السلام عليكم يافتوكات
النهارده انا هعمل مقلوبة على الغدا
اول مرة اكلتها كانت في مطاعم الطازج هنا في السعودية
بصراحة لقيتها اكلة حلوة خصوصا في البرد ده فقلت اجربها وانا عادة قبل مااجرب اي اكلة لازم ادور ع النت واشوف اكتر من طريقة واخد الخلاصة
المهم عشان مااطولش عليكم لما دورت على طرق المقلوبة لقيتها كلها واحد بس ولا طريقة طلعت زي اللي اكلتها في المطعم
عشان كده قلت اجرب من دماغي وربنا يستررررررررر
بس الحمد لله التجربة نجحت وطلعت زيها بالظبط
واليكم الطريقة……….
المكونات
فراخ(وممكن لحمة)
ارز(بسمتي او مصري)
بصل (مبشور)
باذنجان (مكعبات)
فلفل اخضر( قطع)
بطاطس (شرائح)
طماطم (شرائح صغيرة او انصاف دوائر)
جزر مبشور وقرنبيط (اختياري لو موجود عندك)
ملح وفلفل اسود وكمون
توابل
زيت
***طبعا انا محددتش كميات لان ده على حسب عدد الافراد بس البصل مش اقل من بصلة متوسطة والطماطم مش كتير عشان متغيرش اللون
الطريقة
_تقطعي الفراخ ارباع وتسلقيها بالطريقة المعتادة بس مش تسويها اوي يعني 34تسوية وتضيفي معاها بشكل اساسي بصل وملح وفلفل اسود واي توابل عندك بكميات قليلة جدا عشان تعطي نكهات مختلفة للشوربة
***التوابل المقترحة(ورق لورو_كاري_قرفة_حبهان(هيل)_زعتر_بهارات لحمةاو فراخ)
_تفركي البصل مع الملح والفلفل والكمون(زي المرتة)
_تجيبي الحلة وتكون كبيرة شوية عشان دي اللي هتحطي فيها الاكلة كلها
وتسخني فيها الزيت (بنفس كمية زيت الرز العادي اللي بتعمليه)
وتحطي كل الخضار ماعدا المرتة والطماطم وتقلبيهم شوية صغيرين من غير ما يتحمروا وبعدين تضيفي شوية ميه واول لما تغلي تضيفي المرتة وتسيبيهم يغلوا شوية على نار متوسطة لغاية لما يستوي الخضار برضو34 تسوية والميه تقل وبعدين تحطي شياطة (وده لازم عشان القاع مايتحرقش)
_تضيفي نصف كمية الرز وتقلبي الرز مع الخضار بالراحة وبعدين ترصي الطماطم وقطع الفراخ وتغطيهم بشوية شوربة وتضيفي فوقهم باقي الرز وتكملي باقي الشوربة بحيث تغطي الرز بكمية كافية وتغطي الحلة ولما الميه تنشف تهدي النار على الاخر وتسيبيها لغاية لما الرز يستوي تماما
_بعد لما تطفي النار اكشفي الغطا وسيبيها تبرد وبعدين اقلبيها في طبق مسطح كبير
وبالهنا
بس اللي تجرب تقوللي الاخبار واللي اكلتها في مطعم اياااااااااااااااااااااااها ماتجربهاش في البيت وتقوللي النتيجة مواضيع هذا القسم برعاية
سمسم كلاسيك سمسم كلاسيك 359457_1.gif فتكات هايلة Fatakat 359457 الرياض – السعودية