[COLOR="Lime"]سلام عليكم
في ظل عصر الأوبئة ال بنعيشه لازم يكون في وقاية من جوة البيت تبدأ بالنظافة والانتباه لمصادر الأمراض
[/color]
انتبهي اختي فالله فآخر الموضوع معلومة هامة جدا جدا جدا
حد هيقولي ايه مصادر الأمراض جوة البيت؟؟؟؟
هقول
-السرير ايوة السرير
(لو سيبتي ملايتك اسبوع وحطتيها تحت المجهر هتلاقي جراثيم ملهاش عدد ومؤكد مؤكد هينوبك من الحب جانب اثناء نومك )
ليه منغيرش الملايات والمخدات باستمرار ونغسلها مع الديتول اساسي بمياه دافية ولما ننشرها نعرضها للشمس
يعني متنشريش الغسيل المغرب وتلميه الفجر لازم نعرضه للشمس
-عودي اولادك ع غسل الايد كويس جدا جدا وقص الأظافر وغسل الوجه خصوصا اول مايرجع البيت لو كان فمدرسة او مشوار يدخل عالحمام مباشرة
-الشباك
بتخافي تفتحي شبابيك شقتك بسبب الذباب لا ياحلوة منك ليها لازم تجددي الهوا ال جوة البيت وتغيريه يوميا
ياريت لما ابو العيال ينزل شغله الصبح تفتحي الشبابيك والبلكونات قبل عوادم السيارات والدخان والحركة فالشارع
الشقة ال هواها مكتوم وليها ريحة دي بتكون قنبلة موقوتة ايشي جراثيم علي بكتريا ووسط هايل للحشرات يعني كوكتيل اوبئة لوحدها
-نفذي وصية رسول الله صلي الله عليه وسلم
عندك مواعين فالحوض وهتبات خمريها يعني سدي الحوض وامليه ماء والمواعين جواه
أكل عالبوتوجاز وهيبات غطيه كويس طب مش لاقية غطا .. عرضي عليه بشئ حطي فوقيه مثلا سكينة كبيرة بعرض الطبق الو الحلة
-أرضية الحمام وقاعدة الحمام خليهم حلوين دايما ونضاف وسهل جدا
رجاء ياريت منسبش الحمام من العيد للعيد من غير اهتمام ونقعد نكحت فيه بالفرش لحد مانجيبله تسلخات
مش هتخسري حاجة ع فكرة لما تعودي نفسك مرة واحدة فاليوم ترمي فقاعدة الحمام شوية اريال او برسيل او اي مسحوق تنظيف ع كلور ع ديتول وتشدي السيفون انتي كدة كدة هتشدي السيفون متكسليش
او ممكن ترفعي غطاء السيفون وتحطي شوية شاور ضغيرين علي برسيل وكلور وديتول ولما تستعملي السيفون يعقملك ويتظفلك بالمرة
بالنسبة للأرض لو وانتي فمهمة بشرية طبيعية اثناء قضاء الحاجة رشي ديتول عالأرض وجريه بالمساحة
خسرتي حضرتك ايه ؟؟؟؟ ولا حاجة طبعا بالعكس حمامك هيفضل دايما نظيف وريحته حلوة وعنوان ليكي قدام الضيوف ويحمي اسرتك قبل اي شئ
-الحنفية ال بتشربي وتملي الأزايز منها كارثة قومية خصوصا في مصر
مش قادرة تشتري مياه معدنية عندك حق محدش هيقدر اصلا يادوب ناكل ونبوس ادينا وش وضهر
مفيش عندك فلتر .. ناوية تشتريه وبتكسلي .. مستخسرة الفلوس ومعتبراه كماليات ونوع من الترفيه
عندي ليكي فكرة مجربةومضمونة ومن غير فلوس وتحمي كليتك ان شاء الله
هاتي طبقات شاش وقطن كذا طبقة رقيقة فوق بعض وثبتيها علي بوز الحنفية بأستيك او لزق بحيث الماء يتصفي من التراب والحصي الصغير هتلاقي بلاوي بتطلع فالشاش ومجاري وقرف انتي نفسك هتتصدمي لأن الواقع مؤلم جدا
خدي الماء بعد التنقية واغليه عالنار ولما يبرد خطيه فإزارزة واشربوا منها عادي حتي لو كسلتي تغلي الماء هتكوني اتخلصتي من بلاوي بلاوي بلاوي بعيد عنا وعنكم
انتي تعرفي ان البلاوي دي لوحدها بتسبب فشل كلوي اه والله
عمرك اشتكيتي من التهابات فالمسالك البولية او طلع عندك املاح وانتي اساسا مش بتاكلي مخللات وملحك خفيف فالأكل
هو ده السبب
يارب حد يستفيد من كلامي وربنا يسلمنا واياكم من كل شر اسألكم الدعاء بالذرية الصالحة
والتقييم ليستفيد غيرك
جمالي ديني وأنوثتي جمالي ديني وأنوثتي 819555_2.gif فتكات متميزة Fatakat 819555 القاهرة – مصر