من عليه الصور .. مهو شرب شوية بخار انهارده من الحلل تخلية ينطق ..بس مش عايزة اقلكو ممكن يقولي ايه عشان الموضوع ميتخذفش ههههههههه ده انا تعبانه فيه
نرجع لمرجوعنا الصورة اهييييه لو في حد لاحظ انا كاتبة 4 صوابع كفته و هما في الصورة خمسة ده لاني التهمت صباع طبعا نياهاهاهاهاها
# مش تنسو اني سلقت اللازانيا…..و بعدين جبت شريحة منها دهنتها مايونيز و ماستردة و حتطيت صباع كفته اللي كش و حتة فلفل اخضر و لفيتها
كده
و حطيت الاربع لفائف جنب بعض في صنية فيها ورق المونيوم (عشان تسهل شيلها
و مدهومة زيت و حطيت على كل لفافة شوية بابريكا ( الفلفل الاحمر الحلو ) وجننة موتزريلا و وده شكلها قبل ما ادخلها الفرن
و ده بعد الفرن و غرفتها و طبعا الحبشتكنات عشان العين بتاكل قبل البطن اللي بعده…
——–
بيتزا اللازانيا: جبت طبق و خلط فية مايونيز و كاتشاب و ماسترده و زيت زتون و شوية صغننييييين شطة .. و طبعا انا كنت سلقة اللازانيا جبتها قطعت اطرافها لانها كانت مقطعة و سبت الجزء السليم و دهنتها بالخلطة اللي لسه عملاها دي كده
و قطعت شرايح فلفل كاملة مش تقطعوها صغير لاء دواير احسن و حطيت عليها لحمة مع=جة كنت سايبة شوية من لحمة الجلاش و فوقها شرايح زتون و اخر طبقة طبعا الجبنة الموتزريلا و في الفرن يا باشاااااااااا بجد طلعت جناااااااااااااااااااااااااااااان
——
# الوصفة اللي بعدها بيتزا برده بس (( بيتزا الباذنجان )) لاني عايزة اعمل حاجة خفيفة لمعدة جوزي حبيبي
اولا قشرت البتنجان بحيث يكون خط و خط يعني جزء من القشرة موجود و جزء لاء كده و شويتها في الفرن و لما استعجلت شوية عشان اخلص حطيت نقطة زيت زتون في طاسة و شويتهم على النار من فوق كده
و عملت فيها نفس اللي عملته في اللازانيا بس هنا انا قطعت الفلفل الاخضر مش حطيته شريحة على بعضها و فوقة اللحمة المعصجة و زتون و موتزريلا
و ده شكل بيتزا الباذنجان و بيتزا اللازانيا قبل ما يدخلوا الفرن و رشيت عليها بابريكا
و لو ملاحظين الفلفلة اتبقت من الفلفل اللي قطعته قلت خليني افتكس حاجة بيها … عملت ايه بقا يا فتوكات بردة حشيتها من خلطة اللازانيا مايونيز و كاتشب و ماسترد و زتون و جبنه موتزريلا لان اللحمة خلصت و انا غرفتها في نص طبق الفراخ اللي فوق
و رحت هووووب في الفرن يدوب الجبنه ساحت .. و ده شكلها بعد ما طلعت انا جعت تاني ولا ايييييييه
اخر طبق السلطة طبعا عملت سلطة شامية اسمها فتوش .. قطعت خيار و طماطم و كسلت اقطع فلفل و بشرت جزر و كسرت عليها عيش شامي محمص و طبعا ملح و فلفل اسود و شوية خل و زيت زتون بس كنت بدات اتعب بقا فاستغنيت عن الحبشتكنات في الطبق ده
و هيا دي النتيجة بس على مين نسفناه بلا تزين و حبشتكنات بلا كلام فاضي مش معانا الكلام ده
و اخيييييييييييييرااااا هيا دي سفرتي لحبيب قلبي ليلة راس السنة ليا انا و حبيبي
جوزي جه يقعد على السفرة قالي لالالالالا افرشي على الارض عشان اكل و انا ممدد و ساند ضهري .. شكله كده كان عايز يتفنن في نسف الاكل هههه هوا اصلا لما شاف الاكل قالي ايه الجمال ده بيني و بينكم كنت عايزه ارقص بس قلتله بالف هنا يا حبيبي و فرشت على الارررررض ..
———
عايزة تتاكدي ان الاكل ده كاااان طعمه حلو .. طيب تعالي ورايا بشوييييييش و شوفي اثار المعركة
#
#
#
#
#
#
#
#
#
#
#
#
#
#
#
#
#
كان في حرب هنا مش بني ادمين بتاكل ابدا هي هي هي هي الاطباق نظفت حاجة تكسف
و كده ابقا نقلت كل حاجة بالتفصيل حتى النتيجة النهائية يا رب تكونو استفدتوا
و عايزة التقييييييييييييييييييييييييييم بقا يا حلويين لان ضهري اتقطم من القعده دي
و شجعوني بقا دا اول موضوع طبخ ليا و عشان ابقا اقلكو على كل افتكساتي الجديدة
و كل سنة و انتو طيبييييييييييييييييييييييييييييييييييييييين مواضيع هذا القسم برعاية
!! عاشقة السهر !! !! عاشقة السهر !! 455755_2.gif فتكات هايلة Fatakat 455755 الغربيه – الامارات