السلام عليكم ورحمة الله وبركاته
محدش فينا مبيعرفش يعمل الكشري المصري
لأنها أكلة شعبية جميلة بيحبها الصغير والكبير
لكن لكل منا طريقتها الخاصة فى اعداد هذا الطبق المميز
ولكل منا تكتيك معين وأسرار من أجل طعم مميز
أنا جربت طرق كتير ومختلفة للكشري المصري
والحمد لله توصلت لطريقتى اللى اعتمدتها تماما وراضية عن نتائجها وعاجبه زوجى جدا
وطريقتى دى ليها 4 أسرار
هعرفهالكوا وأنا بشرح الطريقة
وياريت تجربوها بجد مش هتندموا أبداااااااااا
بسم الله ……
هبتدى من حيث النهاية
يعنى أول حاجة بعملها هى تحضير البصل المقرمش اللى هيتحط على وش الطبق
السر الأول
عشان البصل يكون مقرمش زى بتاع المحلات
قطعية بالحجم اللى عايزاه جوانح أو صغير
وبعدين حطيه فى دقيق
الدقيق هيخلى البصل مقرمش وطعمه جميل أوى
بعد ما نحط البصل فى الدقيق
هنجيب الحلة اللى هنعمل فيها الكشري
ونحط فيها كمية زيت كويسة
ونستنى لما الزيت يسخن خالص
وبعدين نهدى عليه ونحط البصل
ونقلب كل فتره لحد ما يدينا اللون الجميل ده
هنطلع ونحطه على مناديل عشان تمتص الزيت ونرش عليه رشة ملح
السر الثاني
الزيت اللى حمرنا فيه البصل
هناخده ونصفيه من بواقى البصل
وبعدين ناخده منه جزء نحمر فيه الشعرية
الزيت اللى اتحمر فيه البصل هيكون منكه بنكهه البصل عشان كدة هنستخدمه فى التحضير لباقى الأكله
هنجيب العدس ونغسله كويس
ونشوحه فى الحله مع شوية زيت من اللى قلينا بيه البصل
وبعدين نضيف ليه الماية
وكمان نضيف شوية بصل من اللى حمرناه وشوية ملح ونغطى الحلة ونوطى عليه
كل فترة هنشوف العدس نظامه ايه
انا مش عايزاه يستوى
لا
أنا عايزاه نص سوا
يعنى ناخدى واحدة ونتحاولى تكسريها بسنانك لو متكسرتش يبأه لسه شوية عليه
ولو اتكسرت لكن لسه جامد يبأه كدة تمام
هنضيف عليه الرز والشعرية ونضيف عليهم الماية و الملح
السر الثالث
هنضيف شوية بصل من اللى حمرناه وده هيديه ريحه وطعم وهمممم
السر الرابع
هنضيف عليهم مكعب ماجى
بيدى الكشري طعم فظييييييييع
هنسلق المكرونة (نوع واحد او نوعين) فى ماء كتير وزيت وخل وملح
وعشان متعجنش بعد ما تخلص نصفيها ونغسلها بماية الحنفية ونصفيها كويس
ونرش عليها شوية زيت من اللى حمرنا فيه البصل
وشوية بصل
الدقة
هنجيب كام فص توم
وكمون
ولمونتين وشوية خل
وشوية مايه
الصلصة هنعملها عادى
بصل متقطع نشوحه لحد ما يدبل
ونضيف الصلصة وملح وفلفل وشوية كمون ونسيبها تتسبك
هناخد شوية من الصلصة ونضيف عليهم معلقة كبيرة شطة ونقلبهم كويس
طريقة الغرف
الارز والعدس
وبعدين المكرونة
وشوية صلصة
وبعدها البصل المحمر
وبالهنا والشفا
صورة للتعذيب 
مواضيع هذا القسم برعاية
قطة مسالمة قطة مسالمة ممنوعة من المشاركة Fatakat 325946 المنصورة – مصر