يارب لك الحمد كما ينبغى لجلال وجهك ولعظيم سلطانك
اللهم تقبله خالصا لوجهك الكريم
حبيباتى متتخضوش انا بما انى اليوم كنت بعمل عملية بصدرى ولسة هكمل لانة حصل مشكلة ولازم تتعالج جراحيا الاول وبعدين استاصل الجزء اللى تاعبنى المهم افتكرت لما كنت بخيط فى ولادتى لبنتى ربنا يحميها ويرزق كل مشتاقه بتوام وقلت احكى معاكم
بصوا بقى هاتو كيس شيبسى زى اللى معايا واقعدو مزمو جنبى اصلى عاوزة احكى معاكو وانتو عارفينى لازم الك معاكو
انا بقى ياحبايبى حكيت قبل كدة النص الاولانى لولادتى لبنتى
وانى كنت طول شهر رمضان بدعى ربنا ييسرلى ولادتى يارب وتكون من اسهل الولادات
ورحت لدكتورى العزيز بعد التاسع باسبوع وكشف نسا وقالى انتى ولدتى ابنك امتة قلتله بعد التاسع باسبوعين
قال وبنتك كمان كدة لسة بدرى وخرجت من عنده حاسة بتعب بس طنشت
ورحت عند والدى لانة زوجى كان مسافر وقبل الفجر حاسة بوجع بس مستحمله وساكته
لحد الساعه 8 صباحا كنت بموت واتصلت على عمو الدكتور قالى دة من كشف النسا خدى حقنة مسكن ومتجيش جة والدى سالنى انا مسافر مشوار بعيد اسافر قلتلة اة دى مش ولادة
ومع انه الدكتور دة لة سمعه كبيرة بس حظى كدة بقا معرفش انها ولادة ولاطلب انى اروح اصلا يتطمن وعلى الساعه عشرة كنت استويت بقا وصوت ومكنش معايا الا ربنا ثم زوجة والدى وقريبة لى ورجلها تعبانة واتصلت بالدكتور قالى تعالى طب اجى ازاى ومين هيجى معايا واعمل اية خلاص وقعت فى الارض والله وكيلى
فعلا احساس انك عاجزة وملكش الا ربنا ولما اصوت يقولولى اسكتى الناس هتقول اية وانا بموت والله ماعدت عارفة اتحرك
وقريبتى تقولى فى ابنك قعدتى يوم بليله هتقعدى كدة برضة وانا فعلا شفت الموت بعينى
وفجاة حسيت انة فيه حاجة بتنزل منى وحسيت بولادة والحمدلله جت ست جارتنا وقتها كانت لسة نازلة من الحج جاتلى وانا فى اخر حاجة كنت خلاص الطلق هدى وبنتى راسها باينة
ومفيش الا ربنا فعلا معانا وقتها مش عارفه غير اقول يارب ده لو قدرت انطق وكنت محضرة لستة ادعيه فى الاول كنت بقول لكن لحظة الطلق الاخير دة بطلة اللى تكمل كلمة بعد كلمة يارب احساس انك عاجزة ومفيش الا ربنا اللى فى ايدة خلاصك
لما لقيت بنتى اتحشرت ومفيش طلق اضطريت ازق من نفسي وادان الضهر كنت بقول يارب
طبعا بنتى وهى بتنزل حسيت بفتح فوق وتحت ربنا يرزق كل مشتاقه بتوام يارب
ويقوم كل حامل بالسلامة ولدتها فى البيت ولى اخ دكتور نسا بالخارج اتصل اتطمن علية وقالى لالالالالالالازم تخيطى وحكيت لة على موقف الدكتور قالى الله يهدية قلتله حاضر هخيط وطنشت
منا ماصدقت ارتحت لحد ماكشفو على بنتى الدكتور بتاع الاطفال قالهم دة وزنها كبير تقريبا شاربة مايه والله اعلم ولازم تكون امها اتقطعت من تحت عشان تولدها ودى بطلة انها ولدتها طبيعى واله مابطلة بس ربك كريم ومكنش معاياغيره الحمدلله هو احن عليكى من اى حد
