صباح الورود على اجمل بنات
بقالي فتره غايبه عن قسم المطبخ ومانزلتش جديد
والنهارده موعدنا مع الكفته المشويه
ومانساش الشكر لمراميرو لاني من خلال موضوعها خدت بالي من موضوع تصفية البصل من ميته
المكونات
استخدمت نص لحمه بلدي مفروم ومفروم عليه قطعة لِـــيَه
وبصلتين مفرومين
وطمطمايه معصوره في الكبه
وصفيت كل حاجه من ميتها حتى اللحمه كنت بعصرها في المصفى جزء جزء عشان ماخليش فيها اي ميه
واسفه لاني ماصورتي الخطوات دي لان ايدي كانت ماتنفعش تمسك كاميرات خالص
خلطت البصل والطماطم واللحمه المفرومه والبهارات (فلفل اسمر كتير وملح وكمون )
وخليت كل المكونات تتجانس مع بعضها
وبعد كده بدأت أصبع الكفته على الأعواد الخشب عشان نعمل فيها التجويف
ورصتها في الفرن
سبتها لحد ما تستوي والدهون نزلت منها وبعد كده فتحت عليها الشوايه
وجهزت الفحم
وجهزت طبق التقديم
والسلطه
والطحينه الروعه
…….
نيجي بقى لــأجمل طريقه فى تخزين التوم
طبعا كلنا بـ نمل من تقشير التوم وخصوصا لما يكون فى اكله هنستخدم فيها التوم بنعتبره شغلانه لوحده
انا بقى جيت عملت حاجه كده على طريقة تعب ساعه ولا كل ساعه
وخصوصا بعد ما شفت فـ فرع مترو وسيمزو برطمانات التوم المفروم والله صغنونه جدا جدا وبــ 18 جنيه
قلت طيب ما انا اعملها ومنها اوفر وقتي وفلوسي وتعبي وكمان احافظ على التوم من انه يبوظ من الركنه
لان استخدام التوم مش يومي زي الطماطم او البصل اللي دايما بنستخدمهم فى الطبيخ
اول خطوه رحت حضرت كام راس توم كده ونقعتهم فى ميه عشان يكون سهل التقشير
وبعد كدا بدأت اخد راس واقشرها وعلى ما تخلص يكون الباقي داب اكتر فى الميه واقشر غيرها
خدت جزء من الكميه وحطيته فى الكبه
شايفين بعد الفرم
وبعدين حطيته فى برطمان وبدأت افرم الشويه الباقيين
وكدا بقى عندي برطمانين توم مفروم وجاهز وسريع
فتحت واحد اللي هستخدمه الاول وحطيته فالتلاجه والتاني في الفريزر لما الاولاني يخلص ابقى انزله التلاجه
وكل ما تفتحي البرطمان بتلاقيه توم فريش ووقتك هيتوفر وهترتاحي من ريحة التوم ومواله
وشوفي بقى فتره اد اييييييييييييييه
…
معلش طولت عليكم
ربنا يسعدكم جميعا
وكل عام وانتم بخير
وعيد سعيد عليكم يارب مواضيع هذا القسم برعاية
روح الرومانسية روح الرومانسية 183019_6.gif سوبر فتكات Fatakat 183019 الغـــــــردقــــــه – مصـــــــــــر