أهلا أهلا يا فتوكات يا قمرات إيه النور ده بجد وحشتونى أوى
أنا من زمان ما بدخلش ع المدونة أخر مرة دخلت فيها كنت بكتب الجزء الأول م الموضوع دة
و النت تقل ماعرفتش أكمل جيت تانى يوم لقيت الكمبيوتر بايظ إهئ إهئ إهئ
وبعدين بقى الدروس بتاعتى بدأت ما هى الثانوية العامة مش عايزة أى كلام كدة يعنى و ابقو ادعولى بقى ربنا يوفقنى فيها
معلش رغيت كتير يلا بقى نبدأ
بسم الله الرحمن الرحيم
الأول كدة هكتبلكو الجزء اللى أنا كتبتو قبل كدة عشان اللى ما شافهوش يبقى متابع معانا م الأول
:
بســـــــــم الله الرحمـــــــــن الرحيــــــــم
الســـلام عـليكــــــــن ورحمـــــة الله وبركـاتـــــــه
.
..
…
….
…
..
.
أهلا يا أحلى فتوكاااااااات
ازيكم انا النهاردة هبتدى معاكم بوصفات تحفففففففة عشان الفطار بقى (الوصفات دى أنا شفتها النهاردة على قناة فتافيت بصراحة عجبتنى أوى البرنامج اسمه من مصر وأنا نقلتها لعيونكم)
يلا هكتبلكو اللى هنجهزه مع بعض وانتظروا منى كمان شوية الطريقة
يلا نبتدى؟؟؟؟؟
اه طبعا يلا
:
1. الشوربة(هتكون نوع جديد شوية وهو شوربة الكرات)
ماتتخضوش أوى كدة م الكرات دة هى هيبقى طعمها جناااااااااااان
2.فراخ بالمستردة(ياسلااااااااام)
3.طبق الخرشوف بالباستا واااااااااااو
4. السلطة (سلطة المشروم) نوع جدييييييييد
أول حاجة هتكون الشوربة:
هنجيب كرّات افرنجى >> نقطعه بالطول ونغسله جيدا من برا ومن جوا وبعد كدة نقطعه مكعبات ونشوحه ف الزبدة مع بطاطس مقطعة مكعبات و نحط عليهم فلفل اسود وملح ونشوحهم جيدامثلا لمدة 5 دقايقوبعد كدة نسقيه بالمرقة وبعد كدة نغطى عليها ونسيبها تغلى ولما تبرد نحطها ف الخلاط
وبعد كدة نحط معلقة زبدة كبيرة فى حلة ونحط عليهم 2 معلقة دقيق كبيرة ونشوحهم كويس بس أهم حاجة ناخد بالنا منهم عشان الدقيق مايتحرقش
وبعد كدة نحط على الدقيق مرأة (حوالى كوب) وأيضا حوالى كوب لبن ونقلبه كويس عشان ياخد الطعم ونحط الملح ونقلب شوية لحد ما تبقى ناعمة خالص وبعد كدة نحط الشوربة اللى عملناها فى الخلاط ونسيبها دقيقتين (تقريبا) وبعد ما تغلى نقفل عليها ونغرفها وممكن نعصر لمون حسب الرغبة
………………………………………….. ………………
نبدأ بقى ف الجزء بتاع النهاردة يا قمرات وهو:
تانى حاجة هتكون الفراخ بالمستردة:-نحضر عدد من قطع الفراخ المقسمة بحسب عدد الأسرة وبعد كدة نتبل الفراخ بالبصل والمستردة واللمون والتوم والفلفل الاسود والملح ونسيبها عدة ساعات لا تقل عن(من6:4 ساعات) يعنى يفضل ان احنا نعملها ف اليوم اللى قبليه بالليل وبعد كدة نسيبها ف التلاجة
-معلقة زبدة وشوية زيت زتون نحطهم ف الطاسة وبعد كدة ها تنشلى الدجاج من التتبيلة والبصل عشان البصل ما يتحرقش معاها وهنشوحها ع الوجهين لحد ما تاخد اللون الدهبى وبعد كدة نشيلها م الطاسة ونحط التتبيلة بتاعتها مكانها لحد ما يا خد البصل اللون الأصفر الدهبى وبعد كدة نضيف الدجاج تانى ونقلبهم مع بعض ونشوحهم وبعد كدة نحط عليهم مرأه دافية أو ماء دافئ (يعنى المهم انها ماتكونش باردة) وبعد كدة هنسيبهم ع النار لحد ما يغلى الخليطوبعد كدة نحطهم فى صنية وندخلهم الفرن حتى تمام النضجوبعد كدة هنطلعها م الفرن لما يبقى اللون بنى دهبى
-وبعد كدة نعصر لمونة فى بولة وعليها معلقتين كزبرة خضرة وفصين توم مفرومين وزتون مخلى ومعلقتين زيت زتون ونخلطهم ونحطهم ع الفراخلا ونرجع تانى نحطهم ف الفرن لمدة خمس أو عشر دقايق بس-وبعد كدة نغرفها ف طبق عليه كزبرة خضرة وممكن بقدونس وبعد كدة نرش الصوص(التتبيلة) بتاعها ع الوش
………………………………………….. ………………………………………….. ……………………………..
