السلام عليكم
من فترة كنت فى درب سعادة و كنت بجيب شوية حاجات و من ضمن الحاجات اللى كنت عايزة اجيبها طقم سكاكين.. شنطة يعنى.. بس ميكونش بالاستاند اللى على الرخامة دة لانى مش بحب الزحمة.
جاية فى امان الله اشوف شنط السكاكين فى درب سعادة لقيت الشنطة ب 110 جنية و 25 قطعة
فيها كل انواع السكاكين و زيادة عليهم مقص فراخ و مخرطة ملوخية و مسن و مقص سمك و ساطور
صعب عليا اوى اجيبها خصوصا انى اصلا كنت جايبة المخرطة و مقص السمك و الفراخ و مش هحتاج الساطور فى حاجة لانى اصلا بخاف استخدمة و المسن يعنى مش من الضروريات اللى هموت لو مجبتهاش
فلقيت 6 حاجات مش هستخدمهم او جايبة زيهم فى الطقم دة
فاستخسرت اجيبها
و خصوصا انى كلمت خالتو ساعتها فى التليفون عشان كنت مترددة و كمان عشان هى لسة مجهزة بناتها الاتنين فخبرة بقى..
قالتلى لا متجيبهوش عشان كل دة مش هتستخدمية و كمان فية شنط ب 45 او 40 جنية
مشيت بقى و مجبتش الطقم بس و انا ماشية كنت بسأل بردة يمكن الاقى الشنطة اللى انا عايزاها بعدد سكاكين قليل على اد استخدامى و من غير اضافات تانية انا جايباها
لقيت المحلات كلها عندها نفس الطقم اللى هو 25 قطعة
يا اما اجيبها بالحامل 5 سكاكين ب 80 جنية باين او 90
………..
كنت زعلانة انى مجبتوش لانى كنت عايزة اخلص بقى
……………
كلمت خالتو تانى قالتلى يا بنتى روحى جيبية من التوحيد و النور
..
روحت التوحيد و النور بقى و انا مش مقتنعة اوى لانى عارفة ان التوحيد و النور حاجاتة غالية شوية بس فى نفس الوقت سعات بجيب منة الرفايع اللى ببقى عايزاها مضمونة و مش مغشوشة
لقيت هناك طقم السكاكين و ب 29 جنية
مصدقتش بصراحة
و فية السكاكين اللى هستخدمها و كمان فية ساطور و مسن و البلانشة البلاستيك بتاعة التقطيع
…………
سمعاكى ياللى بتقولى ان الماركة تفرق
انا عارفة ان الماركة تفرق بس انا عرفت معلومة و بصراحة حاسة انها الحاجة اللى تهم فعلا
و هى ان يا اما السكينة تبقى الايد بتاعتها كلها حديد منها فيها يعنى مفيش ايد خشب
لا بتلاقى السكينة كدة حتة واحدة كلها حديد حتى الايد بتاعتها و دية حاجة كويسة اوى
و النوع دة انا بخاف منة
يا اما تبقى الايد يتاعتها خشب بس المهم ان الحديد بتاع السكينة يكون واصل من اول السكينة و داخل جوة الايد الخشب لحد الاخر و دة بردة نوع حلو
عشان لو الحديدة مش واصلة لحد اخر الايد الخشب ممكن ساعتها لا قدر الله مع الاستعمال تلاقى حرف السكينة طلع من الايد الخشب و تتعورى
غير كدة انا مهتمش بقى ماركة و لا مش ماركة متفرقش
ما السكاكين اهوة بنستعملها فى بيوتنا بقالها 20 سنة و زى الفل و بنسنها كل فترة و خلاص و مقلتش لا و لا لقيت مرة السكينة بتتكلم و بتقول انا مش هقطع الطمطماية دية عشان انا مش ماركة
دية صورة الطقم اللى انا جبتة ب 29 جنية من التوحيد و النور
دية الورقة اللى جوة الشنطة و الطقم زيها بالظبط نفس الشكل و نفس العدد و كل حاجة
و جبت كمان سكينة فردانى كدة للعيش الفينو كانت ب 5 جنية تقريبا
و بس
يا رب اكون افدتكم
مدام راغب مدام راغب 538876_1.gif فتكات ست الكل Fatakat 538876 كل المدن – مصر