السلام عليكم ورحمة الله وبركاته
وحشتونى فعلا يا قمرات
النهاردة العزومة عندى حتكون على الكشرى المصرى وعشان أنا فخورة بإنى مصريه عزماكم عليه إتفضلوا عالمطبخ
ودايما بحب أعمله بطريقه هندسيه بيكون فيها ترتيب الخطوات مهم جدا عشان فى النهايه أوصل لنتيجة سريعة وسهله ومرضيه فى نفس الوقت
أولا: البصل المقرمش اللى مش محروق
ودى أهم حاجة فى الكشرى إن البصل يطلع مخرفش ومش شارب زيت ودى أسهل طريقة للموضوع دة
– باقطع خمس ست بصلات كبار باقطعهم حلقات رفيعة على قد ما باقدر
-وباديها رشه ملح خفيفة لإن البصل بيحدق بسرعة
-وباملا طاسه القلى زيت وباحطه عالبارد
– وبعدين باحطه عالنار عالواطى خالص وباسيبه مع نفسه براحته خالص وممكن أقلبه من وقت للتانى فى الوقت دة باكون باشتغل فى بقية مكونات الكشرى
-بياخد وقت مش مشكله وأول ما يبتدى يلون بانتبهله خالص وبابتدى أقلب فيه باستمرار لحد أما باوصل للون المرغوب باطلعه وباحطه على ورق يشرب الزيت وبعدين باحطه فى سرفيس التقديم وما باغطيهوش خالص لإنه لو إتغطى حيطرى وبالطريقة دى حيفضل مقرمش على طول
ثانيا : تجهيز العدس والرز
-دايما النسبه بينهم 2:1 يعنى كوبايه عدس وكوبايتين رز
-بانقع الرز
– باغسل العدس وباغطيه بالميه وباسيبه على نار هاديه يدخل فى السوا وبيشرب ميته ولو عايز ميه بازود حبه بحبه
-وبابشر بصلايه وباحط عليها ربع كوبايه زيت تقريبا ودة بيكون فى حلة تيفال غير حلة العدس
-وباشوح البصله فى الزيت لحد أما تطلع ريحتها
-باصفى الرز من ميته وبانزل بيه
-وباقلب باستمرار لحدأماأحس إن كل رزايه وصلها حبة زيت
وباسقط العدس بميته وطبعا ميته يفترض إنها بتكون حبه صغيرين خالص
-وباضيف كوبايتين ميه طبعا دة فى حاله إن ميه العدس شويه صغيرين لكن طبعا لو ميه العدس كتير باقلل الميه عن الكوبايتين
-باضيف ملح – كمون
– بادى فرصه الميه تغلى
– وباغطى الحلة وباوطى النار وباحط الصاجة حوالى 10 دقايق باشوف
-إستوى خلاص ما إستواش ومحتاج ميه بازود باحتراس عشان ما يعجنش
ثالثا : تجهيز الدقه
ومكوناتها توم -ميه حمص الشام -ليمون -خل -كمون-شطة -بابريكا-ملح
– بكون محتفظة بميه حمص الشام فى الفريزر عندى علشان اللحظات التاريخيه دى
-بافرم التوم فى الكبه وباحط عليه معلقه زيت عالنار
-أول ما أشم الريحة بتاعة التوم باحط ميه حمص الشام وباعصر عليها ليمونة وباضيف ملعقة خل وكمون والشطة والملح والبابريكا
وتغلى غلوة باطفى عليها وخلاص
رابعا: صلصة الكشرى
-بافرم التوم فى الكبه وباحط عليه معلقه زيت عالنار
-أول ما أشم الريحة بتاعة التوم باحط الطماطم المعصورة اللى ما بتكونش متصفيه وباضيف معلقتين صلصة ولما تغلى باضيف ملح-كمون -خل -شطة -بابريكا وممكن نقطتين ليمون بس ما بازودش عن كدة وباسيبها تتسبك ودة بيكون شكلها النهائى
وطبعا خامسا بتكون المكرونة :
طبعا باعملها بالطريقة المعتادة ممكن أسيبها بيضاء أو بالصلصة حسب الحاله النفسيه
وبكدة الكشرى المصرى إتعمل ولا أحسن محل برة بكل التفاصيل الجميله بتاعته
ودة طبق للى حينور موضوعى القومى
وطبعا حاسستنى ردود و وتقييمات وتعليقات وإضافات وإلا…………………………………. إنتم أحرار
مش حاعزمكم على حاجة تانى بعد كدة
وربنا يحفظ بلدنا من كل شر
ويحفظنا جميعا من كل سوء مواضيع هذا القسم برعاية
ردينى ردينى 107140_3.gif فتكات ست الكل Fatakat 107140 الرماية – مصر