ازيكم يا اخواتي الفتوكات عاملين ايه
ربنا يقومنا كلنا بالسلامة يا رب ويدينا ما نتمنى
باختصار يا بنات انا شفت موضوعات كتير عن استخدام الجدول الصيني لمعرفة نوع الجنين … وقرأت عنه واكتشفت اننا بنستعمله غلط
ازاي بقى ؟ أقولك
دلوقتي انتي بتجيبي الجدول وتشوفي عمرك وتشوفي قصاده ولد ولا بنت … الفكرة بقى في استخدام الجدول ان المفروض عمرك ده يبقى بالسنين القمرية الصينية وده غير عمرك بالميلادي وبيفرق تقريبا من سنة لأثنين
انا بقى جبتلكم موقع هيريح دماغك من ده كله هتدخلي عمرك بالميلادي وتاريخ حدوث الحمل وهو بيحول السنين ويعمل كل حاجةة ويطلعلك نتيجة
وده اللينك
https://www.babycenter.com/chinese-gender-predictor
الخطوة الأولى هتدخلي تاريخ حدوث الحمل
والثانية تاريخ ميلادك
ملحوظة يا بنات عشان ما خدش ذنب انا بمفتيش بحلال او حرمانية استعمال الجدول وكلنا عارفين ان كل أمر بيد الله وهو اللي بيعلم ما بالأرحام … اللي انا قريته عنه ان الصينيين زمان زي الفراعنة كده عملوا حسابات للموضوع ده وعلى فكرة في عالم مسلم من زمان مش فاكرة اسمه كان بيستخدم برضه حسابات مع بعض اعراض الحامل عشان يعرف نوع الجنين … في الآخر كلها اجتهادات ربنا اللي بيلهمها للبشر وبرضه بيغلطوا و حتى السونار بيغلط والدكتور بيغلط والعلم الأكيد عند الله سبحانه وتعالى
احنا بس اللي بنبقى مش قادرين نصبر وكل واحدة ليها اسبابها بقى اللي عندها اولاد ونفسها في بنا واللي عندها بنات ونفسها في ولد واللي جوزها نفسه واللي حماتها بتزن وهكذا
ليه طلبين عندكم
الأول ان اللي تعرف نوع الجنين تيجي تقول لنا ظبط معاها ولا لأ وانا هعمل استفتاء عشان الموضوع يبقى سهل ويا ريت تقيموا عشان يتثبت … متكسلوش
الثاني بقى تدعولي ربنا يجعل ما في رحمي ذكر سليم معافى وتدعوا لكل مشتاقة ربنا يقر عينها بالذرية الصالحة
مستنية ردودكم ودمتم بصحة وعافية
princess-87 princess-87 فتكات هايلة Fatakat 256581 الجيزة – مصر