ازيكم يا حبايبى وحشتونى كتير وكل سنه وانتن بخير جميعا
اللهم بارك لنا فى رجب وشعبان وبلغنا رمضان
واحنا فى ايام كريمه وفى انتظار شهور فضيله ربنا يتقبل منا
ويعننا جميعا على طاعته
النهارده موضوعنا سهل وبسيط وان شاء الله ينال اعجابكم
زى ما انتم عارفين طبعا ان انا مش بحب الأكلات الصعبه
ولا الوقوف كتير عشان اعمل اكلات معقده بحب اجيب من
الأخر يعنى هههههههههههه مع انى بحب اقعد اخترع بس بتعب من كتر
الوقوف وكمان بقى ايه بصحى متأخر يعنى اخر انتخه ههههههههههه
انا عارفه انى انا بلوكلوك كتير بس لازم اعملكم المقدمه المتينه طبعا
هو انا يعنى بنزل مواضيع كل يوم لازم اخد فرصتى
ندخل على موضوعنا اخيرا
نبدأ بسم الله
اولا كباب الحله
هنجيب لحمه ويا حبذا لو كان فيها نسبة دهون ولو حمرا برده مش هتقول بس الدهون بتديلها طعم
تانى فعلا وكمان بتكون طريه مش ناشفه معاكى
بنقطع اللحمه مكعبات قطع مش كبيره يعنى زى كده
وبعدين بنجيب حلتنا الأموره ونحط فيها شوية زيت على قطعة سمن بلدى
انتى عايزه زيت بس براحتك سمنه براحتك زيت براحتك يعنى كل واحد زى ما
هو متعود يعمل
وننزل باللحمه بتاعتنا ونشوحها كويس شوفوا لونها بدا يتغير معانا ازاى
وطبعا واحنا بنشوح اللحمه هتنزل ميا كتير معانا بالشكل دا
انا مش هاقدر احط عليها اى اضافات الإ لما ميتها تنشف خالص معايا ولما تنشف الميا
اعمل حفره كده فى النص مافيش ميا خالص اهو
احط التوم بالشكل دا فى النص واشوحه لواحده شويه وبعدين اقلبه مع اللحمه
قلبت التوم مع اللحمه اهو
انا هنا قطعت بصل جوليانوا اهو وحضرته
وهاحط بعد كده البصل ان شاء الله البصل على اللحمه واشوحه برده شويه
واحط شوية فلفل اسود وشوية بهارات لحمه وقرفه وزنجبيل واقلب برده
وبعد كده ازود كوباية ميا بكوباية ميا لحد ما تكمل التسويه بتاعتها
وطبعا كل واحد حسب لحمته بتستوى فى اد ايه بس اهم حاجه لما نيجى نسويها نزود كوباية ميا بكوباية ميا
مش نملا الحله ميا على اخرها احنا مش بنسلقها
وبعدين فى الأخر خالص لما تستوى فى اخر مره بنزود ميا نحط الملح بتاعنا وممكن نزود كمان شوية فلفل
صغيرين وشوية بهارات لأن طعم التوابل اللى حطناه فى الأول بيضيع عشان الميا اللى
بنزودها كل شويه ويا سلام بقى لو عملنلاها فحمه ولعناها على شعلة البوتاجاز كمان اوعى وشك وطعم تانى خالص
ونحط طبق فى وسط الحله او ورقة فويل كده ونحط فيها الفحمه وهى مولعه ونحط عليها شوية
زيت ونحط غطا الحله على طول
وجينا بقى للحظه الحاسمه والشكل النهائى والصوص بتاعها بقى مش قادره
اقولكم على طعامته والله انا مش بشكر فى الأكل عشان بتاعى
بس فعلا كان طعمها لذيذ الحمدلله
والحمدلله شكلها باين انها كويسه والصور مش بتكدب ومن كل اتجاهات ومن كل زاويه ممكنه
زووووووووووووم بقى
وكمان لونها جميل وكويس عشان البصل والتوم مش اتشوح الأول وبعدين نزلنا باللحمه
لأن كده بيخلى التوم والبصل من كتر التشويح فيهم لواحدهم وبعد كده مع اللحمه
بيتحرقوا وطبعا بيمرروا اللحمه كمان
وكده انا خلصت الحمد كباب الحله
انتظرونى مع المكرونه بالسجق
تاااااااااااابعوووووووووووونى
مواضيع هذا القسم برعاية
mero_sh mero_sh 326490_4.gif فتكات غالية قوي Fatakat 326490 الدقهليه – القاهره