السلام عليكم
ازيكم يا بنات عاملين ايه ؟ يارب تكونوا بخير
انا بصراحة نفسيتى تعبانة جدا الايام دى انا كنت بدات رجيم من حوالى اسبوعين كنت 68 كيلو انا المفروض ابقى 50 وبعدين خسيت فى الاسبوع الاول 2 كيلو انا بعمل رجيم مع نفسى وبعدين فى الاسبوع تانى زدت كيلو وكنت زعلانة جدا وساعات كنت بلخبط جدا والرجيم يضيع انا الحمد لله بدات الصيام من اوله (العشرة الاوائل من ذى الحجة ) والنهاردة تالت يوم بس امبارح كنت مخنوقةو مكتئبة وضيعت كل الى عملته وكلت كتير اوى وبشراسة وعيطت عشان عملت كدا بس انا دلوقتى صايمة وحبيت حد يكون معايا ونتبع نظام رجيم صحيح من اكل البيت ودا هيخسس من 2 كيلو ل 3 او اكتر حسب التزامك فى الاسبوع ومفيش يوم فرى لاننا هناكل كل حاجة وطبعا احنا هنبعد عن الشيكولاتة والشبسيات دى كلها وانا هقولكم ع البدائل ليها عن نفسى اقدر مكلش حلويات بس بموت فى الاكل وده الى متخنى متستبدليش الاكل ده بحاجة تانية لاننا هنقول كل الاكل وطبعا مش هناكل الفاكهة الممنوعة والزبدة والسمنة الغيهم من اكلك كله و النظام ده طبعا فى الصيام وان شاء الله فى نظام بعد الصيام هيبدا فى العيد ان شاء الله بس انتوا شجعونى وع فكرة احنا مش هنخس بس احنا هنتصاحب وندى الملل بالشالوت وهنتكلم مع بعض وكل حد عايز يفضفض او يقول اى حاجة وياريت تكتبوا وزنكم دلوقت والمطلوب والطول والسن وكمان النظام ده هيكون معتمد ع الالف سعر او اقل.
نصائح مهمه وافكار يجب اتباعها :
1 – استبدال السكر العادى بسكر بنى او عسل طبيعى او سكر دايت .
2 ـ افطرى ع كوباية الشاى الاخضر وتكونى محضراها قبل الاذان بربع ساعة
3ـ اشربى ما لا يقل عن 8 اكواب ماية يوميا
4ـ الافطار ع السوائل وبعدين تصلى المغرب والسنة وتستنى ربع ساعة تحضرى فيها الاكل وبعدين تاكلى
5ـ استبدلى المقرمشات والشبسى بالكورن فليكس مع بهارات الشبسى
6ـ الابتعاد عن كل المقليات و وضعها فى الفرن
7ـ يكون السحور قبل الساعة 12 وتستنى ساعة او نص ساعة وتنامى
8ـ الالتزام باعمال المنزل تعويضا عن الرياضة واستغلال اى فرصة للمشى (يعنى بدل ما تركبى وانتى راحة اى مشوار خديها مشى )
9ـ الاكل ببطئ
10 ـ لازم وجود اى نوع من الخضار فى البيت زى الخيار او الخس عشان لما تحسى بالجوع تاكلى منهم
11ـ بدل ما تنزلى تشترى حاجة حلوة من السوبر ماركت اشترى لبن خالى الدسم وحاجات دايت ودارك شوكلت .
*الرجيم *
الفطار :
( الاساسيات )
1 كوب شاى اخضر بملعقة سكر واحدة فقط + 2 كوب ماء + كوب عصير سكر قليل ( نروح نصلى ونستنى ربع ساعة ) 3 ملاعق خضار بالصلصة او خضار سوتيه باى كمية +
ربع رغيف عيش بلدى او نص سن + بولة شوربة صغيرة اى نوع +طبق سلطة او خضار كامل ( خيار او طماطم …)
( الفروع )
ربع فرخة مشوية او مسلوقة
او شريحة لحمة مسلوقة او مشوية
او 2 سمك بورى حجم متوسط
او 15 سمكة شبار صغير
او قطعة واحدة مكرونة بشاميل ( منخدش معاها العيش )
او 3 سجق مقلى بدون زيت فى ماية بس
او 2 قطعة همبرجر بدون زيت فى ماية
او الاستغناء عن كل الاكل معادا السوائل واكل طبق شوبة خضار او سلق وليمون كبير مع قطعتين لحمة (بيلكم ويشبع )
او قطعة جلاش باللحمة
او 5 معالق رز بالطماطم او بالبطاطس
الممنوعات ( المقليات والطحينة والمايونيز والبيبسى بانواعه وعصير المانجا )
المسموحات ( كاتشب و مستردة و مشروم معلب او طازة )
السحور :
(الاساسيات)
ربع رغيف اسمر او نص سن + سلطة او خضار + كوب شاى او نسكافيه سكر قليل او شاى بلبن خالى الدسم
(الفروع )
3 ملاعق فول بدون زيت
او قطعة جبنة مثلثات او كيرى
او بيضة مسلوقة او بيضة مقلية بدهن الطاسة زيت او فى تيفال
او 2 ملعقة جبنة قريش
او شريحة لانشون لحمة
الممنوعات ( حلاوة بكل انواعها او جبنة حادقة او بسطرمة )
التسالى والحلويات :
مكسرات ولب بكل الانواع غير مملح حصة كف اليد مرة فى الاسبوع فقط
اوطبق جيلى صغير بكل انواعه بفاكهة معادا الممنوعات بدون كريما 1 مرة فى الاسبوع فقط
او مهلبية بلبن خالى الدسم مع سكر دايت او عسل مرة واحدة فى الاسبوع
او فشار بدون زيت باى كمية طول الاسبوع
او شيكولاتة دارك مرة واحدة فى الاسبوع قطعة واحدة بحجم اصبعين بس
والفاكهة فى اى وقت معادا الممنوعة
(اختارى نوعين بس من المسليات دى تكيلها فى الاسبوع كل واحد مرة بس يعنى مثلا تاكلى شيكولاتة مرة واحدة وفى يوم تانى فى الاسبوع تاكلى جيلى بس مش اكتر من كده )
انا كده خلصت يارب اكون افدتكم والى هتكون معايا تكتب الحاجات المطلوبة فى مشاركة مستنياكم
التقييم لو عجبك
amira alamora amira alamora 898284_5.gif فتكات متميزة Fatakat 898284 بورسعيد – مصر