المقلوبه
باعملها بطريقة الشيف منال العالم .. ممتازه
مع بعض الاضافات والملاحظات هاقولكم عليها بالتفصيل اثناء الشرح
النهارده هنعملها بالكوسه والبدنجان واوقات باعملها بالبدنجان والبطاطس .. بتبقى تحفه
وبالقرنبيط برضه جميله جدا
على فكره الرز المصري افضل في المقلوبه عن البسمتي لان النشا فيه اكثر فبتتماسك بعد ما تقلبيها ومش بتتفكك في الطبق
وممكن بالبسمتي .. بس اهم حاجه ان ميته تنشف تماما
بعد ما تطفي النار وقبل ما تغرفيها تسيبيها مش اقل من ربع ساعه
وبظهر المعلقه تضغطي على وش الحله علشان لما تقلبيها تبقى متماسكه ومش تتفرد في الصينيه او الطبق
المقادير
2ونصف كوب رز مصري
حبتين كوسه حجم كبير وطويله
حبتين بدنجان حجم طويل
1 كيلو دجاجة ، مقطعة الى ارباع
او نص كيلو لحمه
1 حبة كبيرة بصل ، أرباع
1 ملعقة كبيرة ملح
4 – 6 حبهان
2 – 3 قطعة ورق لوري
1 عود كبير قرفة
4 – 6 حبة فلفل اسود ،صحيح
للرز
1 ملعقة صغيرة كركم
1 ملعقة صغيرة قرفة
1 ملعقة صغيرة بهارات مشكلة
2/1 ملعقة صغيرة كمون
قطعة ليمون مجفف
3 حبات قرنفل
3 حبهات حبهان
رشة جنزبيل
4/1 ملعقة صغيرة فلفل اسود
2/1 كوب صنوبر مقلي
زيت ذرة
الطريقة
1) في حله ضعي الماء ، البصل و الملح، واسلقي فيه الفراخ او اللحمه
2)شيلي الريم عن سطح الشوربه وضيفي الحبهان ، وورق اللورا، عيدان القرفة و الفلفل .
3) غطي الحله واتركيه على نار متوسطة لحد لما الفراخ او اللحمه تستوي
4) خرجي قطع الفراخ او اللحمه و صفي الشوربه، ضيفي المزيد من الميه الى ان يصبح مقدار المرق 3 كوبايات وربع
(لكل كوباية رز مصري كوباية وربع شوربه والرز البسمتي كوباية ونص شوربه)
5) اضيفي البهارات المطحونة للشوربه (الكركم، القرفة، البهارات، الكمون، الفلفل الأسود ) وخليها سخنه
6) أثناء سلق الفراخ ،، قطعي الكوسه والبادنجان بالطول لشرايح سميكه
7) بدل القلي وعلشان نخليها صحيه اكثر
على شواية فوق البوتاجاز وتكون مدهونه زيت او ممكن استخدام صينيه تيفال قديمه .. نشوي شرايح البدنجان والكوسه لحد لما يتحمروا
او ممكن نشويهم في فرن مسخناه قبلها على حراره عاليه جدامن فوق وتحت علشان البدنجان ما يسود
8) اغسلي الرز وصفيه وقلبي عليه معلقتين زيت او شوحيه في معلقتين زيت علشان يطلع مفلفل ويستوي بسرعه
9) في حله استانلس او تيفال متوسطة الحجم ،، ادهنيها بالزيت وفي قاع الحله رصي طرنشات بصل سميكه وطرنشات طماطم وطرنشات فلفل اخضر
10) ثم رصي شرايح البدنجان والكوسه بحيث الشريحه تغطي من اول القاع لحد الجوانب فوق
11) وزعي الأرز (ممكن نخلط مع الرز جزر مبشور وبسله وممكن شرايح فلفل حار بيبقى خطيير)
ثم صبي المرق الساخن المبهر فوق الرز بحرص، لكي لا يختلط الرز مع بقية المكونات .. المرقه بتكون في نفس مستوى الرز
وضيفي على وجه الحله 3 حبات حبهان وقرنفل وقطعة الليمون المجفف والجنزبيل
12) اتركيه على نار متوسطة الى ان يغلي.
13) خففي النار، غطي الحله ر واتركيه 30 – 35 دقيقة الى ان يتشرب كل الماء و ينضج الأرز ..
ما تقلبيش الرز خالص اثناء السوا ويفضل تعملي خروم بايد المعلقه الخشب علشان البخار يطلع لفوق ويسوي الارز على الوجه بدون ما تقلبيه
14)نطفي النار وننتظر ربع ساعه قبل غرفها .. نشيل حبات الحبهان والقرنفل من على وش الحله ونضغط علي الرز بظهر المعلقه
ثم نقلبها فوق الطبق ،
وممكن توزيع المكسرات والزبيب عليها.
15) حمري الفراخ او اللحمه وتتقدم مع المقلوبه
طبق مميز للعزومات .. ابهري بيه ضيوفك في رمضاان
أحبكن في الله ولا تنسوني من صالح الدعاء
مواضيع هذا القسم برعاية
مرسم مرسم 138950_1.gif فتكات ست الكل Fatakat 138950 الاسكندريه – مصر