فاخى اتصل شد معايا عشان اخيط وقد كان رحت اخيط عند دكتور محترم اول ماشفته قلتله بقولك اية انا لسه والدة وكمان هخيط يعنى ولادتين حراااااااااام انت تشفنى ولو مش مستاهله اروح وخلاص انا تعبانه
قالى حاضر اشوف بس
اول ماشافنى قالى يابنتى نفترض انك من تحت هتلمى مع انها بتجيب مشاكل بعدين زوجية وبدنية بس هنفترض طب بنتك فتحت من فوق ودة شرياااااااااان واتفتح ولالالالالالازم يتخيط
قلتله اممممممممممم طب بنجنى قال حاضر قلتله بقولك ايه
قالى اتفضلى قلتلك البنج الموضعى بتاع تشك تشك دة وترش كدة مالوش اى تلاتين لازمه
وجربته فى ابنى والدكتور قالى مش هتحسي بحاجه وحسيت وربنا حسيت بالخياطه ارحمونى
قالى انتى ولدتى عندى قبل كدة قلتله لا قال تمام لما تولدى عندى ابقى احكمى قلتله ماشى يالا
قام جاب حقنه فى الكالونة وادانى فى دراعى ورايح يرفع رجلى لسة بجهز نفسي عشان اقولة بتعمل ايه ياللى تنشك هو انا لسه اتبنجت رايح تخيط قبل مااتبنج لقتنى بقا فى وسط اوضه وخارجة منها على اوضة وهكذا
زى مايكون فى اوتيل اخرابى ياجودعان ايه دة انا مت وكل الى بفكر فيه هو فين ربنا فين؟؟؟
واخر حاجة وصلتلها بعد ماقعدت اسال نفسي انة اية الحياة دى لما مش هشوف ربنا هفضل كدة ميتة ومفيش جديد
وفجاه لقتنى بقول لنفسى يالا نرجع الدنيا وبدات افوق لقيت الممرضة جنبى والدكتور وانا احلى حاجة لقتنى
بعمل ايه؟
اصابع السبابه بتاعة ايديا الاتنين مرفوعين وبقول وحده لاشريك له له الملك وله الحمد وهو على كل شىء قدير
عشان ايه؟ عشان دى ضمن اذكار الصباح وانا كنت تعبت وشيخ قالى لازم تحافظى علي( لا اله الا الله وحده لاشريك له له الملك وله الحمد وهو على كل شىء قدير )100 مرة صباحا ومساء عشان متنضريش وانا لانى بتلخبط فكنت غالبية الوقت اقول وخلاص فاتعودت انى اقول
فسبحان الله ربك كريم انبسطت اوى لما لقتنى بقول كدة اللهم احسن خاتمتنا جميعا
وبعدها الدكتور خرج وجاى وانا لقتنى بقول الدكتور اهو واضحك والدكتور اهو واضحك
والدكتور انكسف منى وقعدت عبال مافقت الممرضة قالتلى اول مااداكى البنج قالى ساعدينى اصل دى لو فاقت ولقتنا لسعه شغالين فيها هتخنقنا شوية ولقيناكى بتقولى لا اله الا الله قال يادى المصيبه دى ماتت باين
الدكتور دة فاكرنى لانى كنت بروح اكشف ومعايا ابنى ى اول مافتح فوقع له بيتادين كان لسة شارية جركن كدة وفرحان بيه
ومن يومها عارفنى مبيجلوش من ورايا الا المصايب
يالا افتكرونى بالدعاء لانى عملت الجزء الاول من عملية فى صدرى ولسة هكمل باذن الله شفانا الله واياكم وكل مريض مسلم
احبكم فى الله
اميرة الاسلام فى قلبى اميرة الاسلام فى قلبى 757298_13.gif فتكات ست الكل Fatakat 757298 المنصورة – مصر