تالت حاجة طبق الخرشوف بالباستا
1. نسلق مكرونة فرن
2.نشوح فصين توم مفرومين فى قطعة من الزبدةثم نضع عليه قطع الخرشوف وبعد كدة نحط عليه كزبرة خضرة مفرومة ونسيبهم يمتزجو مع بعض جيداً ثم نضع عصير لمونة ثم نضع قطع من الزتون الاسود المخلى ونشوحهم مع بعض
3.نحط الباستا (المكرونة) ع الخرشوف ونحط كمان شوية كزبرة تانيين وبعد كدة نقلب تقليبتين ونقفل عليهم النار
4. نغرفه ف طبق
5.و أخر حاجة رشة الجبنة المبشورة ع المكونة عشان تبقى شهية إمممممم
(الخرشوف اشتريه مجمد ومقطع جاهز)
………………………………………….. ..
رابع حاجة: طبق السلطة (سلطة المشروم)
*نجيب بطاطس م الصغيرة خالص (papy potato) بس تكون حوالى (من 12:10) ونسلقها وبعد كدة نقطعها نصين بس مانقشرهاش لأن التقشير دة هيبقى فى خطوة تانية بعد كدة
*وبعد كدة بنحط زيت زتون فى طاسة ع النار ونحط عليه فص توم مفروم ونشوحه ف الزيت وبعد كدة نحط معاه مشروم مقطع شرايح لحد ما يغير لونه شوية ونقلبه
لمدة (2 دقيقة) ع النار
*وبعد كدة نحط البطاطس فى طبق كبير غويط ونحط عليها المشروم والتوم وممكن نضيف أنشوجة أو تونة ونحط زتون مخلى ونقلب وبعد كدة عصير لمون وزيت زتون وقليل جدا من الملح لو انتى حاطة انشوجة لانها بتبقى مالحة ونحط فلفل اسود وشوية كزبرة وبعد كدة نحطها ف طبق التقديم
وبالهنا والشفا ان شاء الله
………………………………………….. ………………………………
كدة بقى فاضل طبق التحلية اللى ما ضفتوش ف القايمة فوق بس معلش بقى نسيت
بس التحلية بقى من برنامج غيره بس بصراحة مش فاكرة اسمه
أخر حاجة : كيكة الشوكولاتة بدون خبز:
ناخد شوكولاتة جلاكسى وتكون كتييييييييير يعنى حوالى 15 أو 20 واحدة
ونقطعها قطع صغيرة ونحطهم ف حمام مياه ونحط معاها حوالى 4/1 كيلو زبدة ونحط معاهم سكر ونقلبهم مع بعض كويس لحد ما يسيحو مع بعض مع بعض ونشيلهم من ع النار ونحطهم فى فبق كبير وغويط ونحط معاها بسكويت نكون مقطعينه قطع صغيرة وكريز مسكر ونجيب قالب ونحط فيه الخليط ونساويه مع بعضه ونغلف القالب بكيس ونقفل الكيس عليه ونسيبها لما توصل لدرجة حرارة الغرفة وبعدر كدة بندخلها التلاجة لحد ما تمسك فى بعضها كويس
وبنطلعها ونقدمها مع شوكولاتة جلاكسى
وبالهنا والشفا
………………………………………….. ………………..
كدة خلصنا كل حاجة وصوابعى كمان وجعتنى من كتر الكتابة بس كله يهون عشان حبايب قلبى الفتوكات القمرات
ماتنسوش تدعولى ربنا يوفقنى فى الثانوية العامة وف حياتى
وطبعا الردود والتقييم
مواضيع هذا القسم برعاية
linda.lolo 50 linda.lolo 50 513988_12.gif فتكات متميزة Fatakat 513988 الشرقية – Egypt