الحمد لله ربنا كرمني وعرفت اني حامل من حوالي ساعة عملت اختبار الحمل ف البيت والحمد لله طلعلي الخطين
انا كنت اخدت عهد علي نفسي لو ربنا كرمني الشهر دا لازم ادخل اكتبلكم اللي حصل معايا علشان تعرفوا ان كل حاجة بايد ربنا وان العبد مهما كان علمه مش يقدر يدخل ف قدرة ربنا
انا من 6 شهور كنت حامل ف السادس ف توأم بس ربنا مأردش ان حملي يكمل جاتلي انقباضات جامدة ف الرحم واضطروا ينزلوا البيبيهات الحمد لله
من بعد الاربعين بدأت رحلة العلاج لاني عندي تكيسات والتبويض عندي ضعيف جدا الحمد لله
وحملي الاول كان بعد علاج برضو واخدت كمية منشطات عالية لان استجابة المبايض كانت ضعيفة
بعد كدا حصلي فرط تنشيط واتكونت مية ف بطني ودخلت المستشفي ومنها للعناية المركزة قضيت فيها 3 ايام وف خلال وجودي ف المستشفي وانا ف العناية عملولي اختبار حمل وطلعت حامل الحمد لله بس لانه كان توأم كان عندي نزيف مستمر وكنت عايشة علي الحقن المثبتة وهو دا الحمل اللي مكملش ذي ماقولتلكم
انا بقول كل القصة دي ليه لاني لما بدأت رحلة العلاج مرة تانية وبدات اخد منشطات كنت بدأت اتابع مع دكتور مختلف لاني بقيت مقيمة ف محافظة تانية وشرحتله الموضوع
بدأ معايا منشطات بس بسم الله ماشاء الله لسانه كان بيحدف زلط كل ما اروح اعمل سونار يقولي انسي ياعمرو والتبويض وحش جدا وقالي في بس بويضتين ف المبيض اليمين قلتله طيب والشمال قالي الشمال رايح ف داهية تصوروا قالي كدا بالنص
وتابعت معاه الشهر لان مفيش قدامي غيره واخدت حقن كتير علشان البويضات تكبر حوالي 10 حقن وكمان الحقنة التفجيرية واداني اقراص بوجيست علشان لو حصل حمل يثبته وقالي استني ميعاد البيريود لو اتاخرت حللي ولو جات ابقي عيطيلك يوم ولا اتنين وبعدين تعالي
طبعا الحمد لله مكانش في حمل وروحتله الشهر اللي بعده وبدا معايا الرحلة تاني وزود ف الجرعات علشان كان بيقولي انتي استجاباتك ضعيفة جدا جدا ولولا انك حملتي قبل كدا كنت قلتلك اعملي منظار
روحتله اليوم ال 13 لقي بويضتين واحدة 16 والتانية 17 وف المبيض التاني 11 و12
قالي استني كمان يومين وتعاليلي ف التالت تكون البويضات كبرت وبلاش يحصل علاقة خالص اليومين دول وانا سألته طيب مش ممكن ال 16 وال 17 يخرجوا ف اليومين دول قالي لأ استحالة انتي البويضات عندك بتكبر بالعافية ويوم ماتكبر حتكبر امم بس ومش حتطلع
وقعد بقي يقولي المبايض استجاباتها وحشة جدا وعقدني ف حياتي
روحت البيت وانا مش مقتنعة بكلامه ان البويضات حتفضل موجودة انا اصلا صيدلانية وفاهمة الموضوع
قررت اكسر كلام الدكتور وعملنا علاقة تاني يوم وريحنا يوم واليوم اللي بعده روحتله
طبعا ذي ماتوقعت ملقاش البويضتين الكبار لانهم طلعوا انا طبعا اتغاظت منه جدا وفكرته بكلامه اللي قاله علشان احسسه بغلطه وكنت مصدومة لان تعبي وال 9 حقن بتوع الشهر دا راحوا علي الفاضي واحتمال كبير تكون البويضات طلعت وماتت كمان
هو بقي بدأ يبرر موقفه وقالي هم شكلهم لسة طالعين النهاردة ويحصل جماع النهاردة وبتاع
وقالي هم كدا كدا كان كانوا صغيرين يعني طلعوا وتكوينهم ضعيف ووحش ومش حيحصل منهم حمل
وسودها ف وشي واتكلم اننا بعد كدا حيديني علاجات الحقن المجهري طالما مش بستجيب للحقن العادية وقالي حتعملي اشعة بالصبغة ولما لقاني بدات اعيط قالي بس مفيش حاجة بعيد علي ربنا
بس بعد ايه بعد ما سم بدني بكلامه
خرجت انا وزوجي من عنده مش شايفين قدامنا
وانا روحت البيت وقعدت ادعي كتير واقول يارب يحصل حمل الشهر دا علشان بس اثبت للدكتور انه حمار وان مفيش حاجة بعيد علي ربنا
وطبعا الدكتور لان شايف ان مش حيحصل حمل الشهر دا مدانيش البروجيست المثبت
وانا اخدت عهد علي نفسي يوم مااعرف اني حامل لازم اجي اكتب تجربتي كاملة علشان كل واحدة جالها احباط من اللي بتسمعه من الدكاترة تتيقن ان مفيش حاجة صعبة علي ربنا وان الانسان مش يقدر يدخل ف علم الغيب ولا حكمة ربنا
انا كدا خلصت حكايتي سامحوني لو طولت عليكم بس كنت حابة احكيلكم الحكاية بالتفصيل
انا ان شاء الله حعمل اختبار الدم بالليل ادعولي بقي
ودعواتكم ربنا يكمل حملي علي خير والموضوع الاول ميتكررش تاني
اه وحاجة كمان مهمة جدا الاستغفار ثم الاستغفار ثم الاستغفار
متنسوش تدعولي بقي
smily1612 smily1612 فتكات متميزة Fatakat 581214 الاسكندرية – مصر