ازيكو يا حبايبى
وحشتونى طبعا
فى البدايه كده من فضلكم
( ادعوا لجارتى طنط ام حماده بالرحمه والمغفره حتى لو فى سركم )
تانى حاجه
احب اشكر حبيبه قلبى واختى ((( ام حور كاتى )))
هى هديتنى بهديتين غاليين عليا اوى
اللى هما صور الترحيب اللى فى اول وفى اخر الموضوع
متحرمش منك ابدا يا ام حور
وربنا يقومك بالسلامه ويرزقك بالطفل السليم المعافى وتفضلى منوره المدونة دايما يا حبيبه قلبى
طيب يلا ندخل على موضوع الاكله
انا النهارده عملالكم اكله لازم تجربوها لانها فعلا ممتازه
تحفه من تحف الزمن بجد
ميزه الاكله دى انها تنفع غدا وعشا وفطار لو تحبى هههههه
وممكن تاكليها جنب اى اكل يعنى ممكن تاكليها مع اى خضار او مكرونات او عيش
هى ملهاش حل بصراحه
هى حاجه كده شبيهه بالبورجر بس احلى كمان
وتقريبا بتفس طريقته
بس من غير لا بيض ولا بقسماط
(طيب يلا ندخل على المكونات)
نص كيلو لحم مفروم
بصلايه كبيره مفرومه ناعم
نص معلقه قرفه
نص معلقه جنزبيل
معلقه فلفل اسمر
وملح طبعا
5 معالق دقيق
معلقه صلصه طماطم او كاتشب
فيه مكونات اسهل من كده بقى هههههههه
( الطريقه )
انا اول واهم حاجه عملتها
صفرت نص البصلايه فى معلقه سمنه
وبعدين اخدتها هى وباقى البصلايه وحطيتهم على اللحمه المفرومه وبعدين تبلت اللحمه بالملح والفلفل والقرفه والجنزبيل
لان اللحمه لازم تتبل بالقرفه والجنزبيل دول اساس تتبيل اللحمه
وحطى بقى الصلصه والدقيق وخديهم وش تانى فى الكبه
اقراص الكفته دى لازم تبقى ناعمه جدااااااااااااااااااااااا يا بنات عشان مش تفك منك لا قدر الله
ولو لقتيها محتاجه دقيق تانى حطى عادى لحد ما تربط معاكى
وبعدين سيبيها بقى بعد كده فى التلاجه حوالى نص ساعه ترتاح بس عشان تعرفى تمسكيها وتتحكمى فيها
وبعدين حطى جنبك طبق دقيق
وابتدى اعمليها على شكل اقراص
زى ما انا عامله كده والصور هتوضح اكتر باذن الله
اهه
انا قرصتها وسيبتها فى الفريزر ليله كامله وكنت لسه مطلعاها
وده شكلها
طريقه التسويه بقى سهله جدا
انا حطيتها عندى فى التوستر ( الفرن الكهربائى )
ورصيت الاقراص على الشبكه بتاعته جنب بعض
يعنى حتى لا هتحتاجى صوانى ولا هتغسلى مواعيين بعد ما تعمليها ههههههههههه
هى اخدت حوالى من ربع لتلت ساعه بس مش اكتر
عشان مش تنشف ومش تكش اوى
اوك يا بنات
وبتطلع بتبقى زى الفل
طعم وريحه وشكل مالهمش حل وربنا شاهد على كلامى
وده شكلها بعد ما استوت يارب تعجبكم
اللى عليها الابيض ده ملح
اصلى لقيتها محتاجه ملح وانا بدوقهالكم ههههههههههه
قال يعنى طعمها هيبان فى الصوره هههههههههه
ايه رايكم ؟
واكلتها يومها بالعيش الفينو والسلاطه الخضرا والكاتشب
وعملتها تانى واكلتها جنب مكرونه اسباجتى كانت تحففففففففففففه برضه
وده العيش
وده العيش كنت سخنته هو كمان فى التوستر بعد هى ما خرجت كان روعه هو كمان
ودى سلاطه مستقله عن بعضها ههههههههه
اتمنى تجربوها لانها بجد حاجه كده خفيفه وسريعه وطعمها بقى خرافه
ولو عجبتكم قيمونى ولو مش عجبتكم
متقيموش طبعا يا عسلاتى
وكفايه اوى اوى عليا نوركم
متحرمش منكم يا حبايب قلبى
مواضيع هذا القسم برعاية
سنوات الضياع 2 سنوات الضياع 2 729913_1.gif برنسيسة فتكات Fatakat 729913 طنطا – مصر