طبعا فى منكم كتير زيى جربو يعملو الفينو فى البيت وطلع معاهم تقيل وقلبه مكلكع ومش زى اللى بنشتريه لا من قريب ولا من بعيد المهم انا بعد ما زهقت وقررت انى ارحم جوزى من وجع البطن وقلت امرى لله اشتريه من بره ومجتش على دى يعنى جربت مره اخيره وقولت استفيد من كل الوصفات اللى قراتها وجربتها وبالصدفه نجحت وبتقدير جديد جدا دا لو مكنش امتياز وقولت اشارككم بالوصفه جايز حد يحب يجرب ويلا نبتدى
المقادير : نصف كيلو دقيق +3 ملاعق كبيره سكر +نصف ملعقه صغيره ملح +2ملعقه كبيره خميره +نصف كوب لبن +2 او 3 ملاعق زيت +ماء دافئ للعجن
طريقة التحضير
انخلى الدقيق وبعدين ضيفى الخميره والسكر والملح وقلبيهم فى بعض واعملى حفره فى النص وضيفى الماء الدافئ (كمية الدقيق دى بتحتاج حوالى ربع لتر ماء بس احنا هنضيف نص الكميه بس عشان نعمل حساب اللبن ولو لقيتى العجين محتاج ضيفى شويه بشويه )وبعد كده اعجنى كويس اوى اوى يعنى اعجنى بذمه وكل ما تعجنى اكتر العجينه هتحتاج ماء وده المطلوب (لما العجينه تجمد ضيفى شوية ميه صغيرين فى كف ايدك واعجنى تانى يعنى متكتريش )لحد ما تحسى انها بقت ملساء وناعمه ومش محتاجه ميه تانى ضيفى بقى الزيت واعجنى مره تانيه لحد ما الزيت يختفى فى العجينه خالص وبعد كدا غطيها وسبيها فى مكان دافى لمدة ساعتين تلاته لحد ما تخمر اوى اوى ولما تخمر قسمى العجينه كور حوالى 8 او 10 حسب الرغبه وافرديهم بسمك حوالى اقل من نص سم وبعدين شكليهم زى ما انتى عايزه فينو عادى او كيزر ورصيهم فى صينيه مدهونه زيت وابعديهم عن بعض بعد كدا هاتى بيضه واخلطيها مع شوية لبن وسكر وادهنى وش العيش وسبيهم يخمروا تانى مش لحد ما يتضاعف الحجم (خلى بالك العجينه لو مخمرتش كويس هيبقى العيش تقيل ) وبعد ما يخمر سخنى الفرن على درجة حراره 170 ودخليهم الفرن لحد ما الوش يحمر حوالى 20 او 25 دقيقه فى بعض الافران اللى بتحتاج انك تشغل الشوايه فى الأخر عشان تحمر الوش وبالهنا والشفا
مواضيع هذا القسم برعاية
راغبة فى رضا الله راغبة فى رضا الله فتكات نشيطة Fatakat 481570 القاهره – مصر