بسم الله الرحمن الرحيم
و الصلاة و السلام علي اشرف المرسلين
السلام عليكن و رحمة الله و بركاته
اليوم ان شاء لله هقدم لكو طبق لذيذ
زوجي بيموت فيه
و لازم ياكله علي الاقل مرة في السنة
و الحمد لله اولادي كمان حبوه
و المفاجأة اني كمان حبيته
هههههههه
مجبر اخاك لا بطل
المهم ندخل في المكونات
فول اخضر طبعا مفصص
2 بصلة
تقلية قلقاس ( كسبرة و سلق و توم )
رز
مكعب مرقة
ندخل في الطريقة
هنحمر بصلة يا دوب تدبل
كده
ننزل عليها بالفول
ثم نضع تقليه القلقاس الجاهزة
كان نفسي اعملها بالخطوات بس كان مفرزة عندي
هي عموما سهلة جدا
بتغسلي السلق و الكسبرة
و تنشفيهم كويس و بعدين تقطعيهم و تحمريهم في الزيت و قرب ما ينشفوا و بيقوا مخرفشين ضيفي التوم
و بعدين يا تدقيهم بايد الهون يا تطحنيهم في الكبة و طبعا الكبة افضل
و بعدين اتركيها علي نار هادية
حتي ينضج الفول 34 سوي
ثم ضيفي المرقة مع
ماء يتناسب مع الرز
و اتركيه يغلي
قومي ببشر البصلة الثانية و افركيها بفلفل اسود و ملح
ثم ضيفيها مع الرز المغسول و المصفي
ظبطي مية الرز
ثم علي النار حتي يشرب مائه
ثم خفضيها تاني حتي يكتمل نضجه
تمام كده اهو استوي يلا نقدم
و ما ننساش البتنجان ابو خل و شطة و تومة
و السلطة الخضرا اساسي يحسن جوزي يقطعني
و يا سلام لو جنبها كمان شيبسي بس انا كبرت دماغي و قلت كفاية هم هينهبوا
و في الختام لا اسألكن غير الدعاء
ان يربي لي ربي اولادي
و خاصة الواد عمر اصله مغلبني و علطول معكنني
و يجعلهم حجة لي لا حجة علي يوم القيامة
و يجمعني مع زوجي بالفردوس الاعلي
و و السلام عليكن و رحمة الله و بركاته